الاثنين، 25 فبراير 2008

مسرح العبث "1"


قال يوسف بك وهبي ان الدنيا مسرح كبير , وانا اراه مسرح من العبث تدور علي خشبته حوارات نجد صعوبة في استيعابها او فهم مغزاها واليكم بعض حوارات واسئلة من هذا المسرح

ازيك
بلاش ازيك دي
بتنرفزني
ليه
مش مهم ليه
طيب عامل ايه
كويس عايش
شكلك مضايق , انت كده قلقتني عليك
لا ده الطبيعي بتاعي , يعني لو لقتني مرة مبسوط ساعتها بس ممكن تقلق
طيب تصبح علي خير
وانت من اهله

شفت يا عم اللي حصل في غزة
ايوه طبعا , ولاد..... مش ايجيبوها لبر
وانت شايف الحكام العرب اللي عاملين ودن من طين وودن من عجين
اياك ربنا يولع فيهم كلهم
طيب قولي انت سمعت اغنية عمرو دياب الجديدة


المدرج شبه خالي الا من عدد من الطلبة يعد علي اصابع اليد
الاستاذ يشرح لنا ليؤكد لنا انه عنده ضمير, فهو سيشرح المحاضرة ولو كان هناك طالب واحد
اشعر بالتثاؤب من شدة الملل واشعر برغبة شديدة في النوم لكني اقاوم ببسالة
وقبل إن تنهار مقاومتي تماما ينقذني صوت الاستاذ , حد عنده اي اسئلة
نهز رؤسنا في بلاهة
وقبل إن يغادر المدرج يثني علينا وهو يزف الينا إن الطلبة اللذين لم يحضروا المحاضرة قد خسروا كثيرا !!!


تفتكر امتي امريكا تخرج من العراق
لما يستتب الامن
طيب امتي ايستتب الامن
لما امريكا تخرج من العراق


تاكد لنا ان ابنتها كتومة لاقصي درجة
مما يجعل جميع اصدقائها يستامونها علي أسرارهم
لكن هي من تفتري عليها مدعية انها أفشت أسرارها
مع انها لم تحكي لاحد مع حكته لها عما حدث بينها وبين جارهم في المصيف , كما لم تحكي لاحد ما حكته لها عن اخو صديقتها الذي كان يواعدها كل يوم في الحديقة المجاورة لمكان شغلها..
انا بنتي عمرها ما فشت سر حد ابدا !!!



انت شايف يا عم حال البلد
ايوه يا عم اتقولي
الاسعار مولعة وانتخابات مزورة , والسرقة بقت عيني عينك, وتلاقي واحد ملازم ميسواش تلاتة مليم يبعتر كرامتك
مفروض بقي الناس تتكلم , مينفعش الجبن ده
انت يلا انت وهو مش اينفع تعدوا من هنا
ليه بس يا باشا ..مش عجبك يا ......

مش عاوز كتر كلام .....

بقلك يا استاذ متعرفش ايه سبب القلق ده
اصل بتوع حركة كفاية عاملين مظاهرة عشان التعذيب اللي بيحصل في الاقسام
اه ....طيب هي الحكايه ناقصه عطله ...عالم فاضيه صحيح !!!

استضافة الملف بواسطة مركز عين الذيب

والان مع بعض الاسئلة العبثية والتي اعجبتني ورغم اني لا اعلم من صاحبها الا اني ساجاوب عنها باسلوبي


من أنت ؟
وما الذي تفعله هنا ؟

لا اعلم بالتاكيد , ولو كنت اعلم لحلت الكثير من مشاكلي


إسرائيل تقصف كل جنوب ممكن بحثا عنك ، أي شمال ستقصد ؟

لا تصدق كل ما يقال , فربما يكون هدفهم ان اتوجه للشمال ليقذفوني هناك


أنت مكلف بحذف حرف من حروف اللغة العربية .. أيها ستختار ولماذا ؟ ..

ت " توسل " لقد كرهت التوسلات التي نقدمها للاخرين ليس لكي لا يقتلونا بل ليقتلونا بصورة اكثر رحمة !!

