الخميس، 14 فبراير 2008

كل سنة وانتم بتحبوا بعض



ازيك يا محمد ايه اخبارك
الحمدلله
يوم الخميس ..... يوم الخميس........


اشمعنا يوم الخميس يعني

انت مش عارف ولا مش مهتم

" هو في ايه يوم الخميس عيد تحرير سيناء ولا عيد الشرطة , هو يوم 14 فبراير ده ايه اللي حصل فيه , ميكنش عيد ميلاده , لا ده عيد ميلاده كان من كام شهر بس " بقول الكلام ده في سري "

قولي بجد مش مركز

14 فبراير عيد الحب

طبعا ده كان حوار حصل ليا مع واحد صاحبي

يمكن بعضنا يعرف ايه سبب تقليعة عيد الحب دي , حكاية القديس اللي معجبوش قرار الامبراطور الوثني اللي كان بيحرم الزواج بين الجنود فكان الراجل بيزوج الجنود في السر ولما سره انكشف قام الامبراطور باعدامه في اليوم ده ..

ما علينا

طيب واحنا مالنا بنحتفل بيه ليه؟؟؟؟؟

يعني هي جت علي ده طيب احنا بنحتفل بعيد الام ليه وبنحتفل بعيد العمال ليه وبنحتفل بشم النسيم ليه , احنا من الاخر بنتلكك عشان يكون في مناسبة نحتفل بيها

طيب ليه ؟؟؟؟

هواحنا مستنين مناسبة عيد الام عشان نفتكر امنا , او احنا مستنين مناسبة عيد الحب عشان نقول لحد بنحبه احنا بنحبك بجد , وياتري الولد او البنت اللي بتجيب دبدوب او اي هدية للانسان اللي بتتصور انها بتحبه ده دليل كافي علي صدق المشاعر , وكمان الزوجة اللي بتزعل اوي من زوجها لو جه اليوم ده وهو نسي او طنش ومجبلهاش حاجة هي علي حق ..

اكيد الحب مش كلام , الحب افعال كتير بتدل عليه والانسان اللي عنده قدرة يقول كلمة الحب بسهولة لازم نشك في صدقه , لان الانسان اللي بيحب بجد مش سهل عليه يقولها .....لكن .........


احنا محتاجين نسمع كلمة الحب اوي ومحتاجين نعيش في حالة حب اوي


وكل انسان مهما تظاهر بالامبالاة وعدم الاهتمام او إن حكاية الحب دي مش في دماغه او اعتبر كلام الحب ده شغل مراهقين , هو في اعماقه بيكون بيتمني يسمعها واد ايه لو سمعها من انسان قريب منه اتأثر في اوي واتخلق جواه فيضان مشاعر واحاسيس تفوق التصور ..

كلنا محتاجين كلمة الحب من انسان بنحبه ومحتاجين نسمعها في كل وقت ونحس اننا مهمين جدا عند الناس اللي بنعزهم مش بس في عيد الحب او الفلانتين زي ما بيسموه

وكل سنة وانتم بتحبوا بعض

استضافة الملف بواسطة مركز عين الذيب

هناك 8 تعليقات:

HeBa يقول...

مرحبا

أنت عندك حق أنت مش محتاج يوم معين علشان تقول للشخص اللي بتحبه

المفروض أن أنتوا الاتنين احساسكوا واصل لبعض طول الوقت

بس زي ما قلت أحنا بنعنمل عيد أم ليه

علشان نحب أمنا بس اليوم ده بس

أكيد لا طبعا هو بس نوع من التعبير أو الرمز لحاجة موجودة أصلا

تحياتي

صحفية روشة يقول...

بص مينفعش اللى انت قولته ده
لو بتحب مكنتش قولت كدة
لكن الاختلاف فى الراى لا يفسد للود قضيه
وبعدين خلى الناس تسترزق وتبيع دباديب
انتو عمالين بتقفولها كدة ليه على الناس

MTMA89 يقول...

شفت اديك عملت بوست حلو عشان انا فكرت
انا صاحبه يا جماعة على فكرة

كلامك تمام و حلو جدا
الحب مش محتاج يوم عشان نفتكره
لكن ده ميمنعش يبقى عندنا يوم نحب فيه زيادة و لا ايه؟؟؟؟

تحياتي لك
محمد

الفارس الملثم يقول...

أكيد لا طبعا هو بس نوع من التعبير أو الرمز لحاجة موجودة أصلا

هو فعلا زي ما بتقولي يا هبة هو رمز مش اكتر والمهم اننا نعرف كده ومنستناس يوم الفلانتين او عيد الحب عشان نعير عن حبنا للناس القريبين منا

نورتي البلوج يا هبة

الفارس الملثم يقول...

بص مينفعش اللى انت قولته ده
لو بتحب مكنتش قولت كدة


مفيش انسان مش بيحب سواء كان الحب ده لانسان معين او حتي مشاعر الحب اللي بيحس بيها تجاه الناس المقربين منه سواء كانوا اصدقاء او اهل ..

وانا في الموضوع محاولتش اتخذ موقف مؤيد او معارض لفكرة عيد الحب , انا بس كنت بفكر بصوت عالي عن ان الحب مش محتاج يوم عشان نحس بيه ورغم كده اكيد لو اي انسان شخص قريب منه جبله هدية في اليوم ده وكان صادق في مشاعره وهو بيقدمها ايكون الانسان وقتها في قمة سعادته

منورة يا صفية البلوج

الفارس الملثم يقول...

لكن ده ميمنعش يبقى عندنا يوم نحب فيه زيادة و لا ايه؟؟؟؟


ههههههههههههه

فكرتني يا محمد بفؤاد المهندس في كلمتين وبس اللي كان بيجي في الراديو

كلامك صح طبعا ومنور البلوج يا جميل وكل سنة وانت طيب وبتحب

صحفية روشة يقول...

شكرا يا فارس يا ملثم

الفارس الملثم يقول...

شكرا يا فارس يا ملثم

العفو يا فندم , بس هو شكر علي ايه ,وطبعا منورة المدونة

users online