الثلاثاء، 18 نوفمبر 2008

ثرثرات ليليه


احنا كل يوم بنتعرف علي ناس , فيهم اللي بيقربوا من قلوبنا اوي وفيهم اللي مهما مر وقت علي معرفتنا بيهم بتظل في مسافه كبيره بينا وبينهم , ممكن يكون السبب منهم او احنا اللي فشلنا في فهمهم

ربنا يعلم اللي في القلوب بنقولها احيانا لما بنجد صعوبه نعبر بيها عن اللي جوانا يمكن لاننا انفسنا مش قادرين نفهم طبيعة المشاعر اللي جوانا دي .. وبرضه بنقولها ساعات لو حسينا بنبرة الشك في الانسان اللي بنوصفله مشاعرنا تجاهه .. واحيانا بتبقي وسيله للهروب من اننا نبوح بحقيقة مشاعرنا


ليه ساعات كتير بنحس بدموع كتير جوانا خنقانا نفسها تنزل مش عارفين ليها سبب او يمكن عندنا اسباب كتير للدموع بس احنا كنا عاملين نفسنا اننا مش واخدين بالنا لكن في لحظه بيتجمع الحزن اللي جوانا علي شكل غمامه مستنيه المطر



دايما كنت بحلم يكون عندي جناحين احلق بيهم في السما , لكن دلوقتي بقيت احلم اسيب الارض كلها , معرفش اروح فين لكن المهم ابعد عن الارض لاني بقيت احس اني مليش مكان فيها


كنت زمان وانا صغير بحلم الاقي مصباح علاء الدين واطلب منه يجبلي فلوس كتير اوي يمكن اقدر احقق بيها السعاده لناس كتير اوي لكن لما كبرت لقيت ان الفلوس وحدها مش هي اللي ممكن تحقق السعاده , السعاده صعبه اوي وممكن كمان تكون سهله اوي , احنا ممكن ندور كتير وملقهاش وممكن نكتشف انها حوالينا واحنا مكناش واخدين بالنا


حد مره سالني ازاي بنحس بالوحده واحنا حوالينا ناس كتير, معرفتش ساعتها اجاوب علي السؤال , لاني برده كنت بدور علي اجابة لنفس السؤال


دوخيني يا لمونه ..لعبه كنا بنلعبها واحنا صغيرين , ان حد كبير يمسكك من ايدك ويقعد يلف بيك لغايه لما تدوخ وكنا بنبقي في قمة سعادتنا ساعتها , لكن لما كبرنا اكتشفنا ان الدنيا بتلعبها معانا دايما

هناك 73 تعليقًا:

GiGi world يقول...

انا اول تعليق
كويس بجد انا سعيده قوي برجوعك جدا جدا جدا ويارب تبقى اجازه حلوه
ويارب تنور دايما ويوفقك لكل خير ياااااارب

بنت الماضي يقول...

مش عارفه ليه مع اني فرحانه ان حضرتك رجعت تكتب تاني وتدون
بس التدوينه طالعه غامقه اوي وزعلانه اوي وبتدمع
يارب اكون فهمتها غلط
ومبروك رجوعك تاني
منتظرين جديدك

blue-wave يقول...

بنحس بالوحدة لأننا وحيدين داخل انفسنا
لذا نحس بها حتى لو وسط الناس
عندما تفتقر الى من يفهمك
عندما تفتقد من يحس بك
حتما ستحس بالوحدة
حتى لو وسط الاف البشر
تحياتى لرجوعك

mohamed ghalia يقول...

حبيب قلبى
بجد سعيد قوى وفرحان بعودتك
ربنا يسعدك دايما يارب
رغم الكلمات الحزينة دى
بس واضح إنك بتخرج فيها حاجات مريت بيها الفترة الى فاتت
ربنا يسعدك
وإنتا هنا فى وسط حبايبك
الله يعلم إنى كنت تقريبا يوميا أدخل وأحيانا تكون كتبت بس مش فاتح التعليقات
الحمد لله انك رجعت
تحياتى

saragebaly يقول...

تعبيرات جميلة ممزوجة بمشاعر حزينة واشتياق شديد للحظات الطفولة

أسعد الله ايامكواسعد قلبك

حمدلله على السلامة نورت عالم التدوين

سارة

المستنصر بالله يقول...