لو قدر لك أن تدخل السجن فما هي القضية التي تتمنى ان تدخل بها إليه؟

لا تتوقغ ان اقول لك تهمة سياسية , فالسياسة صارت عهر يمارس علي مستوي دولي , وانا لا احب التهم سيئة السمعة

بالمناسبة.. منذ متى اكتشفت نفسك؟

كيف تفترض شئ لم يحدث بعد, الا ان كنت تقصد شاهد المقبرة هذا المدون عليها اسمي

على مفترق طريق لافتاتان ، اليمنى تقول ( إلى حلمك ) واليسرى تقول : ( إلى مالم يحلم به بشر ) ، أي الطرق ستسلك ؟

كيف عرفوا حلمي الا ان كان الحلم الذين يريدون ان احلمه , ام الطريق الثاني فاخشي ان يكون الطريق الي الجنة من خلال الموت الخطأ

نحن لا نعيش حياتنا بل نتعلم فيها كيف نعيش» ما تعليقك؟

تبدو المشكلة ان ينتهي العمر عند بداية التنفيذ لما تعلمناه...

بجملة واحدة فقط أكتب تعريفاً لكل كلمة من الكلمات التالية:-

الوطن : هذا المكان التي يتم اختياره لنا لندفن فيه ...

الأم: اول كائن اشعر اني لست مضطرا لتبرير وجودي في الحياة امامه

الليل : هذا السواد الذي يذكرك بلحظات وجودك الاولي عندما كنت في رحم امك

الحب : الجميع يحكون لي انهم سمعوا ان اناس راؤه , لكن لم يؤكد احد انه رائه بعينه

أمريكا :هي تجسيد لاسطورة قرئتها عن الشر الجميل


المرأة : حب - الم - قسوة -جنون معجزة التناقضات عندما تتواجد في محتوي واحد


الصمت : لغة تعلمتها منذ ان ادركت فاجعة الكلام

اليوم الوطني : يوم عليه ان نتذكر هزائمنا العربية واتمني ان يكفي يوم واحد لها

الإنترنت :شبكة من الجنون تخترق كل عقول البشر

اليوزرات : قناع نرتديه علي قلوبنا لنتحول من شياطين الي ملائكة في كرنفال من الكذب المتفن

الشات: وسيلة لنصرخ بملئ حناجرنا لاننا متاكدون انه لا يوجد من يطلب منا ان نخفض اصواتنا

المسنجر: جلسة سرية تمتزج فيها نبضات الحب والالم والغضب والجنون مع النبضات الكهربائية

كيف تتخيل العالم دون هذه الأشياء : ( القهوة .. الكمبيوتر ..
نانسي عجرم .. أمريكا .. يوم الأربعاء ).؟


القهوة : لن يجد ابطال الروايات الرومانسية شئ يحتسوه قبل كل مشهد من المشاهد العاطفية , وستنتهي اجتماعات القمة العربية بسرعة اكبر تحت مبرر عدم توفر البن

الكمبيوتر: سوف تتعطل الكثير من برامج الحرب الامريكية , وسيحتاج الامريكيين وقت اطول بكثير لممارسة انسانيتهم من خلال القتل الرحيم باقل الخسائر الممكنة !

نانسي :لا تواجهنا اي مشكلة في مصر مع وجود روبي


أمريكا : سوف يفقد العالم اخلاق الفرسان الامريكية مثل ..الاستئذان قبل قتلك - اسلوب الامريكان في القتل الرحيم - لن تتلقي اي من دروس الامريكان المعتادة في حقوق الانسان والتي تتم في سجن جوانتنامو و سجن ابو غريب وغيرها

يوم الأربعاء : اخشي انني لو فقدت حتي كل ايام الاسبوع لن اشعر باي فرق , هل تشعر انت

أخترمنصباً واتخذ قرارا !

