الخميس، 24 يوليو، 2008

الخوف




بداية قبل تناول هذا الموضوع احب ان اطرح سؤال هل الخوف غريزه يولد بها الانسان , ام انها شئ مكتسب يكتسبه الطفل من خلال رصده ردود افعال الاخرين تجاه الاشياء المختلفه ام انها الاثنين معا ؟

الخوف من الظلام


كل طفل عادة يمر بمرحلة الخوف من الظلام وغالبا ما يتغلب عليها وان كانت بدرجات متفاوته ..

وانا صغير كنت بخاف اوي من الضلمه , كان لما النور يقطع احس وكأن في اشياء بتتحرك في الضلمه وبيجيلي تصور غريب ان الضلمة د بتضغض علي عيني واني مش اقدر اشوف تاني..

يمكن مش فاكر اوي ازاي اتغلبت علي الخوف ده , لكن اتذكر وانا في ابتدائي قريت ان حدقة العين لما تقل الاضاءة اوي بتتسع تدريجيا وانك لو انتظرت بعض الوقت في الظلام اتبتدي الاشياء اللي حواليك تظهرلك بالتدريج , يمكن اكتشافي صدق هذه الحقيقه العلميه خلي الضلمة بتخوفنيش , علي العكس لما النور يقطع بحس براحة وسكينه وهدوء غريب ومفاجئ , اشبه بناس كتير كانوا عاملين دوشه وسكتوا فجأه بدون مقدمات

الخوف من الحشرات



هي يمكن مش خوف بالمعني المعروف للكلمة , لكن اشبه بقرف وقشعريره من نوعيه معينة من الحشرات تولد خوف وهلع شديد , ويجئ عم صرصور علي رأس هذه الحشرات

ربما لا ادعي اني تغلبت علي هلعي تماما من عائلة الصرصورات , لكني بالتاكيد لا اصاب بنفس درجة الهلع التي كانت تصيبني عندما كنت صغيرا

وربما لي قصة مازلت اتذكرها مع عائلة الصراصير عندما كنت صغيرا ساحكيها لكم

كانت ليلة ليلاء واشعة القمر الفضيه تتسلل من نافذة المنزل ...... هو كده انا بحكي فيلم رعب ولا فيلم رومانسي ... سيبكم من الدخل هدي وتخيلوا انتم المشهد..

الحكاية طبعا بدأت مع الصيف وتوالت الافواج السياحيه الصرصوريه الي بيتنا العامر للتصييف طبعا , واتخذوا من المطبخ مكان لنصب الخيام .. وفشلت كل انواع القاذفات من شباشب والجزم في اجلاء المستوطنين الجدد , وتم مناقشة تلك المسأله الخطيره علي مستوي القمة , واخيرا قرر المجلس الحربي اللجوء مضطرين لوسيلة لم يجدوا مفرا من اللجوء اليها , الا وهي الحرب الكيماويه مممممم

وتم وضع الخطه المحكمه واطلاق السلاح البيرسولي واغلاق كل منافذ الهرب من المطبخ ... كانت مجزره بشعه ولا مذبحة محمد علي للمماليك في القلعه ......... رغم ان الخطت كانت تتم بنجاح لكن واضعوا الخطة لم يفطنوا للثغرات الامنيه الموجوده في المطبخ مممممم

يعني من محاسن الصدف ان الاوضه اللي بنام عليها , وانا علي فكره بنام علي الكنبه , بحبش انام علي السراير " غاوي اتعب نفسي من يومي " كانت تلاصق المطبخ تماما , وبدأت الاسراب الطائره والزاحفه تقوم بعملية الهروب الكبيره للنجاه ..

وعلي راي استيفان روستي ..نشنت يا فالح ......... اخذت الاسراب التي تعاني من حالة عدم اتزان وعدم تحديد اتجاهات تتوالي الي الحجره .. وما ادراك بصرصور سكران سكر بين , وكانت دي الليلة الليلاء بجد لاني لم يغمض لي جفن الا مع خيوط الصباح عندما تاكدت ان والدتي تولت عملية نقل الجثث والقضاء علي الجرحي

الخوف من المجهول " اشتاتا اشتوت "


العفاريت او الاشباح هي احد المخاوف التي تلقي رواجا في كل بلاد العالم , فما اكثر القصص او حتي الاساطير التي ترتبط بالاماكن خاصة تلك التي حدثت فيها حوادث داميه

لكن في مثل بيقولك اللي يخاف من العفريت يطلعله , فاحيانا بيكون الخوف نتيجة ايحاء ذاتي او من الاخرين .. ورغم اننا لا يمكنا انكار بعض الظواهر الخارقه والتي ارجعت لقوي خفية سواء كان جن او عفاريت او اشباح وعجز العلم عن تفسيرها لكن اكثر ما يشاع عن هذا العالم مجرد دجل وشعوذه وايحاءات نفسيه

لم تروادني فكرة الخوف من الجن والعفاريت يمكن لان لغاية دلوقتي مشفتش عفريت ممممممم

رغم ان معظم الحواديت اللي كانت بتتحكي لينا واحنا صغيرين كانت امنا الغولة احد الابطال التي يمكن الاستغناء عنهم ولا اعلم حتي الان سر هذا الولع الغريب بانشاء شخصيات مرعبة في الحواديت لتخويف الصغار , هل هي محاولة لازمة ليعرف الصغار وجود الشر في العالم ليحترسوا منه ..هل الكبار يشعروا بمتعه خاصه وهم يرون نظرة الخوف في عيون الصغار واشعارهم انهم بحاجة دائمة لوجودهم معهم من اجل حمايتهم .. ام ان طبيعة الحبكة الدرامية للحدوتة تستلزم ذلك من اجل نشأة الصراع فلكي يعرف الطفل معني الخير يجب ان يدرك وجود الشر

وهناك تيمة شهيره لافلام الرعب في السينما الامريكيه واذكر في كتاب للدكتور احمد خالد توفيق قام فيه بمناقشة هذه التيمه باسلوب ساخر ..

وكلنا نذكر بالتاكيد عم هيتشكوك رائد افلام الرعب وفيلمه الاشهر الطيور حيث تحويل الطيور تلك الكائنات الوديعه لاشياء قاتله تثير الذعر والهلع .. وايضا من الافلام التي اتذكرها فيلم الصرخه والتي تم عمله في اجزاء نظرا للنجاح الساحق التي حظي به ... ناهيك عن افلام الاشباح والمسوخ التي تفننت السينما الهوليوديه في استنباطها وعلي راسها شخصية دراكولا وتيمة مصاص الدماء التي لا افهم لما هذا الولع الغربي المثير للدهشه والاشمئزاز بها

لذة الخوف



ربما البعض يندهش , ما هي اللذه او المتعه التي تنشأ عن الخوف , , فكما ذكرت سنجد اكثر الافلام رواجا افلام الرعب , فما هو الذي يجعل الانسان يدفع ثمن تذكرة فيلم او يحصل علي شريط فيديو لكي يحصل علي جرعه من الرعب ..

واتذكر انا ابن اخي الصغير وهو يطلب ان يشاهد فيلم " العو " ثم يخاف بعد مشاهدة الفيلم ان يدخل الحجرة بمفرده

ايضا تجدون لذة الخوف في مدن الملاهي وهي صناعة قائمة اصلا علي استغلال اللذه او المتعه القائمه علي الخوف والرعب ..

وقد حاول العلماء تفسير هذا الشعور ان المخ عند الخوف والاثاره يطلق ماده خاصه لها مفعول المخدر في خلق حاله من النشوه والسعاده .. وهكذا اصبح الخوف سلعه رائجة يتم استغلالها في ادرار ارباح طائله ..