كلنا عاوزين نسيب الدنيا بس مش عارفين نروح فين
نسال الله ان يخرجنا منها على خير لا لنا ولا علينا

تحياتى

مجداوية يقول...

السلام عليكم
فرحة من القلب لعودتك أخى الكريم محمد
وأشكر زيارتك الجميلة واعلامى بعودتك بطريقة غير مباشرة بس معلش رجع كيس البرتقال أنا بأدير كده لقيتك خدته وانت ماشى
العالم بقت شح يا حضرت
:)
:)
:)

نرجع للتدوينة العالية الاحساس والعالية الحيرة والعالية الشجن
التدوينة دى تيار ضغط عالى
حيرتك وغربتك مع الدنيا كلنا مرينا أو بنمر بيها أو حنمر بيها
لكن ده مؤشر خير
لأنك انسان غير لاهى ولا غافل
لو غافل مكنتش حسيت بالغربة ولا الحزن
دى مرحلة تمهيدية للبحث عن الذات وكل واحد وله طريقة فى البحث
وكل واحد بيمشى طريق اختاره ورجله بتوديه ليه
أنا طريقى حكيت عنه فى تدوينى حب رسول الله غير حياتى وكنت زيك كده الأمور كلها متلخبطة عندى
طبعا مش شرطاللى ريحنى وأرجعلى نفسى يكون يتاسبك
لكن أنا سمعت ناس كتير مروا بنفس التجربة ولقوا نفسهم وأحسوا بالسعادة المفقودة واستوطنوا وطن جديد لا يشعروا فيه بالغربة وفى معية لا تما منها أبدا
فكن دائما مع الله
حتى وأنت بين الناس فوقتها وحدتك وهم حولك ستشعر أنها محمية وأنها واحة وسط الصحراء

نورت مكانك وأسعدتنا بعودتك
أسأل الله أن يفرح قلبك دائما ويعطيك كل ما تتمنى ويذهب عنك الدوخة والحيرة والغربة

بنت القسام يقول...

جميله الصور
قوى الاحساس
رائع البوست


بنحس اننا وحيدين لاننا بنكون واحدين في مشاعرنا .افكارنا او مش لاقين حد يسمعنا ... بنحس اننا وحيدين لاننا وسط مليون شخص وشخص مش قادر يوصل للاحساس الى يجمعنا


ياريت الواحد بجد يعرف ايه الي بيربط الناس ببعض اوى كدة

تحياتى

فارس بلا جواد يقول...

حمد لله علي السلامه
ربما تكون فترة الغيبة الطويلة قد أتاحت لك فرصة في التأمل لكتابة مثل هذا البوست .. رغم استخدامك للهجةالعامية لكنني شعرت بكثير من المعاني الغارقة في التأمل بالحياة ومحاسبة النفس .. شعرت ان الكلام قد كتب بعد تفكير عميق وبنظرة مختلفة لبعض الأشياء الرمزية في حياتنا .. لذا أري ان هذا البوست من الافضل أن يقيم بمعناه ومضمونه
عود حميد وانتظر منك الابداع دوما
تحياتي

Unknown يقول...

للاسف الحياة ليست سهلة
وبها الكثير من المضايقات
عودا حميدا وربنا يبعد عند الشر

نـــــور يقول...

الف حمد الله على سلامتك يامحمد
وانا اقول بلوجر منور ليه اتارينى رجعت :)
بجد عود احمد ولو انى زعلانه لتن جو البوست مش عاجبنى رغم انى اتفق مع كل كلمه فيه
تحياتى ليك دايما
مدونتك غاليه ماتغيبش تانى :)

مدينـة من النسـاء يقول...

أوقات بتكون القسوه أصعب بكتير من إننا نترجمها
وأوقات بيكون الإنسان أبسط كتير من مجرد كلمه
وأوقات بتكون دمعه واحده مرغرغه فى عنينا أحر وأوجع من دموع بتجرى وحفرت طريقها بين ملامحنا
أوقات بيكون القلم قادر أنه يشيل عننا حروف مش قادرين ننطقها
وأوقات بيقف ساكت مش عارف يترجمها
أوقات بتكون الخنقه كلمه
مش مجرد إيدين بتقيد روحنا
يمكن لما الروح بتخرج مش بنحس إلا بحضن التراب
إنما لما الكلمه بتخنق وبتفضل جوانا ,, بنموت الف مره كل مانحس بيها
وأوقات بتكون السعاده جوانا اوى مش بس حوالينا ومع كده ملامحنا حتى مش تشوفها ومش قادرين نحس هى ساكنه فين فينا

ثرثرة ليليه خدتنى بجد لرحله غريبه جوايا وسابتنى بين حروف كتيييييييير خلتنى اكتب احساسي دا
ودا طبيعى من بعد كلامك والأجمل أنه يكون دا اول كلام بعد رجوعك من تانى

تحياتي ليك ...