ان اكون رئيس جمهورية علي ان اختار الشعب الذي ساحكمه


قيس، عنترة، جميل، هم الذين يقولون شعرا، وليلىوعبلة وعزة صموت
» لماذا هذا التغييب للمرأة؟


اراه ليس تغييب للمراة بل هو استغباء لهولاء الرجال ليكون الشعر والمراة سبب هلاكهم


أن تكون مطلوبا لارتكابك جريمة ، خير لك من ان لاتكون
مطلوباً مطلقاً " ، هل تتفق مع هذهالعبارة ؟ علل ؟

لن تفرق كثيرا فالمعتاد الان في العالم توجيه اصابع الاتهام لك ثم محاكمتك وشنقك وربما بعدها يتم تحديد نوعية الجريمة

إلى أين تمضي كلمات الحب .. بعد أن نقولها؟

تتبخر مع شعاع شمس اليوم الجديد, ثم تعود لنا بعد ان تتكاثف في كؤؤس الغرام التي نحتسيها ليلا دون ان ننتبه الي ماهية التي نحتسيه هذا


هل تجد علاقة بشكل أو بآخر بين المرأة وقطاع الطرق ؟

كلاهما لا نجد امامه غير الاستسلام باعطائه كل ما في جيوبنا " او ما في قلوبنا"

هذا فراق بيني وبينك .. متى ولمن تقولها ؟

كل احلام الطفولة مع اكتشافي فجيعة الواقع

كيف هو غداً ؟



مثل الامس واليوم


استضافة الملف بواسطة مركز عين الذيب

والان مع اسئلة اخري تندرج ضمن اسئلة العبث السياسي وايضا لا اعرف صاحبها لكن ايضا ساجاوب عنها باسلوبي


س- ما هي السمة المشتركة في الانتخابات العربية؟

ج- حرص الشعب العربي علي المشاركة لدرجة الموتي بيطلعوا عشان يدوا صوتهم

س- ما هو شعار الحزب الوطني؟

ج:ما تقولش ايه ادتنا مصر قول اناخد ايه من مصر

س- السياسة التي يتتبعها الحزب الوطني؟؟

ج- يتم الضرب علي يد الفاسدين ان لم يقسموا معانا


س- من هو الرئيس العربي الذى ترك الحكم طواعية؟

ج- هو رئيس عربي ترك الكرسي طواعية بعد لفظ انفاسه الاخيرة

ج- يعنى إيه وطن عربي؟

منطقة من المحيط الي الخليج تسكنه كائنات في طريقها للانقراض

س- لماذا لا يتحد العرب؟؟

ج- عشان القر والحسد

س- لماذا تتواجد المشاكل دائما في كل اجتماعات الرؤساء العرب؟

ج- لان لو مفيش مشاكل مكنش في داعي للاجتماع ونتيجة لتلك المشكلات الاجتماعات بتفشل

س- ايه اللي يحصل لو بيل جيتس بقى مسلم وقال أنا هخصص ربع دخلي للمجاهدين؟

ج- يبقي حد من المجاهدين مكنش متغطي وهو نايم

س- ماهي موصفات الحاكم العربي؟

ج- انه يؤمن بحرية الرأي اللي ميخلفش رايه ,..نظافة اليد يعني بيغسل ايده قبل الاكل وبعده,... الامانة فهو يحافظ علي اموال الشعب في حسابه في بنوك سويسرا ... الحكمة حيث ايمانه بالحكم التالية ..حكمة من خاف سلم ,وحكمة بات مغلوب ولا تبات غالب.. وحكمة فار صاحي ولا اسد ميت

هناك 43 تعليقًا:

ساعد نسرين الايمن يقول...

الله عليك
بجد بجد انت كاتب رائع
عاجبني اسلوبك اوي
استمر
وتذكر ان القاعدة الان
متقولش ايه ادتنا مصر
قول بايه ادتتنا مصر؟
ياتري حد عارف هي ادتتنا بايه ؟

آخر العنقود يقول...

ماشاء الله عليك وعلى اسلوبك
بجد بوست رائع وفكرة اجمل
واسلوب عرض متميز

احييك على هذه الحقائق السخرية الرائعة اخى الكريم

بجد من كتر النقط اللى عجبتنى فى البوست مش عارفة احدد ايه فيهم بالظبط
يعنى ممكن اخدوهكده شروة واحدة
:)

فعلا كل التقدير والاحترام لك
ولاسلوبك الراقى والجديد

HeBa يقول...

بجد مش لاقية حاجة أقولها

في جملة لأحلام مستغانمي بتقول

ثمة حزن يصبح معه البكاء مبتذلاً، حتّى لكأنه إهانة لمن نبكيه.