الخوف الصناعه الاكثر رواجا في عالم السياسه



لتتاكدوا من هذه المقوله .. لنسترجع سويا لما القت امريكا قنبلتي هيروشيما ونجازاكي علي اليابان رغم ان العديد من المحللين العسكرين كانوا يرون ان استسلام اليابان كان مسألة وقت , السبب كان ببساطة ارسال رساله ارهاب وتخويف للعالم واظهار الولايات المتحده الامريكيه كقوة لا تفهر ... ثم كان امتلاك الاتحاد السوفيتي للسلاح النووي سبب في ظهور مصطلح توازن الرعب النووي فكان اشبه بتحييد لقدرات هذا السلاح المدمر , واليست صناعة الاسلحه في مجملها قائمه علي استغلال رعب وخوف الدول ..

ثم نجد نوع اخر من الخوف والتي تمارسه الحكومات علي شعوبها ونجده في الدول الديمقراطيه والديكتاتوريه علي السواء ......

فمن خلال التخويف من الرعب الاحمر المتمثل في الشيوعيه وجعله هاجس مرعب للمواطن الغربي كان يتم تنفيذ السياسات العليا للحكومات الغربيه وسهولة انقياد الجماهير المذعوره لاهدافها ...

ومثلما اغلبنا يعلم... فبعد انهيار الاتحاد السوفيتي وتهاوي الشيوعيه , قرر العالم الغربي اختيار الاسلام كعدو بديل للشيوعيه حيث اطلق عليه الارهاب الاسلامي لادارة آلة الرعب الجهنمية وبث الرعب والذعر في المواطن الغربي العادي لتجعله مجرد ترس في تلك الاله ينفذ سياسه عليا مخطط لها دون تفكير , وقد وجدنا استغلال هذا الخوف في الانفاق السخي علي مشاريع الحرب وفي تقييد الحريات العامه والتي طالما كان يفخر بها المواطن الغربي

طبعا بالنسبه للنظم الديكتاتوريه فاستغلال الخوف في تمرير القوانين والاجراءات القمعية ركيزه اساسيه عند تلك النظم ,بل هو السبب الوحيد احيانا لجثومها علي انفاس شعوبها لفترة طويله بحجة حماية الشعب من الاعداء المتربصين في الداخل والخارج.. لذا نجد تهمة قلب نظام الحكم احد التهم الجاهزه دائما في جعبتها

اخيرا

يظل بالنسبة لي الخوف من المستقبل ومن فقد او فراق اناس عزيزين هو الهاجس الاكبر اثاره لخوفي وربما لخوف الكثيرين ... لذا ادعو الله دائما ان يمنحني الطمأنينه والسكينه والرضا والا يحمل المستقبل مزيد من الالم

وقبل ان انهي الموضوع اطرح عليكم سؤال ..... ما هي الاشياء التي تبث الخوف في قلوبكم ؟



هناك 99 تعليقًا:

فارس بلا جواد يقول...

اول تعليق

فارس بلا جواد يقول...

السلام عليكم ورحمة الله وبركاته
ازيك يا فارس
بجد البوست هايل جدا
ومبتكر
انت جايب الخوف كاحساس وانواعه
بجد حاجه مبتكره جدااااا


تحياتى
دمت مبدعا

Blue Nile يقول...

بوست جميل يا محمد
تناولت الخوف بطريقة جميلة
كل الاحاسيس اللي اتكلمت عنها سواء خوف من الضلمة او الحشرات مظبوطة(انا لحد دلوقتي بخاف من الصرصار)

اكتر حاجة بخاف منها دلوقتي لمستقبل
وحاجة مش عارفة اتخلص منها الخوف من الوحدة (بخاف اقعد لوحدي في البيت)


لجزءالسياسي اللي في الاخر جامد جدا
كالعادة اسلوبك رائع
تحياتي

سنووايت يقول...

الخوف

تناولت جوانب كتير من الخوف , وجوانبه لا تنتهي
بالنسبة للسؤال الاول
اعتقد انه فيه خوف فطري غريزة بداخلنا يمكن عند الحيوانات اكتر لطبيعه حياتها لكن بقاياها لاتزال بداخلنا , ولكن فيه خوف اخر مكتسب زي الانواع اللي تحدثت عنها في موضوعك , ولو زاد الخوف بيتحول لخو مرضي او الفوبيا وانواعها كتير


الخوف من الاشياء الملموسة: كنت زمان بخاف من الحاجات اللي بتخوف اي طفل صغير وكان خيالي واسع , يعني دايما كنت اتخيل اني شايفه الاشياء بشكل تاني.
لكن حاليا يمكن بخاف من العنف او اي شيء يتعلق به


الخوف من الاشياء المحسوسة حاليا هو الاكتر وعلي راس كل الاشياء الفراااااااااااااااق هو هاجسي الاكبر
وبعده المرض


ربنا يمنحك الطمانينة والسكينة محمد
وان شاء الله يكون المستقبل افضل

Cold air يقول...

السلام عليكم

ازيك يا محمد...يا رب تكون بخير
موضوع الخوف موضوع حي طالما دامت بنا الحياة و بيختلف من فترة للتانية و كلامك عن معظم أشكال الخوف اللي بتسيطر علي بني البشر كان جميل و بإسلوب جذاب
وبالنسبة للسؤالين اللي في اول و آخر البوست
اسمع يا cd

أولا : من رأيي الخوف إحساس و غريزة موجودة بالإنسان منذ ولادته و مروره بمراحل العمر المتفاوته و كل إنسان مهما كانت قوته و جبروته بيخاف..علي الأقل الخوف من ضياع القوة و السلطة أو فقدان الهيبة و الخوف من المستقبل المجهول
أما عن إنه شئ مكتسب فأنا معاك إن ممكن الخوف و الرعب يربي بداخل إنسان سوي ليتحول لنكرة يتلاعب به من حوله زي ما بنشوف في الدراما السياسية

ثانيا : الأشياء اللي بتخوفني كتير و متضحكشي عليا و أكترهم ظهورا من حين للتاني الخوف للنت يقطع و مقدرش أكمل التعلق و يضيع مجهودي ده كله في الكتابة وباي بقي لحسن النت بيشاور عقله
^_^

ربنا يحميك و يبعد عنك الخوف و القلق

مع تحياتي

yoyo يقول...

بوست هايل يا محمد
عبرت عن الخوف بكل اشكال مش فى حد فينا مش جواه مشاعر الخوف
خوف من المجهول وخوف من حاجات كتير اوى حواليا
بس صعب اوى انك تخاف من نفسك وكمان تخاف على نفسك

تحياتى
يويو

سارة علي يقول...

ازيك يا محمد
ليك عندى تاج فى مدونتى تعالى خدة
هدخل اعلق تانى على البوست
تحياتى

just smile يقول...

الأشخاص يخافون من الفرح والبهجة والضحك ..
الخوف يداهم القلوب بكثرة هذه الأيام … كثيرون يخافون بلا سبب .. أو لسبب واه مضحك .. البعض يخاف إلى حد الرعب … أحياناً يشل الخوف حياة الإنسان .. يسلبها مذاقها ويحرمه من أي متعة .. والخوف يجلب الحزن والأسى والشفقة على النفس .. الخوف يجلب الإحساس بالهوان والضعف .. والخوف مذلة .
>>>>>>>>>>>>>>>
بشكرك على البوست
بلوج جميله بجد
تقبل زيارتي الاولى مع اعتذاري عن الاجابه عن السؤال

Heba يقول...

محمد

طريقة طرحك للموضوع متميزة والفكرة اللي بتتكلم عنها مبتكرة

يمكن أنوا الخوف اللي اتكلمت عنها في الأول نكون كلنا مرينا بيها

زي الخوف من الضلمة واللي أنا شخصيا مش قادرة أحدد اتخلصت منه ازاي وامتى

بس وأنا صغيرة كنت بخاف منها جدا وبخاف أدخل أي أوضة ضلمة لأني متخيلة أن هلاقي الحرامي مستخبي جواها

تفكير غريب مش عارفة سببه بصراحة

بس دلوقتي بخاف من المستقبل

مش عارفة ايه اللي ممكن يحصل لي بكره

وبخاف أوي على الناس اللي بحبهم

بخاف أصحى ألاقيهم مش موجودين في دنيتي

هي دي الحاجات اللي بخاف منه أوي دلوقتي

تحياتي

منى يقول...