آيــة يقول...

وجعتني كلماتك .. أو للصدق تداعت بسببها لدي كم من الذكريات غير المحببة ...........
بقول لنفسي ان الدنيا اد كده فيها ألم و اد طده فيها ما يشعرنا بالعربة و الوحدة ... لنشتاق للجنة ... فنصبر

و هو احنا قدامنا غير الصبر اصلا ؟ و الاشتياق للجنة ؟

حمدلله على السلامة يا فندم
:)

صاحب المضيفة يقول...

ربنا يسعدك ويخرجك من شعور الوحدة القاتل ده

جميل وانت تكتب بالفصحى وجميل وانت بتكتب بالعامية كمان

ربنا يزيدك من نعيمه وعلمه وفضله

كل التحية يا جميل

رؤية يقول...

ترجمتها الفرق بين مرحلتى الطفولة والنضوج...
وللعجب نتلون تدريجيا بالوان الحياة المتعددة فنصير كما تكون انت بعد ان كانت الحياة ليس بها سوى اللونين الابيض والاسود

احيانا الالوان تدل على الجمال واحيانا تدل على اخفاء ما تحت الظاهر...

فضفضة جميلة

تحياتى لك.

محمد فاروق الشاذلى يقول...

أخى العزيز / محمد
حمدا لله على السلامة وإن شاء الله ماتغبش عننا تانى أبداً.
ليه حاسس إن جواك قلق واضطراب، ياترى ده ليه علاقة بفترة الغياب.

عايزك تعرف إننا موجودين علشان نكون جنب بعض، ماتخليش حاجة تقلقك

Unknown يقول...

السلام عليكم ورحمة
الله تعالى وبركاته
حمدلله على السلامة ياصاحبى
الف حمدلله على السلامة يامحمد
مش حاقول غير حمدلله على السلامة
يامحمد ياصاحبى وصديقى وجارى
فى عالم التدوين والمدونات
وزى ما صديق عزيز قال
بنملك الدنيا لكن
ما نملك انفسنا
بالتالى لحظات
الفرح
والشقاء مش
يأدينا! ده قدر
ومكتوب علينا ياصديقى
يامحمد
ياصاحبى

حمامة يقول...

ليه ساعات كتير بنحس بدموع كتير جوانا خنقانا نفسها تنزل مش عارفين ليها سبب او يمكن عندنا اسباب كتير للدموع بس احنا كنا عاملين نفسنا اننا مش واخدين بالنا لكن في لحظه بيتجمع الحزن اللي جوانا علي شكل غمامه مستنيه المطر


ياااه كتير اوى
وساعات بتكون ف اوقات لازم تكون مبسوط فيها او مفيش سبب يخليك تبكي
بس زى ما يكون الحزن سكننا وملازمنا حتى ف اكتر الاوقات فرح لينا



السعاده صعبه اوي وممكن كمان تكون سهله اوي , احنا ممكن ندور كتير وملقهاش وممكن نكتشف انها حوالينا واحنا مكناش واخدين بالنا


يمكن نكون بندور عليها ف المكان الغلط
ويمكن هي موجودة بس قوة خفية جوانا عايزانا منشوفهاش ونفضل حزنانين




دوخيني يا لمونه ..لعبه كنا بنلعبها واحنا صغيرين , ان حد كبير يمسكك من ايدك ويقعد يلف بيك لغايه لما تدوخ وكنا بنبقي في قمة سعادتنا ساعتها , لكن لما كبرنا اكتشفنا ان الدنيا بتلعبها معانا دايما

بس وقتها مبنكونش ف قمة السعادة
بالعكس تماماً ..




عودٌ أحمد وغالي :)
انا كان نفسي والله اكون من اللى سألوا
بس مكنتش عارفه اسأل ازاى
بس عديت كتير
منور :)

aya يقول...