معك

ثمة كلمات يصبح معها التعليق مبتذلا حتى لكأنه إهانة لمن نعلق عنده

اجاباتك وأسلوبك شديد التميز

تقبل مروري

Empress appy يقول...

ياااااا طولت بالك بجد ماشاء الله عليك انا مش عارفه انت عارف كل الكلام واللى بيحصل ده وربنا مكملك بعقلك انا بقت دماغى باظت ومرارتى من بدرى ربنا يديك الصحه يا رب
بس فكرة حلوة عارف عامله زى تخاريف محمد صبحى بس تخاريف هادفه

بطوط حبوب يقول...

اول زياره واول كومنت
فكره البوست حلوه اوى

أحلى حياة يقول...

gamda mooot bgd :D bzzat...

ج- يعنى إيه وطن عربي؟

منطقة من المحيط الي الخليج تسكنه كائنات في طريقها للانقراض



س- لماذا لا يتحد العرب؟؟

ج- عشان القر والحسد

da7akony awyyy bgd

الفارس الملثم يقول...

الله عليك
بجد بجد انت كاتب رائع
عاجبني اسلوبك اوي
استمر

الله يخليك , متشكر اوي لمرورك ورايك الذي اسعدني كثيرا , وانتظر تواجدك في مدونتي المتواضعة باستمرار

مع خالص تحياتي

الفارس الملثم يقول...

يعنى ممكن اخدوهكده شروة واحدة

تدفعي كام احنا مش نغلي عليكي احنا بنربي زباين

ماشاء الله عليك وعلى اسلوبك
بجد بوست رائع وفكرة اجمل
واسلوب عرض متميز

بجد اسعدني رايك جدا واتمني مرورك دائما

مع خالص تحياتي

الفارس الملثم يقول...

بجد مش لاقية حاجة أقولها

في جملة لأحلام مستغانمي بتقول

ثمة حزن يصبح معه البكاء مبتذلاً، حتّى لكأنه إهانة لمن نبكيه.



بداية انا متشكر اوي يا هبة لتقديرك واتمني ان تكون كتابتي عند حسن ظنك دائما

ثانيا : اعجبني جدا اختيارك لهذه العبارة لاحلام مستغانمي لاني بجد من المعجبين جدا باسلوب الكاتبة البارع خاصة في روايتها حتي انك تحس وانك تقرأ روايتها انك تقرأ شعر منثور

دايما بانتظر مرورك ياهبة وتعليقاتك المتميزة دوما

مع خالص تحياتي

الفارس الملثم يقول...

ياااااا طولت بالك بجد ماشاء الله عليك انا مش عارفه انت عارف كل الكلام واللى بيحصل ده وربنا مكملك بعقلك انا بقت دماغى باظت ومرارتى من بدرى ربنا يديك الصحه يا رب
بس فكرة حلوة عارف عامله زى تخاريف محمد صبحى بس تخاريف هادفه

بداية منورة المدونة دايما ياابي

ثانيا وهو في حد لسه بعقله دلوقتي , انا يمكن تقولي علي شعرة بين العقل والجنون من اللي بيحصل

ربنا يستر ومتلقيش اسم المدونة في صفحة الحوادث ولو انها كده اتشتهير

يسعدني مرورك دايما مع خالص تحياتي

الفارس الملثم يقول...

gamda mooot bgd :D bzzat...

متشكر اوي احلي حياة علي مرورك وانا سعيد جدا ان المدونة نالت اعجابك وانتظر الا تكون تلك زيارتك الاخيرة

لكي خالص تحياتي

الفارس الملثم يقول...

اول زياره واول كومنت
فكره البوست حلوه اوى

الف شكر بطوط حبوب علي مرورك الاول في مدونتي المتواضعة واتمني الا تكون تلك زيارك الاخير, فبالتاكيد يسعدني مرورك دايما وانا ايضا ساتابع مدونتك المتميزة دوما

مع خالص تحياتي

Rania Lelah يقول...

اود ان ابدى اعجابى الشديددددد
بكلماتك الرقيقة و المعبرة جدااا
اجاباتك حقا رائعة

تحياتى

الفارس الملثم يقول...