مقال شامل وموضوعى جدا وان زانه الاسلوب الساخر تاره والانسانى تاره اخرى

اما بالنسبه للسؤال
انا مش بخاف من الضلمه
ولا المقابر
ولا الاماكن المهجوره دى لو شفتها يعنى

صحيح بخاف المس اى حيوان او طير وبالتاكيد اى حشره لكن الموضوع مش بيوصل للهلع غير مع القطط

فى الملاهى وانا فى اعدادى دخلت بيت الرعب والصراحه اترعبت فعلا وكانت صاحبتى مخبيه وشها وتقولى اعمل زيها انا بكل فصاحه اقولها امال انا داخله ليه وبعدين اصرخ
لكن كانت اول واخر مره
لكن افلام الرعب استحاله اشوفها ولو فيلم عادى وفيه ضرب او قتل بخبى وشى
وطبعا اخواتى الصغيرين بيترقوا عليه
ادينى قلت كل حاجه
يادى الفضايح
ههههههه
تحياتى

بطوط حبوب يقول...

طبعا بوست تحفه
مش انت الى كاتبه
انا عن نفسى اكتر شئ بخاف منه الكلاب
بموت منها مش بخاف

تحياتى

ادم المصرى يقول...

محمد بوستك ده شيئ من انواع الروعه والتئلق التى ذهرت بيها فى انحاء كلماتك الجميله التى تبين الخوف فى اصعب المواقف التى يصعب التعصر والتفكير بها مشاء الله عليكى يا محمد

قلب مصرى يقول...

السلام عليكم ورحمة الله وبركاته
أعتقد أن الخوف كشعور عام فى حياة الإنسان ينبع أساساً من الغريزة ثم يتغذى بعد ذلك لينمو من البيئة المحيطة.
وأنا شخصياً أخاف من الكلاب الضالة رغم أنى لا أخاف من الكلاب التى يتم تربيتها فى البيوت ولا أعرف السبب لهذا حتى الآن، كذلك لدى خوف غريب جداً من الفئران وقد وقعت حادثة طريفة فى أول زواجى إذ إقتحم فأر شقتى وكان من المطلوب أن أمثل الشجاعة أمام زوجتى لطرد الفأر وأحمد الله أنه أعاننى على أداء هذا الدور حتى إنتصرت على الفأر وخرج من المنزل.
جميل البوست فعلاً وأهنئك عليه.

فارس بلا جواد يقول...

عزيزي محمد
موضوع شيق وتناولته بصورة أكثر من رائعة .. فشعرت انك ربطت بين الخوف وبين أشياء اخري كالأساطير والشعوذة وصناعة السينما وحتي السياسة
أنا أعتقد أن ما يثير خوفي هو الشيئ الغير مألوف بالنسبة لي .. لكن ما ان أتعود عليه ويصير مألوفا يتبدد هذا الخوف .. فمثلا أفلام الرعب الأمريكية أعتقد ان تأثيرها علي الأن أقل بكثير من الماضي .. وايضا سأحكي لك مثال أخر يؤكد كلامي
كنت عند أحد اصدقائي وكان يسكن في منطقة بعيدة نوعا ما وأثناء سيرنا وجدت كلب .. وأنا ولله الحمد لا أخاف من الكلاب لذلك توجهت نحو الكلب أحاول مداعبته أو اخافته وكان شكله مختلف فكان صغير الحجم واذناه واقفتان .. فوجدت صاحبي يقول لي أنه تعلب
تعلب؟؟؟؟؟؟ تسمرت في مكاني ثم مشيت وانا انظر له في خوف فكانت أول مرة أري تعلب في حياتي .. ورغم صغر حجمه لكن في الحقيقة كنت خائف منه لأنه شيئ غير مألوف بالنسبة لي .. لكن بعد ذلك عرفت أن التعلب أكثر جبنا من القطط نفسها وما ان يلمح انسان حتي يفر هاربا
موضوع جميل وتسلم ايدك .. وانت ماشاء الله متميز في القصص والخواطر والمقالات كمان
تحياتي

آخر العنقود يقول...

لا انا سبت تعليق مرة ويعدين بقاااااا
:(
ده كان كبير
طيب نقول تانى
الخوف ده موضوع كبير قوى
وبالنسبة لانه فطرى ولا مكتسب فهو عادة مكتسبة اكتر منها فطرية حتى وان كان فى بعض الانواع والاشكال للخوف قد تكون فطرية
بس مثلا الطفل فى اول حياته مش بيكون عارف ايه اللى يخوف وايه اللى مش بيخوف
لكنه بيعرف ده من خلال التربية والسلوكيات اللى بيشوفها وبيتعلمها واللى للاسف بتكون فى الغالب مش صح
زى ما انت قولت القصص اللى بقت عرف عندنا من امنا الغولة وابو رجل مسلوخة والكلام اللى بجد له تأثير سلبي جداااااااااااااااااا على الاطفال
اما بقى لانواع الخوف اللى انت قولتها فهي فعلا موجودة فى حياتنا كتير
انا عن نفسي بخاف جدااااا من الصورة اللى مش ولابد اللى نات منزلها دى
بزمتك دى صورة :))
بجد بخاف منه حتى ولو كان ميت قدامى:)
المهم بقى اللى بنخاف منه دلوقتى
انا شايفة اننا بقينا بنخاف نفرح
بنخاف نضحك من قلوبنا
بقينا بنخاف بحب حد ونرتبط بيه قوى عشان مش نتصدم فيه او نبعد عنه
بنخاف نحلم عشان مش نتصدم فى أحلامنا دى
بنخاف من الظروف اللى بقت السبب فى الفراق بين الناس وبعضها
بجد اعتقد هو ده اساس خوفنا من حاجة بعد كده
يعنى لو بنخاف مثلا من المرض
هيكون بردوا بسبب انه بيفرق الناس
وهكذا...

ربنا يرزقنا واياك الطمأنينة والسكينة والرضاااااااااااا بقدره وأن يقوي ظهورنا ولا يخفف حملنا
تحياتى وتقديري على البوست والمعنى ده

شهد الكلمات يقول...

ازيك يا محمد
اية يا عم فيلم الرعب اللي دخلتني فيه ده

بس عارف اللي عجبني في اسلوبك انك اتكلمت عن خوفك و ده بيدي متسع لينا اننا نقول ع خفنا منغير ما نتحرج

موضوع الضلمة ده كلنا و احنا صغيرين كنا بنخاف منه
انا كان مرتبط معايا بان في الضلمة هالاقي حرامي طالع ورايا بسكينة

مش عارفة ان كنت قريت القصة دي لد. احمد خالد توفيق اسمها الجاثوم كان فيها وحش بيكون في السقف و باليل ينزل يقتل الناس كنت بليل ابص للسقف و اخاف و اغمض عيني كنت لسة في اعددية و هابلاولة

بس انا مش بخاف من الصرصار انا بقرف من البرص تحت البيت عندنا في جنينة و في برص عايش تقريبا فيها كل يوم بليل يطلعلي يسهر معايا ع السقف اقوم انا واخدة بعضي و نايمة بهرب بخاف لا ينط ع راسي و انا قاعدة

و بالنسبة بقي للكلب انا بحبه
في مرة كنت تحت العمارة و في واحد جارنا عنده كلبة اسمها راجا انا كنت فاكره انه كلب و اسمه فهد لكن اتضح ان فهد ده صاحب الكلب!!!
المهم ماسك الكلب و عامل سبع ع العيال و فرحان بشبابه اوي و العيال هاتموت و خايفة لما الكلب يهوهو و ماشاء الله كان كلب متظغط ع الاخر كان طول فهد تقريبا
المهم عملت انا بقي سبع رجالة في بعض و قولتلهم ماتخافوش يا عيال تعالوا و رحت رايحة ناحية الكلب و مافيش حد طبعا سمع كلامي و جه معايا و لسة بقرب اداني هاوهاواية طلع الادرنالين اللي في جسمي كله بس طبعا عملت نفسي مش خايفة و رحت وقفة قصاده و قلتلهم شايفين عادي مش بيعمل حاجة اهو و ده يهاوهو و عايز ينط عليا و فهد ماسكه وانا هامووووووت و مشيت من جنبه واحدو واحدة ولا اكن هاممني حاجة

بس خلي موضوع الكلب ده بيني و بينك مش عايزة فضايح و تسيييييييح

Desert cat يقول...
أزال المؤلف هذا التعليق.
حمامة يقول...

