خواطر منسيه

بداية كل سنه وانتم طيبين , هو اينعم العيد خلص تقريبا بس مايمنعش اننا نقولها بأثر رجعي ...

في مثل بيقلك ان التاجر لما يفلس يدور في دفاتره القديمه ,هو طبعا مش افلاس لكن انا حبيت اعرض المره دي اول خاطرتين كتبتهم تقريبا ,هما ممكن تقول شعر او تقول خواطر , اختار انت المسمي اللي يعجبك ليهم ..

انا اكيد زي اغلبكم بدأت محاولاتي لكتابة شعر او خواطر من مرحلة ثانوي , وصراحه انا مش فاكر اي حاجه منها لان الاجنده اللي كنت بكتب فيها قد ذهبت مع الريح علي رأي الفيلم , ده غير التخاريف اللي كنت بكتبها في اي ورق الاقيه ادامي واللي معرفش برده اين انتهي مصيرها ... طبعا انا عمال ارغي ومقلتش حاجه مفيده معلش بقي لو مكنتوش انتم استحملوني اجيب مين يستحملني

ما علينا ... لما بدأت ادخل عالم المنتديات لقيت كتابات ادبيه من اشعار وخواطر عجبتني اوي فقلت اجرب انا كمان وكتبت الخاطرتين دول اللي انا وقتها كنت بعتبرهم شعر




لا تسأليني عن العنوان
فانا مثلي بلا عنوان
فانا طير جفاه الزمن بالأحزان
وغرقت في بحر عينيك بلا شطأن
أصارع أمواج الذكري والنسيان
فلقياك يمنيني بأماني الحب
وبعدك يلطمني بصخور الوهم
--------
انا طائر قد طاف حول الكرة الأرضية
وقد أضناني البحث كثيرا والبعد كثيرا
فبحثت في كل مكان
عن حضن امرأة يحتويني
عن لمسة حب تسري في شراييني
عن مرفأ قلب ترسو فيه سفينتي
فلم أجد القلب او المرسي
فعدت ثانية إليك
فاتركي السفينة ترسي
فكفاني سفرا عبرا الأمواج
وكفاني تحليقا في الأفاق
فإذا كنت انا الطائر والسفينة
فكوني أنت العش والمرفأ

طبعا ناس اتقول ايه العك ده , معلش يا جماعه دي كانت اول محاوله شعريه ..نجي بقي للمحاوله التانيه ودي بقي عكس الاولانيه بتكلم عن خيانه وغدر



لا تبكي من اجلي
ادخري دموعك سيدتي فكم من عاشقين غيري
لا تخافي لم يعد جرحي يدمي
الخنجر لم يعد في صدري
لا تلمسي الجرح لعله يشفي
لا تخشي اتهامك بالخيانة
فتلك تهمة بالية قديمة
فلكي سيدتي ان تحبين من تريدين
وتهجرين من تريدين
وتطعنين من تعشقين
فتلك امور ثانوية فلا تهتمين
فالعاشق والمعشوق سواء
والقاتل والمقتول سواء
والحب الصادق كله هباء
انا لا الومك سيدتي فاللوم عتاب
والعتاب لون من الحب وانا لن يعد لي قلب فكيف احب

انا طبعا ناس بعد ما قرت البوست بتحدفني بالكحك اللي فاضل عنهم , معلش يا جماعه انا محاولتش ان اغير اوي فيهم عشان تشوفوا اولي محاولات عكي الشعري.. كل سنه وانتم طيبين مره تانيه ودايما اكثر سعاده..