اولا حمدلله علي السلامه بالرغم ان الغيبه طولت شويه وحتي التعليقلت كانت مقفوله
ثانيا :البوست ده حزين صح؟انا حسيت كده.بس ليه الحزن ؟
كتير ممكن نحساننا وحدنا في الدنيا يمكن لاننا مركزين علي حد معين منتظرينه يكون جنبنا وبالرغم من عدم وجوده في ناس تانيه بتحاول تكون جنبنا يمكن مش بنسمحلها ويمكن مش متقبلنها ويمكن مش طيقنا بس في الاخر بنحس بالوحده
بالنسبه لمصباح علاء الدين بالرغم من ان الفلوس مش هتجيب السعاده بس بالنسبه لبعض الناس الي حالتهم تحت خط الفقر بمراحل الفلوس هتحللهم مشاكل كتير ...ويمكن القليل منها
دوخينيي يالمونه ....ا الدنيا ممكن تلعب معانا كده بس احنا الي بنسمحلها وفي ادينا نستمتع بالعله زي زمان \
اتمني البوست يكون مجرد كلام وميكونش احساس بالحزن ونابع منه الكلام
تحياتي
د.ايه

شهد الكلمات يقول...

ازيك يا محمد حمد الله ع السلامة

مش هاقول غير ان كل اللي كتبته ده انا حاسة بيه و حاسة بيك جدا و عارفة انت بتفكر في اية دلوقت و حاسس باية و يظهر ان ماطلعتش لوحدي اللي عايزة تفارق الدنيا
ربنا يصلح الحال

تحياتي

حبيبة الروح يقول...

هو البوست حلو يمكن افكراك مش مرتبه
بس الجميل الي فيه انك بتكتب الي جواك وخلاص
زي حالاتي يعني
حمدلله علي سلامتك البلوجر نور من تاني يا محمد

مهرة سالم يقول...

مرحبا بعودتك......
............
السعاده صعبه اوي وممكن كمان تكون سهله اوي ....
السعاده تختلف باختلاف وجهات النظر...
الكل سعيد ......
بإختلاف الدرجات .......
...........
ودوخيني يا لمونه...
........
دمت بخير...

د. إيمان مكاوي يقول...

إلتقطت مشاعر كلنا نمر بها وأبرزتها ..لكي نراها معك
الوحده في وسط الناس بنحس بيها لما نفتقد الاليف والونيس ومن يفهمنا
والدنيا مدوخانا كلنا ..علشان كده إسمها دنيا

Kiara يقول...

الوحده عمرك ما هتحسها لو مش حاسس بحب الناس ليك

هتفضل حاسسها طول ماانت عازل نفسك عن نفسك

منى يقول...

دايما عندنا الاسباب ولما حد يسالنا نقول منعرفش مش بنكدب عليهم
لكن بنخبى على نفسنا

غالبا اللى بيحلم يطير فى السما بيحب البحر اوى عشان فى الحالتين بعيد عن الارض

مش بحس بالوحده غير وانا وسط الزحمه والدوشه
يمكن عشان ساعتها بنحس ان مفيش حد من كل الناس دى معانا بجد

يمكن لسه بندوخ نفسنا دلوقتى جايز عشان نقول للدنيا بيدى لا بيد عمرو

عوده مليئه بالشجن اتمنى قدوم موجه فرح غامره سريعا
تحياتى

kmt يقول...

السلام عليكم ورحمة الله وبركاته

السعادة؟
ازاي يعني اكون سعيد ؟
لما عملوا احصاء للمصرين هما سعداء ولا لاء لقوا ان الشعب المصري اسعد شعب في العالم
ههههههههههههههههههه
صدق او لا تصدق

من رأي ان السعادة ملهاش غير طريق واحد الايمان والرضا بس مع السعي للافضل .

بس في مشكلة اوقات احس ان الحاجات دي موجوده جوايا فعلا وبكون فعلا مش هاقول سعيده يعني بضحك والكلام دا بس كويسه تقدر تقول بلغة الكمياء متعادلة

بس في اوقات كتيييييييييير الايمان والرضا دا بيهربوامن بين ايديا

وتحس كأنك شحنتين متماثلتين في سلك واحد
يعني من الاخر بتحصل جو الواحد قفلة

طولت عليك

تحياتي
الي اللقاء

آخر العنقود يقول...