كل ده غياب يا محمد
نورت :)

موضوع لذيذ

انا لسه النهارده كنت بقرأ موضوع عن الصفات اللى الأطفال بتكتسبها من الأباء والأمهات وانها لازم تكون مثالية لانهم بالنسباله قدوة

اعتقد ان الخوف صفة من الصفات دى
يعنى لو دايماً خوفوه من غير تجربة اكيد هيطلع جبان مثلاً
اكيد الخوف لازم يكون موجود بس زيادته اكيد هتبقى حالة مرضية


الضلمة
امبارح النور اتقطع عندنا وقعدت افكر
ان الضلمة دى غلبانه اوى لان كل الناس بتخاف منها ومش بتحبها
مع انها هادية وجميلة ومريحة للأعصاب
فقررت احب الضلمة :)


الحشرات
انا بخاف من اى حاجة ممكن تطير وتلزق ع الوش او الجسم
لكن لو أليفة واموتها فى صمت عادى
بس بكره الدبان موت
وبحب العناكب :D


العفاريت
موضوع مبحبش افكر فيه كتير
لانك زى ما قولت اللى بيخاف من العفريت بيطلعله
والواحد لو فكر ف الموضوع كتير ممكن هواللى يخوف نفسه طيب وعلى ايه
هما اكيد موجودين وده شىء مسلم بيه ف القرآن بس اعتقد انه ليس من المستحب التفكير الطويل فيه


لذه الخوف

عجبنى اوى الجزء ده
واستفدت منه ف التفسير العلمى
شكل اللعبة اللى ف الصورة دى مرعبة :D

بتفكرنى باللعبة اللى اسمها ديسكفرى اللى ف دريم بارك واللى بعد ما دفعت فلوسها مرضتش اركبها :D


انا بقى عن نفسى بخاف من حاجات عبيطه جداً
بخاف من النار , السكينة او اى آله حادة , المكواة , البحر

لانى دايماً وانا بستعمل الحاجات دى بطريقة او بأخرى بحس انها ممكن تموتنى مثلاً

اما الخوف المعنوى بقى ده عندى مرضى
يعنى دايماً خايفة من نفسى اعمل حاجة غلط
خايفة حد بحبه يبعد عنى
احب حد مش مفروض احبه او اكره حد مش المفروض اكرهه أذى حد غصب عنى
حد عبيطه برضه :)

معلش طولت اوى ف الرد
بس بحب اوى ارغى عندك

kemet يقول...

السلام عليكم ورحمة الله وبركاته

اولا البوست حلو اوي
اما اجابة علي سؤالك (ما هي الاشياء التي تبث الخوف في قلوبكم ؟)

الصرصار هذا يتصدر القائمة خوف مرضي
لكن اكتر حاجة بتخوفني اني يجي يوم اكون فيه لوحدي بمعني اني ابات في شقتنا لوحدي وماعايش حد

والتاني اني اتبهدل واحتاج مساعدة من حد وماالائهوش

المرض بيرعبني وبالذات اللي مالوش غير طريق واحد بعد رحلة من العذاب

ربنا يقوي قلوبنا بالايمان لانه هو اللي ضد الخوف

تحياتي
الي اللقاء

سارة علي يقول...

ازيك يا محمد
جيت اهو اعلق وسورى على التاخير
الخوف احساس غريب هو اكيد مش غريزة لان الاطفال مبيخافوش لكن بالتجربة بيتولد الاحساس بية عارف اكتر شى بخاف منة الزواحف التعابين خصوصا بس من صغرى متعودة مخفش من الضلمة ماما عودتنى على كدة
بوست حلو اوى
منورنى دايما

الرسائل الرومانسية يقول...

انا بخاف من ربنا
وبخاف من
الموت
اكدب يعنى
اى انسان بيخاف من الموت
لكن الضلمة والحشرات والعفاريت وماشابه لا
وبخاف من الصور اللى انت حاططها فى اول المدونة وصوت الراجل اللى بيغنى ده خوفنى برضه

انا النهاردة مسافرين فى البيت وقاعد لوحدى حرام عليك

مش عارف تأجل البوست لحد مايرجعو ههههه

kochia يقول...

من اول يوم نزلت البوست انا قريته
بس حسيت انه عاوز كلام كتير فاجلا التعليق عليه كذا مرة

لكن هختصر بقي واكتب
اولا الخوف في رايي ليس غريزة مطلقة انما هو مكتسب
واكيد علماء النفس اثبوا الكلام ده بكثير من التجارب
الطفل يخاف من الظلام لما نلعب معاه ونقوله بخ مرة في الظلام ويعرف ان الظلام ده خطر
والخوف من الحشرات بقي حدث ولا حرج
بس ده اللي 100% مكتسب
ودي حاجة انا متاكدة منها لاني التجارب بن=تاعتها اجريت عليا انا شخصيا والان الحشرات وخاصة عائلة الصرصورات زيك كدة

اما لذة الخوف هي ادمان
قرات انه يدمن بعض الناس الشعور بهرمون الادرنالين في الدم بكميات كبيرة
ضربات القلب
اتساع حدقة العين
والحاجات دي
بستغرب اوي من الناس اللي بتحب تنط من مكان عالي او حاجات زي كدة

واتفق معك ان الخوف من فقد عزيز هو الاكثر الما
ادعو الله معك ان يمنحني الطمأنينه والسكينه والرضا والا يحرمني من عزيز او حبيب

اما عني فكما قلت لك عائلة الصرصورات الهلع الاكبر لي

تحياتي
موضوع ثري

دعوة للأمل يقول...

الخوف دة شىء عادى عند اى انسان و هو شعور طبيعى و انا بخاف اوى من بكرة و اليوست جميل و ربنا بوفقك

السهم المكسور يقول...

البوست رائع
تحدثت فيه عن موضوع مهم
انا عن نفسي بخاف من الكلاب
اعجبني كثيرا اسلوبك واتمني لو توافق علي تبادل الروابط معي


وشكرا لو وافقت

دمت أكثر ابداعا

memo يقول...

اسلوبك رائع وهذا الموضوع من الموضوعات الهامة التى يغفل البعض عنه واعرفك اننى اخاف من جميع الحشرات ومن الحيوانات خاصة الكلاب ولى مواقف مضحكة مع الكلاب على كل انت اسلوبك رائع وجميل انك تهتم بالموضوعات التى يغفل البعض عنها ومن فضلك ممكن نتبادل الروابط واعرف رايك فيما اكتب فى مدونتى

صاحب المضيفة يقول...

كنت سمعت من فترة أن لاطفل حين يولد يخاف من ثلاثة أشياء فقط


لكن حين نكبر نخاف من الف وثلاثة وستين شيئا

تعرف الفرق الان

الفارس الملثم يقول...

فارس بلا جواد..

انا سعيد جدا ان البوست عحبك يا فارس

منورني كده دايما

تحياتي

الفارس الملثم يقول...

Blue Nile..