اود ان ابدى اعجابى الشديددددد
بكلماتك الرقيقة و المعبرة جدااا
اجاباتك حقا رائعة

متشكر اوي يا رانيا علي مرورك وانا سعيد جدا ان البوست عجبك ,وانتظر مرورك هنا دائما

لكي مني خالص التخية

(احمد سكر ) يقول...

والله يافارس
دى تالت مره اكتب التعليق ومش يوصل

اممممممممم

كنت كاتب كلام حو اوى

ربنا يستر ودا يوصل

بجد رووووعه

ماشاء الله عليك

اممممممم

وربنا يستر التعليق يوصل

احمد سكر

الفارس الملثم يقول...

دى تالت مره اكتب التعليق ومش يوصل

ايه النت عندك بيهنج ولا ايه


بجد رووووعه

ماشاء الله عليك


الله يخليك ده بس من ذوقك

منور المدونة يا سكر

مها يقول...

ياااااه .. أنا النهاردة باعيد اكتشافك من جديد!!

simple girl.. ..simple dream يقول...

بص بجد البوست طوييييل اووووى
بس انا -ولاول مرة فى تاريخى- كملته للاخر
يمكن عشان عاجبنى اسلوبك فى تحليل الامور
او عشان اختيارك للمواضيع
او تنقلك بسلاسة من نقطة الى اخرى
لكن من الاخ
انت شديت عينى وخليتنى اكمله رغم طوله
برافو عليك
انت اسلوبك السهل الممتنع

Moustafa` يقول...

السلام عليكم
بارع أنت فى التنقل بين الأحداث
تصميم المدونه خرافه
من قبل الرد اساسا كنت ساقر الصور بتاعتك معظمعها
انت بتنقيها حلو قوى
***
وضفتك للمفضله
واستنيت بوست جديد
بس المسرح العبثى ده متفق معاك فيه كليه
بس اراءك عن الحب والمرأه
وعن الوطن ونفسك
مش عاجبينى
انت مش عارف انت موجود ليه
ومش عارف بتحلم بايه
ويوم الاربعاء زى اى يوم
مش عارف هو كلنا بنبقى كده ف طور معين من حياتنا
بس مش دايما (ن)
اتمنى انك تبقى حاجه كبيره زى ما انا رسمتلك
انت بتكتب قصص قصيره حلو قوى على فكره
وأفكارها متنوعه وجميله
تحياتى كتير

غير معرف يقول...

زيارتي الاولي ولن تكون الاخيرة لان المدونة عجبتني اوي انا فعلا حاولت ازور المدونة اللي في التوقيع بس لقيتها مغلقة

بالنسبة للموضوع الاول مواقف بتتكرر كتير بنسمعها او بنعيشها وبنعدي عليها وكانها شيء عادي لكن لو تاملنا فيها شوية زي ما عرضتها باسلوبك لضحكنا منها فعلا او بكينا فالضحك والبكاء هنا يتساويان.

ردودك علي الاسئلة ردود كاتب متميز ويمكن اكتر الردود اللي عجبتني

"هل تجد علاقة بشكل أو بآخر بين المرأة وقطاع الطرق ؟
كلاهما لا نجد امامه غير الاستسلام باعطائه كل ما في جيوبنا " او ما في قلوبنا"

بجد هو مش مجرد رد عادي فكرني باستاذي انيس منصور واراءه

اختلف معك فقط في ان الامس واليوم والغد يتساوون , الامس ذهب والغد ربما لا ياتي واليوم بامكانك ان تحياه كما أردت وبامكانك ان تجعله مختلفا عن الامس.

تمنياتي بمزيد من الكتابات المتميزة
تمنياتي بكتابات متميزة

الفارس الملثم يقول...

ياااااه .. أنا النهاردة باعيد اكتشافك من جديد!!

منورة حضرتك المدونة ,واتمني ان يكون معني ردك ان البوست عجبك

مع خالص تحياتي

الفارس الملثم يقول...

بص بجد البوست طوييييل اووووى
بس انا -ولاول مرة فى تاريخى- كملته للاخر
يمكن عشان عاجبنى اسلوبك فى تحليل الامور
او عشان اختيارك للمواضيع
او تنقلك بسلاسة من نقطة الى اخرى
لكن من الاخ
انت شديت عينى وخليتنى اكمله رغم طوله
برافو عليك
انت اسلوبك السهل الممتنع


الف شكر حقيقي لمرورك الاول في مدونتي وقد اسعدني رايك كثيراوانتظر الا تكون تلك زيارتك الاخيرة

مع خالص تحياتي

الفارس الملثم يقول...