حمدلله عل السلامة
ويارب تكون افضل دلوقتى
فترة غياب وعودة بكلمات متفرقة
كل واحدة اصعب واصح من الاخرى
وهوه ده حال الدنيا
انت قلتها فى النهاية
تدوخ كل اللى يحاول يفهمها

دمت بكل الخير

Rania Lelah يقول...

الف حمدلله لعى سلامتك يا محمد
بجد ليك و لمدونتك وحشة كبيرة
ديما بعشق ثرثرتك
بحسها قريبه من شخصيتى اوى اوى

حمدلله على السلامه تانى و متغبش عننا تانى

تحياتى
اختك رانيا

وردشان smilyrose يقول...

اتعلم ايها الفارس الملثم

اننى تلك الفترة احس باختناق وضيق

من الحياة وكم ابحث عن مخرج منها

ولكننى اقف عاجزة امام تلك الاحاسيس

وكم سالت نفسى لما يحدث لنا كل تلك

الامور ولما نحن نعانى فى تلك الحياة

اسئلة كثيرة بلا اجابات ولكنها

حياتنا نحيا بها ولا نعرف الى اين

المآل سوى لقائنا المرتقب للرجوع

الى بدايتنا

كأنك جئت فى موعدك مع الامى

دمت ايها الفارس الملثم

smilyrose

روح الحب الصادق

kochia يقول...

اولا منور
_____________________
ثانيا
الارواح بتتقابل تتفق او لا .. لو اتفقت شوية وبعدين رجعت تختلف يبقي انت لم تتفق في الاساس
_____________________
عشان جوانا دموع لازم نحس بدموع
الدموع جزء من احساسنا
_____________________
الارض ام
منقدرش نبعد عنها .. حتي لما نموت .. هنندفن فيها
حبها تاني عشان تحبك
_____________________
السعادة في الرضا بما قسمه الله .. والكفاح في الحياة .. لكن دول احينان بيكونوا شئ صعب
نجتهد شوية عشان نوصل لها .. السعادة ..
______________________
وبنحس بالوحدة واحنا حوالينا ناس عشان بنكون مفتقدين حد معين لعينة في اللحظة دي .. مش موجود
______________________
انت بقي اللي دوختني يا لمونة النهاردة
مالك ؟؟

الفارس الملثم يقول...

ربنا يخليكي يا جيجي , ومتشكر اوي لسؤالك

نورتي بجد

مها يقول...

عودة جميلة أيها الفارس الملثم

ويبدو أننا جميعاً مثلك ننتظر اجابات كثيرة عن أسئلة أكثر..


كل أماني السعادة والونس الجميل الدائم

الفارس الملثم يقول...

بنت الماضي

ماهي دي الدنيا كده معانا يا ايمان بعض ابتسامات وكثير من الدموع

نورتيني

الفارس الملثم يقول...

blue-wave

بالتاكيد يا عمرو الوحده تكون نابعه من داخلنا من افتقادنا لروح حقيقيه تشعر بمتاعبنا واوجاعنا

نورتني يا باشا

الفارس الملثم يقول...

mohamed ghalia

ربنا يخليك يا محمد ,ده بس من ذوقك , وربنا يديم الود

نورتني بجد يا باشا

الفارس الملثم يقول...

saragebaly

ربنا يخليكي يا ساره ومتشكر اوي لذوقك

نورتي بجد

الفارس الملثم يقول...

المستنصر بالله

يارب فعلا يخرجنا منها باقل متاعب

نورتني يا باشا

الفارس الملثم يقول...

مجداوية

ربنا يخليكي يا سيده مجداويه , وانا ممتن جدا لمرورك وكلامك الجميل الذي طالما اسعد جدا به

نورتيني بجد

الفارس الملثم يقول...

Gilan

اصعب وحده هي الوحده بين ناس تعرفهم لكن عما بعاد اوي مش بالمسافه لكن بالمشاعر

نورتيني بجد يا جيلان

الفارس الملثم يقول...

فارس بلا جواد

ربنا يسلمك يا فارس ومتشكر اوي لكلامك , انا يمكن كتبته بالعاميه عشان يوصل اسرع للقارئ

بجد دايما منورني يا فارس

عالم ماريونت يقول...