تسلمي يا بلو , انا سعيد ان البوست عجبك بجد

واكيد المستقبل بقي هاجس مقلق لاغلبنا,ربنا يمنحنا السكينه والطمانينه جميعا

منوراني كده دايما يا بلو

الفارس الملثم يقول...

سنووايت..

اكيد يا سنووايت الفراق اصعب احساس ممكن نحسه ربنا يصبرنا علي تحمله ان حدث

اشكرك جدا لدعائك

تحياتي دائما

الفارس الملثم يقول...

Cold air..

الأشياء اللي بتخوفني كتير و متضحكشي عليا و أكترهم ظهورا من حين للتاني الخوف للنت يقطع و مقدرش أكمل التعلق و يضيع مجهودي ده كله في الكتابة وباي بقي لحسن النت بيشاور عقله

هههههههههههههه

ربنا يجعل كلامنا خفيف عليه ههههههههههه

دايما بتعجبني مشاركاتك بصوره خاصه يا كولد

تحياتي دائما

الفارس الملثم يقول...

yoyo..

انا سعيد ان البوست عجبك يا ايه

تعبيرك الاخير ده صعب اوي وعميق

تحياتي

الفارس الملثم يقول...

سارة علي..

برده مش اجاوب علي التاج الا لما تجبيلي شيكولاته جلاكسي بتلكك ههههههه

انا سعيد ان البوست عجبك ,ويبعد عنك الخوف يا ستي دايما

تحياتي

الفارس الملثم يقول...

just smile..

تعليقك جميل اوي , وانتي نورتي مدونتي بزيارتك

تحياتي

الفارس الملثم يقول...

Heba..

ازيك يا هبه اتمني انك تكوني كويسه وفي خير حال

بس دلوقتي بخاف من المستقبل

مش عارفة ايه اللي ممكن يحصل لي بكره

وبخاف أوي على الناس اللي بحبهم

بخاف أصحى ألاقيهم مش موجودين في دنيتي

هي دي الحاجات اللي بخاف منه أوي دلوقتي


شعور صعب اوي ان التفكير ده يسيطر علينا بنفقد احساسنا بطعم الحياه

نورتي بجد يا هبه

الفارس الملثم يقول...

منى.......

ههههههههه

انتي طلعتي خوافه بقي ممممممم

, انتي عارفه في ناس كتير بيترعبوا وشعر راسهم يقف وهما بيتفرجوا علي فيلم رعب ورغم كده بيحبوا يتفرجوا عليها ؟؟؟؟؟

كويس عرفنا بعض اسرارك اهوهههههههه

نورتي بجد يا مني

الفارس الملثم يقول...

بطوط حبوب..

تسلم يا محمود , انا سعيد ان البوست عجبك

نورت يا باشا

الفارس الملثم يقول...

ادم المصرى..

انا سعيد يا ادم ان البوست عجبك بجد , وحضرتك نورت مدونتي المتواضعه

تحياتي

الفارس الملثم يقول...

قلب مصرى..

ههههههههههه

طيب احمد ربنا يا راجل انك انتصرت عليه والا كانوا في البيت بقوا ما يصدقوا تريقه ههههههههه

نورتني بجد يا باشا

الفارس الملثم يقول...

فارس بلا جواد..

ربنا يخليك يا فارس باشا , ودي شهاده اعتز بيها , وفعلا عندك حق الانسان بيخاف من المجهول او الشئ اللي ميعرفهوش

منورني دايما يا فارس

الفارس الملثم يقول...

آخر العنقود..

ههههههههههههههه

حد بيسرق التعليقات ولا ايه .. معلش بقي انا حطتلك الصرصور عشان التوضيح بس هههههههههه

انا شايفة اننا بقينا بنخاف نفرح
بنخاف نضحك من قلوبنا
بقينا بنخاف بحب حد ونرتبط بيه قوى عشان مش نتصدم فيه او نبعد عنه
بنخاف نحلم عشان مش نتصدم فى أحلامنا دى
بنخاف من الظروف اللى بقت السبب فى الفراق بين الناس وبعضها

ايوا للاسف يا اماني , والاحساس ده قاتل بجد

دايما بكون ممتن لتعليقاتك

نورتي بجد

الفارس الملثم يقول...

شهد الكلمات..

هههههههههههههه

ايوا مانا بستدركم عشان تعترفوا مممممم

انا قريت رواية الجاثوم دي من فتره قليله ,ايه ده دانتي بقي مهتمه زي بالحاجات دي مممممم

متخفيش حكاية الكلب دي سر طبعا , بس شكلك غاويه شكل اصلا هههههههه

نورتي بجد يا شهد

الفارس الملثم يقول...

حمامة ......

ايه يا حمامه الاعترافات دي كلها مممممم

علي فكره انا زيك بقيت احب الضلمه عشان الهدوء والسكينه اللي فيها

بس اشمعنا بتحبي العناكب يعني ممممممممم

عارفه يا حمامه الجزء الاخير في تعليقك حسسني اد ايه انتي شخصيه جميله وحساسه

انا اللي ببقي سعيد جدا لما تعلقي عندي

نورتي بجد يا حمامه

الفارس الملثم يقول...

kemet..

انا اللي سعيد جدا بزيارتك وتعليقك

المرض بيرعبني وبالذات اللي مالوش غير طريق واحد بعد رحلة من العذاب

مش عارف حيرني معني العباره دي

اكيد الايمان بيخفف كتير من مخاوفنا , ربنا يثبت قلوبنا علي الايمان

نورتي بجد

الفارس الملثم يقول...

الرسائل الرومانسية..

ههههههههههه

معلش بقي جت معاك كده , انت مش عجبك عم صلاح جاهين ولا ايه

نورتني يا باشا

الفارس الملثم يقول...

kochia..

انا بميل لكلامك يا كوشيا ان اكثر مخاوفنا بنكتسبها ن خلال احتكاكنا بالاخرين

ربنا يجعل كلامنا خفيف بقي علي عائلة الصرصورات هههههه

نورتي بجد يا كوشيا

الفارس الملثم يقول...

دعوة للأمل..

اكيد كلنا بنخاف من بكره , اتمني البوست يكون عجبك

نورتيني

الفارس الملثم يقول...

السهم المكسور..

انا سعيد ان البوست عجبك بجد

يا باشا انا حاطط الرابط بتاع مدونتك من التعليق الي فات

حضرتك نورتني

الفارس الملثم يقول...

memo..

انا سعيد جدا ان البوست عجبك وحضرتك نورتني

بس الرابط بتاع مدونتك مش باين في تعليقك ؟؟؟

الفارس الملثم يقول...

صاحب المضيفة..

لكن حين نكبر نخاف من الف وثلاثة وستين شيئا

اتفق معاك جدا ,عشان كده بنحن لطفولتنا

نورتني يا باشا

Heart Rose يقول...

بوست رائع

لطالما احببت تعليقاتك السياسيه ..
بجزئها الاخير بما يتعلق بهيروشيما و ناكازاكي و النظم الديكتاتوريه
و لا زالت امريكا و تمثيلياتها .. فكل فتره توجه مخاوف الشعوب الجاهله نحو هدف محدد .. صارفة انظارهم عن جرائم الحرب التي تخوضها او الهموم القوميه و الوطنيه الكبيره كـفلسطين..
فتارة اسلحة الدمار الشامل و تارة اخرى القاعده .. ثم الفلوجه فـ ابو مصعب الزرقاوي بالتحديد والله اعلم ماذا بعد

اتخوف من خيال امريكا الشاااااطح و قدرتها الابداعيه في هذه التمثيليات

على فكره : الصورة الاولى مرعبه جدااا

مخاوفك قليله و انت صغير بالمقارنه مع مخاوفي التي لا تعد و لا تحصى .. لكن مخاوفي لم تكبلني يوما .. منذ صغري و لليوم

فيما يتعلق بمخاوفي .. اتخوف الظلمه احيانا فقط عندما تنشط مخيلتي

اتخوف جدا من ان اكون وحيده بلا اصدقاء او اهل

اخاف من ان ابقى وحيده في منزلي او غيره .. ( لان المخيله السمعيه تكون في حالة نشاط )

اخاف ان لا اتحمل ما تتطلبه مهنة الطب او دراسته و ان لا اكون بالمستوى المطلوب و افشل

موضوع (سبشل) من كاتب (سبشل)

جميل جدا ان نرى جوانبك الابداعيه في كتابة مقالات ..غير القصص او الخواطر


دمتَ مطرا .. تنفع و لا تضر

تحياتي اخي العزيز ^_^

Heart Rose يقول...