السلام عليكم
بارع أنت فى التنقل بين الأحداث
تصميم المدونه خرافه
من قبل الرد اساسا كنت ساقر الصور بتاعتك معظمعها
انت بتنقيها حلو قوى
***
وضفتك للمفضله
واستنيت بوست جديد

اشكرك بداية علي زيارتك الاولي لمدونتي المتواضعة واسعدني حقيقي رايك جدا

بس المسرح العبثى ده متفق معاك فيه كليه
بس اراءك عن الحب والمرأه
وعن الوطن ونفسك
مش عاجبينى
انت مش عارف انت موجود ليه
ومش عارف بتحلم بايه
ويوم الاربعاء زى اى يوم
مش عارف هو كلنا بنبقى كده ف طور معين من حياتنا
بس مش دايما (ن)

هي الاسئلة دي تحمل في طياتها اسلوب عبثي لذا حملت بعض الاجابات نفس طابع العبث او هي مزيج بين الحقيقة والعبث , يعني مثلا لو سالت مجموعة من البشر عن الوطن اتلاقي اجابات مختلفة بعضها ايتسم بالحب والبعض الاخر ايتصف بالغضب ولن تجد اجابة واحدة..

اتمنى انك تبقى حاجه كبيره زى ما انا رسمتلك
انت بتكتب قصص قصيره حلو قوى على فكره
وأفكارها متنوعه وجميله
تحياتى كتير

مش عارف كلامك مفروض يسعدني ولا يخوفني ويمكن كانت في عبارة للكاتب احمد خالد توفيق بتقول انا ابسط مما توحي به كلماتي وافضل مما يوحي به مظهري

حقيقي اسعدني ردك وانتظر تواجدك الدائم وردودك المميزة

الفارس الملثم يقول...

الف شكر سنوويت لتشريفك مدونتي واسعدني جدا انها حظيت بالقبول لديك,طبعا استاذ انبس منصور من اوائل الكتاب اللي اعجبني اسلوبهم ويضاف اليه الكاتب المتميز احمد خالد توفيق اللي اسلوبه اعجبني جدا واثر ايضا في اسلوبي

كانت تلك زيارتك الاولي واتمنيي حقا الا تكون الاخيرة

مع خالص تحياتي

قبلة الحياة يقول...

ماشاء الله ولاقوة الا بالله

روعــة اجابات كلها في الصميم

اسلوب راقي في تناسق الافكار وفي وصف واقع حياتنا المرير وفي مخاطبة ضمائر الشعوب ..

ابدعت سيدتي بانتقاء حروفك واجاباتك

دعواتي لك بدوام التوفيق ..

صحيح عايزة اقولك شيء .. خف شوية عن المرأة والله احنا طيبين وكافيين خيرنا شرنا وانتم دايما كدا متحاملين علينا .. هذا والله اني بلغت اللهم فاشهد

مع تحياتي : قائد قوات حزب يا نساء العالم اتحدن

الفارس الملثم يقول...

روعــة اجابات كلها في الصميم

اسلوب راقي في تناسق الافكار وفي وصف واقع حياتنا المرير وفي مخاطبة ضمائر الشعوب ..

الف شكر سيدتي علي تشريف حروفك سطوري ورايك بالتاكيد اسعدني جدا وانتظر زيارتك المتميزة دوما


صحيح عايزة اقولك شيء .. خف شوية عن المرأة والله احنا طيبين وكافيين خيرنا شرنا وانتم دايما كدا متحاملين علينا .. هذا والله اني بلغت اللهم فاشهد

ههههههههههه
علي فكرة انا لسه ما وصلتش لمرحلة اني اكون عدو المراة , بس انا برده شايف ان المراة بتحمل داخلها متناقضات كثيرة تقدري تنكري ده ممممممم

مع خالص تحياتي سيدتي

سنووايت يقول...

"انا بعق البحر" من اجمل الاغاني اللي غنتها "نجاة" واعادها الي الحياة محمد منير , بس انا لازلت بافضلها من نجاة اكتر..