عزيزي محمد
بعد التحية والسؤال على صحتك والاعتذار عشان بقالي كتير مجيتش عندك
ــــــــــــــــــــــــــــــ
في ناس غامضةوديما بترتدي نضارة سودا
هي كدة مش عايزة حد يعرفها
ودايما بتخلي شخصية براها هي الل بتنكلم على لسانها
بس سدقني
دايما في حد بيقدر يقتحم الشخصية دي
ــــــــــــــــــــــــــــــــــــ
الدموع:
اه فعلا: عارف لما بيكون جواك احساس بالخنقة وخايق تحنق كل اللي حواليك؟
تحبس دموعك واحساسك جواك وتبتسم ابتسامة عريضة مفيش ليها اي معنى؟
ابتسامة بلاستيك...بس بترضي اللي حواليك..المشكلة بقى انك اكيد ونتيجة للكبت اللي حصل ده..هتنفجر في وشهم على اتفه سبب...وقتها هيقولو عليك مجنون لأن مفيش حاجة تستاهل..هما برضة صعب يفهموا ان مش السبب التافه ده اللي خنقك...يمكن لأنهم مش فاهمينك اصلا
ـــــــــــــــــــــــــــــ
لية احساس الحزن اللي انا حاساه المرة دي؟
لية حاسس انك مش عايز تعيش على الارض؟
بيتهيألي انك لازم تضبط علاقتك بربنا
ــــــــــــــــــــــــــــــــ
السعادة من وجهة نظري موجودة دايما حوالينا...مع الناس اللي بنحبهم..والحاجات اللي بنحبها..والاكلات اللي بناكلها...والناس اللي بنحاول نساعدهم...المشكلة ان عينينا ممكن متكونش شايفة السعادة دي...وللأسف.. معظمنا مش بيشوف السعادة دي غير لما بتروح منه
ـــــــــــــــــــــــــــ
بنحس بالوحدة لأنها جوانا احنا...الانسان اللي حاسس بالدفا حواليه بيحسة جوا قلبة الاول ..واللي حاسس بالوحدة بيحسها جواه الاول
عشان كدة ممكن تكون وحيد وسط الناس
وممكن تكون من غير ناس...وحاسس بالدفا
ــــــــــــــــــــــــــــــ
مكنتش بقدر افهم(ولغاية دلوقتي) ياترى لية كنا بنحس بالمتعة من الدوخة؟
اكيد في فلسفة ورا كدة
نبقى نناقشها وقت تاني
ـــــــــــــــــــــــــــــــ
بوست مميز جدا
وراااااااائع
مع ان لمسة الحزن دي مش مريحاني
بس كلنا كدة
اختك رنا

الفارس الملثم يقول...

نهر الحب

متشكر اوي لمرورك وتعليقك , وحضرتك نورتيني

الفارس الملثم يقول...

habiba

ربنا يخليكي يا حبيبه , دايما كده منوراني , وانتي كمان بلاش البوستات الحزينه والغياب ممممممممم

تحياتي دوما

الفارس الملثم يقول...

مدينـة من النسـاء

في كلامك عبرتي عن احساسيس كتير جوايا

أوقات بتكون القسوه أصعب بكتير من إننا نترجمها
وأوقات بيكون الإنسان أبسط كتير من مجرد كلمه
وأوقات بتكون دمعه واحده مرغرغه فى عنينا أحر وأوجع من دموع بتجرى وحفرت طريقها بين ملامحنا
أوقات بيكون القلم قادر أنه يشيل عننا حروف مش قادرين ننطقها
وأوقات بيقف ساكت مش عارف يترجمها
أوقات بتكون الخنقه كلمه
مش مجرد إيدين بتقيد روحنا

الف شكر ليكي بجد , ودايما منوراني بتعليقاتك التي تلمس داخلنا

الفارس الملثم يقول...

آية مش هنا

الدنيا هي دايما مكان للالم والابتسامات فيها هي الاستثناء

حضرتك نورتيني بجد

الفارس الملثم يقول...

صاحب المضيفة

ربنا يخليكي يا باشا , ده بس من ذوقك

نورتني بجد

الفارس الملثم يقول...

رؤية

احيانا الالوان تدل على الجمال واحيانا تدل على اخفاء ما تحت الظاهر...