سقط سهوا :

على فكرة .. اعشق قصص و افلام الرعب غير الدمويه ذات الفكره

و اعشق الالعاب المرعبه في الملاهي

مع العلم انا اخااااافها جدا .. و استمر بالصراخ طيلة ركوبي في اللعبه

لكنه تحدي احب خوضه

احلام اليقظة يقول...

اعظم انواع الخوف
هى الخوف من اللة سبحانة وتعالى
ذلك الخوف الذى لا يحمل سوى الحب

بوست جميل وثرى

دومت بخير

ساعد نسرين الايمن يقول...

الخوف
اكبر معطل للسلوك الانساني
عارف ؟
اقولك اعتارف
انا من ساعات لما اتغربت بقيت اخاف انام ف الضلمة
تخيل كم المشاكل اللي ممكن اواجهها مع شركاء ف السكن لمجرد انني لازم انام واكبر عدد من الانوار مفتوحة
ليه فتح الموضوع ده ؟
المسالة عايزة تفكير جامد اوي

يوميات نائمة في الأرياف يقول...

بجد انا عجبتني موووووووت حتة الضلمة دي وعايزى اقولك اني لغاية دلوقتي بخاف من الضلمة ومقدرتش اتغلب على الخوف ده جتى بعد ما كبرت (المفروض كدة يعني) ولغاية دلوقتي لازم انام قدام التليفزيون لأني مش راحمة نفسي بخاف من الضلمة ومش بعرف انام في النور
اول مرور ليا بس بجد تحفة

السماء الداميه يقول...

انا ميمو وده الرابط بتاع مدونتى يا فارس وممكن اعرف رايك فيما اكتب

السماء الداميه يقول...
أزال أحد مشرفي المدونة هذا التعليق.
بنات صاحبة الجلالة يقول...

الفارس الرومانسي محمد

المرة دي صحيح مفيهاش رومانسية فيها واقعية وشرح جميل اوي لانواع الخوف بص بدون مجاملة طبعا البوست لذيذ وشيق وحلو بجد في حاجات كتير اوي الواحد بيخاف منها دي بتختلف مع اختلاف مراحله العمرية انا كنت زمان بخاف من الحشرات وخصوصا الصرصار ومازالت عادي يعني هههههههههه مش بخاف من الصراصير الصغيرة هههههههههه بخاف من ابو شناب بس

زمان كان عندي خوف اني اتكلم مع الناس واختلط بيه ودا كان عاملي مشكلة في بداية شغلي لان شغلي كله مبني علي كلامي مع الناس بس قدرت اتغلب علي الخوف دا وبعدها بقي عندي خوف من اني اترقي في شغلي ويبقي واقع عليا عاتق مسئولية اخاف مكنش قدها

بس اكتر حاجة بخاف منها هو الحب يمكن لاني اتجرحت كتير بخاف اتعلق تاني بحبال دايبة تقدر تقول عندي فوبيا الحب ههههههههه مش هقولك انا مين في بنات صاحبة الجلالة اكيد انت هتعرفني لوحدك

تسلم ايديك علي البوست

خالص تحياتي ياخي العزيز

كوارث يقول...

موضوع جامد جدا يا فارس
والاغنية جامدة
انا الحاجة الوحيدة اللى مخوفاني !
وجود شيء أخاف منه

نوره الخشن يقول...

ازيك يامحمد
عامل ايه يامحمد
اخبارك ايه يامحمد
فينك مش باين يامحمد
(ايه السخافة اللي انا بئيت فيها دي)
يامحمد!

اولاً موضوعك عجيب غريب مريب كعادتك(اكتب رومانسي شوية الله يكرمك عشان ادخل اسألك السؤال اللي كل تدوينة عندي بتسألهوني)

ثانياً
انا عمري مكنت بخاف من الضلمة لانا ولا كبيرة ولا صغيرة عادي حتى لو قاعدة لوحدي فالبيت .. وكمان زي حالاك بفرح بالضلمة وبنام بعمق لما يقطع النور
تمت عن موضوع الاشباح ده لأ عادي برضو(جموسة ياناس) الحمدلله انا عندي ايمان ان الانتظام في الصلاه مايخليش حاجة تقرب منك تماماً وكمان اية الكرسي بس كفيلة انها تحرق اي حاجة من دي
ومؤمنه بمقوله اللي يخاف من العفريت يطلعله .. يعني اللي يوهم نفسه هو اللي بيخاف
(يااااااااااااعممم ماعفريت الا بني ادم)

اضحك بئى على اللي جاي::
الحاجة الوحيدة اللي كنت بتخوفني وانا صغيرة المترو .. كنت لما اركبه مع خالتي فيندهوا في الميكرفون عن واحد اسمه المجند شعبان .. ياختيييييييي عالذعر اللي كان بيجرالي .. مكنش في حاجة بتخوفني نهائي الا هو (شوف الهطل)
كمان كان الناس السود اوي بتوع جنوب افريقيا بيضيقوني بحس انهم مش بيستحموا وده كان عن اقتناع مني
(هى كده بتيجي على اهون سبب)

وانا كبيرة بئى مش بخاف تقريباً غير من حاجة وحده وهى النتيجة بتاعة الامتحان واحب اقولك انها ظهرت وهتلائيها فالرابط ده

http://result.arts.cu.edu.eg/ExamResult.aspx?b=601641&Ey=2&Acv=

بتوع تاريخ كلهم عباقره اوعى تتكلم

نوره الخشن يقول...

اااااااااه نسيت اقولك بخاف من الصرصاااااااااااااااااار

وبقرف منه جدا
والبرص كمان
عااااااااااااااااااااااااا

الفارس الملثم يقول...

Heart Rose..

اتخوف من خيال امريكا الشاااااطح و قدرتها الابداعيه في هذه التمثيليات

بالتاكيد يا روز فامريكا تتبع منوال السينما الهوليوديه في جعل تخاريف صناع القرار فيها لحقائق علي ارض الوقائع وعلي العالم ان يشاهد هذا العرض الردئ ويصفق من فرط الابهار

ممممممممم واضح انك بتخافي من حاجات كتير , ربنا يزيل عنك اي مخاوف , ولن نجد غير الله ان ندعوه ان يمنحنا الطمانينه والسكينه

دام انارتك صفحة مدونتي المتواضعه

تحياتي دائما

الفارس الملثم يقول...

احلام اليقظة..

بالتاكيد يا احلام الخوف من الله هو خوف بطعم الخشيه والحب

نورتيني

الفارس الملثم يقول...

ساعد نسرين الايمن....

هههههههههههه

يا راجل , انا دلوقتي بعرفش انام خالص الا في الضلمه , واتعصب لو حد فاتحه

نورتني بجد يا باشا

الفارس الملثم يقول...

يوميات نائمة في الأرياف..

هههههههههههه

بجد , علي فكره بالنسبه لحكاية التلفزيون دي في ناس عندنا في البيت لازم يناموا علي صوت التلفزيون كنوع من التوعد علي طريقة فريد شوقي في الفيلم لما بينام علي صوت الغساله

نورتي بجد

الفارس الملثم يقول...

السماء الداميه..

حضرتك نورتني يا باشا وتم الزياره وتبادل الروابط

تحياتي

الفارس الملثم يقول...