واسمحلي بمداخلة : لا يستطيع انسان علي وجه الارض ان يكون عدوا للمرأة فهي أم واخت وزوجة وابنة , وعن موضوع التناقضات وحيرة الكثيرين في فهم ماهية المراة قريبا جدا سأكتب بوست عن الموضوع دا لأني لقيت علي مدونات كتييير نفس الرأي وهي انها بتجمع متناقضات كتير.

الفارس الملثم يقول...

"انا بعق البحر" من اجمل الاغاني اللي غنتها "نجاة" واعادها الي الحياة محمد منير , بس انا لازلت بافضلها من نجاة اكتر..

طبعا بصرف النظر عن من يغنيها فكلمات الاغنية تحمل للمستمع احساس يصعب وصفه حيث تقلبات الانسان المستمرة والتي تبدو احيانا عصية علي الفهم..

واسمحلي بمداخلة : لا يستطيع انسان علي وجه الارض ان يكون عدوا للمرأة فهي أم واخت وزوجة وابنة , وعن موضوع التناقضات وحيرة الكثيرين في فهم ماهية المراة قريبا جدا سأكتب بوست عن الموضوع دا لأني لقيت علي مدونات كتييير نفس الرأي وهي انها بتجمع متناقضات كتير.

بالتاكيد زي ما انتي قلتي المرأة هي الام والزوجة والحبيبة والاخت والابن واللي بيتخذ موقف عدائي من المرأة هو اشبه بانسان يعادي جزء من كينونته , لكن انا برده بشوف انها تحوي داخلها حالات من تطرف المشاعر الشديدة فهي تحب بشدة وتكره بشدة وتغار بشدة وتغضب بشدة دون مجال للحلول الوسط , ربما لا يكون جميع النساء لكن علي الاقل كثير منهم..

طبعا انا منتظر مقالتك عن المراة ..

مع خالص تحياتي

سيكو يقول...

اول مره ازورك
جميله قوى مدونتك
تحياتى ليك

رفقة عمر يقول...

بجد اجاباتك فلسفيه بس فيها تشاؤم كتير
بس بجد اجابات رائعه جدا
واتمنى تكون اكثر تفاؤلا
بس فعلا ليه احنا على االنت بنحب نكون مثاليين قوى اعتقد لاننا كلنا فينا الفطره الطيبه ولكن الحياه ومشاكلها بتمنعنا اننا نظهرها رغما عنا فجاء النت وجعلنا نحاول نتصف بصفات الملائكيه
حتى لو دقائق بسيطه
مدونتك اسعدتنى بجد

حمامة يقول...

فنان بجد زى ما قلت قبل كده
كل كلمة بتحصل بجد
فعلاً وما الدنيا إلا مسرحٌ كبير

تشرفت بمرورى :)

قبلة الحياة يقول...

ايها الفارس .. المفروس

جمال المرأه في تناقضاتها ( كل يوم بتكون انسانه جديدة )

ولا انت رايك ايه ؟؟!!!

الفارس الملثم يقول...

نورتاول مره ازورك
جميله قوى مدونتك
تحياتى ليك

نورتي حضرتك المدونة وانا سعيد انها اعجبتك وانتظر الا تكون تلك زيارتك الاخيرة

مع خالص تحياتي

الفارس الملثم يقول...

بجد اجاباتك فلسفيه بس فيها تشاؤم كتير
بس بجد اجابات رائعه جدا
واتمنى تكون اكثر تفاؤلا

بداية انا سعيد جدا ان البوست عجبك اما بالنسبة لحكاية التشاؤم ,فانا بالتاكيد مش شخصية متفائلة بس طبعا ده ليه اسبابه الخاصة والعامة ورغم كده فانا مش متشائم لكني واقعي لدرجةمحبطة

بس فعلا ليه احنا على االنت بنحب نكون مثاليين قوى اعتقد لاننا كلنا فينا الفطره الطيبه ولكن الحياه ومشاكلها بتمنعنا اننا نظهرها رغما عنا فجاء النت وجعلنا نحاول نتصف بصفات الملائكيه
حتى لو دقائق بسيطه


بصي هو النت فيه من الحياة برده فيه شخصيات طيبة وصادقة حقيقي وفي شخصيات بتتظاهر بالطيبة والصدق ,مفيش فيه ملايكة وشياطين لكن بشر بيحملوا كل التناقضات الموجودة في الانسان واللي بتكون بدرجات متفاوتة بطبيعة الحال

مدونتك اسعدتنى بجد

سعادتك بمرورك ورايك اكبر

مع خالص تحياتي

الفارس الملثم يقول...