معك كل الحق , حضرتك نورتيني

الفارس الملثم يقول...

قلب مصرى

ربنا يخليك يا محمد , ومتشكر اوي لمشاعرك الجميله دي , وطبعا ده المتوقع منك

نورتني يا باشا

الفارس الملثم يقول...

norahaty

ربنا يخليكي يا دكتوره , وطبعا عندك حق احنا مش بنختار قدرنا , فالسعاده والالم مقدر لنا مهما تصورنا في قدرتنا علي الاختيار

منوراني كده دايما يا دكتوره

الفارس الملثم يقول...

حمامة
متشكر اوي يا حمامه علي تعليقك الجميل ده , وانتي عبرتي عن كتير من اللي اقصده, خاصة في لعبة دوخيني يا لمونه هي دلوقتي بقت مميته مش بتحمل سعاده لينا زي ما كنا صغيرين

نورتيني بجد يا حمامه

الفارس الملثم يقول...

aya

انتي ممكن تشفيه حزين او تشوفيه مجرد فضفضه , بس هو الحزن هو الشئ الاصدق في حياتنا حتي لو كان غلط نخليه يسيطر علي مشاعرنا بس هو شئ مش باختيارنا

نورتي بجد يا ايه

الفارس الملثم يقول...

شهد الكلمات

هي وصلت لفراق الدنيا , ليه بس كده ,يلا حددي ميعاد ونعمل انتحار جماعي هههههههههههه

كل شده وبيجي معاها الفرح وربنا يعلم بالامنا وهو دايما ليه حكمه من المحن اللي بنمر بيها

ربنا يخفف عنك وعننا كلنا يا شهد

نورتي بجد

الفارس الملثم يقول...

حبيبة الروح

الله يسلمك يا مي , هو مش بيعبر عن فكره واحده , هو اقرب لفضفضه بتضم افكار لا يوجد بينها رابط

نورتي بجد يا مي

الفارس الملثم يقول...

M.K

السعاده دايما نسبيه لكن كل الناس بتتمني تحصل عليها ,في اللي بيحس انه حققها وفي اللي طول عمره بيدور عليها

نورتيني

الفارس الملثم يقول...

إيما ( أم البنين)

عندك حق هي دي طبيعة الدنيا

حضرتك نورتيني بجد

الفارس الملثم يقول...

مولان

مش شرط عدم احساسنا بحب الناس , في وحده بتكون نتيجة اغتراب حتي عن نفسنا

نورتيني يا مولان

الفارس الملثم يقول...

منى

ههههههه اهو بضحك هو يبقي كده حققت طلبك اصل الجي ايكون غم بزياده ممممممممم معلش استحملوني بقي

نورتيني بجد يا مني

الفارس الملثم يقول...

kemet

ههههههههه حلوه تعبير قافله دي , وانا بقول النور قاطع كتير عندي ليه كده

طبعا كلامك صح جدا ومشكلتي ان الاسلاك كلها عندي عاوزه تتغير ممممممممم

نورتيني بجد

الفارس الملثم يقول...

آخر العنقود

تسلمي يا اماني , الحمدلله علي كل شئ , ماهي الدنيا كده محاولة فهمها درب من المحال

نورتيني بجد يا اماني

الفارس الملثم يقول...

Rania

ربنا يخليكي يا رانيا , ومتشكر اوي لذوقك

ان شاء تكوني بقيتي احسن دلوقتي ,والف سلامه ليكي

تحياتي دايما

الفارس الملثم يقول...

smilyrose

ماهي الحياه كلها عباره عن اسئله بلا اجوبه او اجوبه مسالنهاش , هو قدرنا اللي علينا نعيشه وليس امامنا غير الدعاء والرجاء من الله ان يخفف عنا من من متاعبها

نورتيني بجد يا سميلي

الفارس الملثم يقول...

kochia

اعتبر تعليقك ده تفاؤل وتصالح مع الحياه ولا واقعيه ولا محاوله رؤية الحياه ببساطه , ايا كان فحقيقي نورتيني يا كوتشيا , نفسي تختاري اسم اسهل شويه هههههههه

تحياتي

الفارس الملثم يقول...

نتمني فعلا اننا نلاقي اجوبه لاسئلتنا , نورتيني بجد يا مها

الفارس الملثم يقول...