بنات صاحبة الجلالة......

نورتيني يا ريمو " اوعي تكوني مش هي " ممممممم

مش بخاف من الصراصير الصغيرة هههههههههه بخاف من ابو شناب بس

ههههههههه عمرك اطول من عمري انا برده لو صرصار سغنون فات من جمبي ولا اعبره ,اما بقي المجعلظ الكبير خاصة لوبيطير يعععععععععععععععععع



بس اكتر حاجة بخاف منها هو الحب يمكن لاني اتجرحت كتير بخاف اتعلق تاني بحبال دايبة تقدر تقول عندي فوبيا الحب

اكيد اللي اتلسع من الشوربه ينفخ في الزبادي واحيانا بيكون البعد عن الحب نوع من المقدر والمكتوب

بجد انا سعيد جدا بزيارتك ومشاركتك الجميله

تحياتي دائما

الفارس الملثم يقول...

كوارث..

ايون احساسي اني خايف حاجه تخوف بجد

نورتني يا باشا

الفارس الملثم يقول...

نوره الخشن..

مانا نزلت قصه البوست اللي فات وانتي مجتيش ممممممممممممم

بتحبي الضلمه زيي يعني , علي فكره ساعات بيبقي نفسي اتعرف علي شبح يمكن اعمله قصه هههههههه يجعل كلامنا خفيف عليهم , هي العفاريت بتدخل مدونات ههههههههههه

بس ايه الشطاره دي من غير لا نق ولا حسد , طلعتي دؤرمه اهو ممممممممممم

الف مبروك يا نوره وعقبال لما تعود امجاد التاريخ علي ايدك

واحلي سلام لنوره ولقسم التاريخ

سلاممممممممممممممممممممممممممممممممممممممممممممممممممممممممممممممممممممممممم

blue-wave يقول...

حلو البوست
بجد هايل
تحياتى

Rania يقول...

و الله يا محمد فى الوبست دة حسيت انك بتتكلم عنى
و دة تقريبا بيرجع اننا ابناء برج واحد

بخاف من الحشرات جدا مش هقولك اكتر من ان لو شوفت حاجة من دى انط فوق السرير و اقول يا انا يا هو فى قلب البيت
و الرعب و الخوف من الاشباح
و العفاريت و الحاجات الحلوة دى

و اهمها الخوف من بكرة و من فقد الاحباء و الاخلاء

دمت بكل ود

نوره الخشن يقول...

اه يابني وان اي اي
بس والله البوست اللي فات كان غصب عني
كانت عربيتي فيها مشكلة وبصلها ده غير جدتي بتعمل عمليه وكمان بئالي حوالي 4 محاضرات في الكورس مش بذاكر ومستهبلة جامد وياعيني سينيورا اللي بتدينا نطقت عربي مني والمشروع القادم هتولع فيا
اعذرني يامحمد انت عارفني متأخرش عنك بس ظروف انا حتى مكنتش فاضية أرد عندي فالمندونة .. كرررررررررررك

تحياتي واجدع سلام لخريجين تاريخ وانتم السابقون ونحن اللاحقون .. ورقصنييييييييييي

norahaty يقول...

السلام عليكم ورحمة الله وبركاته
محمد الفارس الملثم
هذه المره لم تبخل علينا بالابتسامة (بل والضحكة المجلجلة حتى ...بس ماتقولش لحد)ذلك مع الشرح او
التفنيد الوافى لانواع الخوف.
بوست جميل يامحمد احييك عليه
(وكله كوم ومذبحة الصراصير كوم
تانى )
تحياتى واحتراماتى لك يامحمد

GiGi يقول...

حقيقى بوست هايل
ربنا يكرمك
انا بالنسبه ليا بخاف من كل حاجه حتى من الحاجات الكويسه لانى بخاف تضيع منى ويبقى لازم دايما ابقى واخده بالى منها وعليها
وبخاف من الدنيا كلها ساعات بحس الناس كلهم وحشين بس برجع واقول الدنيا فيها كل حاجه وكل انسان بيغلط وليه مش انا اللى غلط
اسوء حاجه بجد الخوف ماعدا طبعا الخوف من ربنا

الفارس الملثم يقول...

blue wave..

شكرا يا باشا

نورتني

الفارس الملثم يقول...

rania

ههههههههههههههه

لا متخفيش , اللي في البرج بتاعنا لازم يجمدوا قلبهم ميخفوش ولا من العفاريت " يخافوا من الصراصير بس " هههههههه

عندك حق يا رانيا المستقبل هو اللي يخوف بجد

نورتي يا رانيا

الفارس الملثم يقول...

نوره الخشن

ايه يا بنتي الكركبه دي كلها , دانتي عندك حالة طوارئ بجد

, انتي بتدرسي ايطالي ولا ايه ممممممم

بس صح نفسي اعرف ايه اللي حصل للمدونه بتاعتك هما لسه ممسكوس الفاعل ممممممممممم


وسلامممممممممممممممممممممممم كبيررررررررررررر للي رافعين شعله التاريخ عاليا مممممممممم

الفارس الملثم يقول...

نور حياتي

ازيك يا دكتوره وعود احمد ممممممممم

انتي مقلتيش يعني بتخافي من ايه ولا قلبك جامد ههههههههههههه

نورتي بجد يا دكتوره

الفارس الملثم يقول...

جيجي

صعب اوي يا جيجي اننا نخاف من الناس وحتي لو انجرحنا من بعضهم,اكيد في ناس كويسين

ربنا يوفقك لمحبة الناس ورضا الله

نورتي بجد يا جيجي

الملاك يقول...

السلام عليكم ورحمة الله وبركاته
دى اول زيارة لى لمدونتك أخى فارس
أولا أحب احيك على هذا البوست رائع فهو يعتبر دراسه رائعه ومفيدة جدا وطبعا لن يسعنى التعليق على كل جزء فيها علشان كده هكتفى بأنى أجيب على اسالتك
أنا فى أعتقادى أن الخوف غريزة وضعها الله سبحانه وتعالى فى أنفسنا كوسيله للحفاظ على حياتنا بس المفروض نتحكم فيها لانها لو زادت داخلنا هتقضى على حياتنا بدل ما تحافظ عليها
وبالنسبه للسؤال التانى فأنا أكتر حاجه بتخوفنى الذنوب لانى مؤمنة ب ( أحفظ الله يحفظك )
ثانيا أحب أن أحيك على مدونتك واسلوبك الرائع فى تناول الموضوعات وأختيارها وأتمنى ان تقبلنى زائر دائم
تحياتى
الملاك

appy يقول...

الحاجه الوحيده اللى بترعبنى بجد الفأر واخوه الارنب مش عارفه ليه يمكن بقرف منهم
بس احنا مش اتولدنا بخوف هى مواقف اللى بتحصل لنا تحولنا او نترجمها خوف بس

زى الهوا يقول...

الخوووووووووووووف , انا بخاف مووووووووت , من كل الحاجات اللى حضرتك قولتها , وبالنسبة للإجابة على السؤال , فانا اكتر خوف بخاف منه , الخوف من الفراق زى حضرتك كدة , وممكن كمان الخوف من خوض اى تجربة جديدة , او بمعنى اصح الخوف والقلق من الجااااااى

عجبنى الموضوع اوى

shaimaa samir يقول...

الاخ محمد

جئت لتاكيد حضورك

فعلاا سيشرفنى جدا
واريدك ان تتعرفعلى مديردار النشر
للاتفاق مع فعلا


لن اتقبل اعذاااااااااار
وجه صارم جدا

نونو يقول...

تصدق انا حاولت اصنفهم مع نفسى قلبى وجعنى
قولت انى هقضييها خوووف من كل حاجة
فعملت نفسى مش واخدة بالى ونفضت

قلب مصرى يقول...