فنان بجد زى ما قلت قبل كده
كل كلمة بتحصل بجد
فعلاً وما الدنيا إلا مسرحٌ كبير


الله يخليكي ده بس من ذوقك

حضرتك منورة المدونةدايما

مع خالص تحياتي

الفارس الملثم يقول...

ايها الفارس .. المفروس

جمال المرأه في تناقضاتها ( كل يوم بتكون انسانه جديدة )

ولا انت رايك ايه ؟؟!!!


والله ما مفروس ولا حاجة ولا عندي اي اراء عدائية تجاه المراة في المطلق

انا بص بشوف ان انفعالات المراة بتكون خارج السيطرة احيانا والاعجب انها ممكن ترسل للاخر رسايل متناقضة في نفس الوقت فهي ترسل رسالة الحب مثلا مع رسالة الرفض وعدم الاكتراث , ترسل رسالة الاشتياق مع رسالة الغضب وحتي الكره , ويمكن انا بلخص حالتها بهذه العبارة

لو تجسد الجنون لكان امراة

وعشان متعتبريش كلامي تحامل علي المراة اقولك ان الانسان برده محتاج لبعض للجنون للتغلب علي رتابة الحياة فلا مانع من وجود قليل من الجنون

سلوى يقول...

قرأت البوست
ولن أقتبس منه شئ وإلا اضطررت إلى إقتباسه بأكمله

بوست جميل فعلا
إجابات ماتعرفش لما تقرأها تضحك ولا تفكر
وتقول حسبنا الله ونعم الوكيل

تحياتي ودمت بكل خير

MTMA89 يقول...
أزال المؤلف هذا التعليق.
MTMA89 يقول...

صديقي العزيز محمد

أرجو أن تعذر لي انقطاعي هذه الفترة
اعجبني البوست الجديد جدا

و لكني فعلا كنت اتمنى ان تركز جهودك في تلك المدونة كمدونة أدبية

لا أدري ما السبب لكن ربما لأني لا أستسيغ السياسة الساخرة

على أية حال أتمنى لك التوفيق
و لنا لقاء عما قريب
و السلام ختام

محمد أمين

الفارس الملثم يقول...

قرأت البوست
ولن أقتبس منه شئ وإلا اضطررت إلى إقتباسه بأكمله

بوست جميل فعلا
إجابات ماتعرفش لما تقرأها تضحك ولا تفكر
وتقول حسبنا الله ونعم الوكيل

تحياتي ودمت بكل خير


حضرتك نورتي المدونة واتمن انها تكون نالت استحسانك , وانتظر الا تكون تلك زيارتك الاخيرة

مع خالص حياتي

الفارس الملثم يقول...

و لكني فعلا كنت اتمنى ان تركز جهودك في تلك المدونة كمدونة أدبية

لا أدري ما السبب لكن ربما لأني لا أستسيغ السياسة الساخرة

على أية حال أتمنى لك التوفيق
و لنا لقاء عما قريب
و السلام ختام


لا هو مفيش نية عندي احولها لمدونة سياسية بس ممكن احط مواضيع مغايرة للاتجاه الادبي كل فترة

نورتني يا محمد

سلام يا باشا

Unknown يقول...

السلام عليكم ورحمة الله وبركاته
سواءآ انا الكومنت ال42 او ال142 حاكتب برضه
وسواء شكلى حاتأخر على الشغل او لا حاكتب برضه
ممتاززززززززززززززززززززززززززه
كفايه كده؟؟؟
norahaty

الفارس الملثم يقول...

هههههههههههه

حقيقي بتسعدني كومنتاتك , ويارب متقطعيش عننا الكومنتات , حضرتك نورتي المدونة بجد..

مع خالص تحياتي وتقديري

users online