يوميات نائمة في الأرياف

متفق مع اغلب كلامك يا رنا , الوحده بتكون لما القلب يفقد الدفا او كمان مش يحس ان في قلوب تانيه حسه باللي جواه , الدموع بتبقي جوانا من غير اسباب او الاصح اننا عاجزين اننا نتعامل معاها فنتظاهر بتجاهلها لكن وجودها جوانا بيخنقنا

احنا عاوزين نسيب الارض لان قلوبنا تعبت من تقل الحزن اللي ماليها

نورتيني بجد يا رنا

Unknown يقول...

السلام عليكم ورحمة
الله تعالى وبركاته
حابه ورايده اصبح
عليك صباح الفل
يامحمد
ياصاحبى
نهارناابيض
إن شاء الله
تعالى عز وجل

الفارس الملثم يقول...

norahaty

اجمل صباح ليكي يا دكتوره , دايما كده منوراني , ودايما تكوني في خير حال وصحه

أميرة الاحزان يقول...

ليه ساعات كتير بنحس بدموع كتير جوانا خنقانا نفسها تنزل مش عارفين ليها سبب او يمكن عندنا اسباب كتير للدموع بس احنا كنا عاملين نفسنا اننا مش واخدين بالنا لكن في لحظه بيتجمع الحزن اللي جوانا علي شكل غمامه مستنيه المطر


دايما كنت بحلم يكون عندي جناحين احلق بيهم في السما , لكن دلوقتي بقيت احلم اسيب الارض كلها , معرفش اروح فين لكن المهم ابعد عن الارض لاني بقيت احس اني مليش مكان فيها ...

بجد كلماتك حلوووووووووووووووووة اوووووووى .. تسلم ايدك

و عود حميد ...

الفارس الملثم يقول...

أميرة الاحزان

انا سعيد جدا ان كلماتي عجبتك

نورتيني بجد

مجداوية يقول...

السلام عليكم

الفارس المبدع
أخى محمد
أولا كل عام وأنت وأسرتك الكريمة بخير
ثانيا لماذا هذا الحصار واقفال المعابر اليك ألا يكفى اقفال المعابر بيننا وبين اخواننا فى غزة ولكن الحمد لله أن تركت هذا المعبر,,, ربنا يفرج همك وكربك أخى الكريم لأنى أحس أنك تعانى من شىء ما ولكن كلمة صادقة كل شىء يهون فى هذه الدنيا فكل الى زوال فلا ترهق نفسك معك وتمتع بما لديك وهو كثير والحمد لله فمشاعرك الطيبة تشير الى انسان خير به الكثير من الفضائل أدامها الله عليك

أما بالنسبة لآخر قصة قلوب تطلب الغفران فقبل نهايتها ذكرتنى بشدة برواية حذارى من الشفقة ولكن بشكل حديث ولكن جاءت النهاية فطرحت موضوعا غاية فى الأهمية وهو العلاقات بين الشباب على النت وأن قصص الحب قد تكون خدعة كبرى ولا تعرف من تلوم هل تلوم الشاب الذى يخدع أم الفتاة على سذاجتها ومن النهاية التى وضعتها وجد أنه قد يكون هناك سببا للخداع ولكن من يفعل ذلك من باب التسلية أو الزهو أو حتى الرهان كلها دلائل تشير على ضياع الانسان وابتعاده عن الله وعدم خشيته فاستحضار وجود الله يمنعنا أن نؤذى غيرنا ولا أريد أن احول قصة عاطفية الى خطبة الجمعة ولكنها فعلا الحقيقة

ولكن اذا استحضر البشر وجود الله ما كنت كتبت قصتك وما وجد المؤلفون مادة خصبة لمؤلفاتهم فمصائب قوم عند قوم فوائد

كل عام وأنت بخير وعيد سعيد ان شاء الله
وأسأل الله أن يحقق لك كل ما تتمنى انه قادر على كل شىء

محمد حمدي يقول...

الله يرحمك يا محمد

Unknown يقول...

الف رحمة ونور لك
ياصاحبى يامحمد
زوارك اليوم
وحتى الان
212
لا آله الا الله
سيدنا محمد رسول الله
صلى الله عليه وسلم

مدينـة من النسـاء يقول...

رحمة الله عليك بعدد قطرات المطر

umzug يقول...

Thanks to topic

users online