مهم قووووووووووووووووووووووووى خش على الرابط ده حالا
http://nouranelshamly.blogspot.com/2008/07/blog-post_28.html
ونتقابل هناك إن شاء الله

shaimaa samir يقول...
أزال المؤلف هذا التعليق.
نوره الخشن يقول...

اه بدرس ايطالي
ومتقوليش ليه
مش لائية اجابة للسؤال ده الحقيقة!

مجداوية يقول...

السلام عليكم

تدوينة رائعة واختيار موفق جدا للموضوع ووجدت فيه نفسى أيضا مثل ابداعاتك الأدبية !!

ويحتاج التعليق عليه الى تفرغ وروقان لا أملكه للأسف حاليا ولكن سأدخره لوقت آخر حتى لو كان فات وقته لأنه يستحق بالفعل وكل جزئية فيه تدوينة منفصلة ويمكن ده اقتراح انك تخصص لكل جزئية مناقشة يعنى الخوف وقت الطفولة ده ممكن تلاقى ردود عليه بالهبل والخوف الآن برضه والخوف من المستقبل وهكذا

لكن خلاصة الأمر عندى
أن الله قد رد على تساؤلك

قال الله تعالى فى سورة النحل

وَضَرَبَ اللّهُ مَثَلاً قَرْيَةً كَانَتْ آمِنَةً مُّطْمَئِنَّةً يَأْتِيهَا رِزْقُهَا رَغَدًا مِّن كُلِّ مَكَانٍ فَكَفَرَتْ بِأَنْعُمِ اللّهِ فَأَذَاقَهَا اللّهُ لِبَاسَ الْجُوعِ وَالْخَوْفِ بِمَا كَانُواْ يَصْنَعُونَ (112)


قال الله تعالى فى سورة آل عمران

إِنَّمَا ذَلِكُمُ الشَّيْطَانُ يُخَوِّفُ أَوْلِيَاءهُ فَلاَ تَخَافُوهُمْ وَخَافُونِ إِن كُنتُم مُّؤْمِنِينَ (175)


قال الله تعالى فى سورة البقرة

وَلَنَبْلُوَنَّكُمْ بِشَيْءٍ مِّنَ الْخَوفْ وَالْجُوعِ وَنَقْصٍ مِّنَ الأَمَوَالِ وَالأنفُسِ وَالثَّمَرَاتِ وَبَشِّرِ الصَّابِرِينَ (155)


قال تعالى فى سورة الأحقاف :
إِنَّ الَّذِينَ قَالُوا رَبُّنَا اللَّهُ ثُمَّ اسْتَقَامُوا فَلَا خَوْفٌ عَلَيْهِمْ وَلَا هُمْ يَحْزَنُونَ (13)


بمعنى أن الخوف أنواع فهناك خوف ابتلاء وخوف رجاء وخوف رعب وكفر وخوف بالايحاء



وفيه خوف أكون طولت عليك قول طولتى

وكفاية كده أصلى خايفة أسرح والوقت يسرقنى وأنا بآخد هدنه فقط

والى لقاء آخر ان شاء الله
وسلام الله عليك ورحمته وبركاته

الفارس الملثم يقول...

الملاك..

حضرتك اللي شرفتيني بالزياره , وان سعيد جدا ان المدونه عجبتك

واكيد الذنوب اكثر شئ يمكن ان يؤرقنا والخوف من لقاء الله بما نحمله من الاوزار

حضرتك نورتيني بجد

الفارس الملثم يقول...

appy..

طيب الفار ماشي ,امال ايه حكاية الارنب بقي , انتي بتحبيش الملوخيه بالارانب ولا ايه ههههههههههه

نورتيني يا ابي

الفارس الملثم يقول...

زى الهوا ...

ايوا الخوف من الفراق , والخوف من بكره اصعب حاجه ممكن تؤرق الانسان

نورتيني بجد

الفارس الملثم يقول...

shaimaa samir,,

دعوتك كانت شرف ليا , واعتذاري لاسباب خارج ارادتي ,,

تحياتي واعزازي

محمد

الفارس الملثم يقول...

نونو..

ههههههههههههههههههههههه

الخوف طبعا نص الجدعنه , بس محدش قالنا اخبار النص التاني

نورتي بجد يا نونو

الفارس الملثم يقول...

قلب مصرى..

شكرا اخي قلب علي تنبيهك واهتمامك

اللقاء مثل اشياء كثيره في حياتنا قدريه وكثيرا ما تكون اقدارنا بغير ارادتنا

منورني دايما يا باشا

الفارس الملثم يقول...

نوره الخشن

شكلك نفسك تعملي بعثه لايطاليا بعد التخرج مممممممممممم

الفارس الملثم يقول...

مجداوية..

اهلا بالسيده مجداويه , وانا بقول ايه النور ده كله

دايما بتكون ردودك مميزة زي بوستاتك ,

بس انتي لسه صح بتذاكري ولا ايه ممممممممم

بمعنى أن الخوف أنواع فهناك خوف ابتلاء وخوف رجاء وخوف رعب وكفر وخوف بالايحاء

جميله اوي العباره دي


منوراني كده دايما

Habiba يقول...

الفارس الهمام
ازيك اخبارك ايه
انا اخيرا رجعت تانى
ايه ياعم التحليل الفظيع ده مجهود تشكر عليه بصراحة وعايزة اقولك ان الخوف فعلا احيانا بيبقى ليه لذة وعندك حق فى كل اللى انت قلته اما بخصوص ايه الخوف غريزة ولامكتسبة فهو انا شايفاه مزيج بين الاتنين بمعنى انه تقريبا الانسان بيتولد عنده الاستعداد للخوف ده او عنده الشعور ده وبيكبر مع البنى ادم نتيجة بعض عوامل ممكن يقاابلها الطفل وتكبر معاه
اما عن ثالثا فهو الحاجات اللى ممكن تكون بتخوفنى فهى بسبب شبه انعدام ثقتى فى الناس بقيت دايما وانا بتعامل معاهم خايفة انهم يطلعوا مش كويسين او معندهمش اصل زى اللى بيحصل دايما
وكمان دايما خايفة من بكرة واللى هيجرى فيه
والاهم بقى انى بخاف من التعابين مووووت وبتبقى ليله سوده لو شفت تعبان فى التليفزيون والله مرة حصلت فضلت اسبوع مش بنام من الكوابيس اللى بتجيلى والتعابين اللى بتجرى ورايا فيها هههههههههه اللهم اجعل كلامنا خفيف عليهم
ربنا يسترها بقى ويكون معايا ومعاك
دمت فى رعاية الله

الفارس الملثم يقول...

habiba..

حمدالله علي السلامه يا حبيبه , ايه الغياب ده كله ممممممممم

انا سعيد ان البوست عجبك , ويمكن الخوف من ان تخدعنا المظاهر موجود داخل كل منا ..

صراحة لسه ما قابلتش تعبان لغاية دلوقتي , ربنا يستر ويجعل كلامنا خفيف عليهم ههههههههههه

نورتي بجد يا حبيبه

قطرة الندى.. يقول...

الفارس الملثم السلام عليكم

مجرد ان قرات خواطرك ارتعش بدنى من الخوف لان الخوف ببساطه هو وليد التفكير فعندما يبدا لاانسان فى التفكير فى مستقبله وحياته ومصيره وعواطفه والى غيرذلك يشعر بالخوف لانه مهما كان متفائل ولكنه قد يفكر فى احتمال الفشل وبالنسبه الى اكثر ما يرعبنى ويخيفنى هو ان ينكسر قلبى .....
اشكرك على هذه الكلمات الحساسه الرقيقه التى لا تنبع الا من شخص ذو احساس عالى
وانا اتشرف بدعوتك الى مدونتى الصغيره التى لا تقارن بمدونتك ولكنى سوف اتشرف برايك
انا فى انتظارك الى القاء

غير معرف يقول...

福~
「朵
語‧,最一件事,就。好,你西...............................................................................................................................-...相互
,以讓>它使...................

users online