الاثنين، 26 مايو 2008

الوداع الاخير



مره في احد المنتديات قابلت موضوع بعنوان وداعها في ليلة زفافه عن فتاه بتودع حبيبها قبل زفافه لاخري وصراحه كان الحوار الافتراضي مكتوب باسلوب جميل اوي ومؤلم اوي وكانت التعليقات اللي كانت اغلبها من بنات طبعا مصدقت تصب غضبها علي الرجاله علي طريقة " يا مأمنه للرجال يا مأمنه للميه في الغربال" وهكذا , وكأن الرجاله هم بس اللي بيخونوا والبنات دايما مخدوعين ,مع ان الخيانه لا تقتصر علي جنس معين , فمثلما هناك رجال خائنين هناك سيدات خائنات , ناهيك انه احيانا تكون للظروف والاقدار كلمة الفصل في هذا الموضوع ويكون الفراق ليس بيد ايا منهما ...

وقتها انا رديت علي الموضوع بنفس اسلوبه يعني افترضت حوار لرجل يودع حبيبته في ليلة زفافها , احطلكم الحوار اللي رديت بيه وبعد كده اطرح بعض الاسئله عليكم ..

هو:غدا زفافك الى اخر..فلماذا اصررتي على رؤيتي اليوم؟
هي:كي اودعك قبل الرحيل
هو: ما أرحم الرحيل بلا وداع
هي: اردت ان اراك للمرة الاخيرة قبل ان....
هو:هل اردتي ان تتاكدي ان كانت جراحي مازالت تنزف بسببك
هي: لم اعهدك من قبل بهذه القسوة
هو:ربما اكون تعلمت بعض القسوة في مدرستك فسامحيني سيدتي ان كنت آلمتك
هي:انت تعلم اني مازلت احبك و ان هذا قدر لم يكن بارادتي
هو: دائما نتهم الاقدار عندما نريد ان نمارس القتل
هي:انت تتهمني اني قتلتك
هو:عندما نقتل انسان فانه يموت مرة واحدة لكني سيدتي بسببك اموت في اليوم مائة مرة
هي :انت تعرف اني كنت صادقة في مشاعري
هو:نعم كنتي صادقة ولكن فقط في خداعي , اني اشهد لكي سيدتي انكي اديتي دور العاشقة ببراعة
هي:هل يؤلمك فراقي لهذه الدرجة
هو :ان كنتي لا تشعري بآلمي فهو امر قد اعتدته كثيرا منك
هي:ارجوك لا تجعلني اري دموع في عينيك فانا مازلت اعتبرك فارسي الاول والاخير
هو:سيدتي ما ترينه الان هو حطام رجل لا يمكنه ان يصبح بعد الان فارس لكي او لغيرك
هي :يمكنك ان تنساني ان اردت
هو :ان كان يمكني ان امحو ذاكرتي لكي انساكي لكن كيف سانزع كل هذا الحزن التي زرعتيه في قلبي
هي: هل يمكن ان تسامحني
هو:ساسامحك ان تمكنت من نسيانك
هي: هل يمكن ان اري ابتسامتك قبل رحيلي
هو: نعم سابتسم لكني اخشي ان تكون تلك ابتسامتي الاخيرة


وكمان انا كنت كتبت خاطره بالعاميه بتحمل معني مشابه

بتقوليلي انا كنت ايه عندك
اعترفلك قبل وداعك
يمكن يكون اخر لقا
ايوه حبيتك اوي
ايوه حسيتك اوي
وعشان كده انجرحت منك اوي
اسمحيلي ابعد
يمكن اقدر اداوي جروحي
اسمحيلي ابعد
يمكن قلبي يقدريتغلب علي حزنه
اللي بقي يسكن جوه ضلوعه
دلوقتي مش ادامي غير
اني الملم ذكرياتي
دلوقتي مش ادامي غير
اشيل صورة ملامحك من حياتي
صحيح صعب قلبي ينسي جرحه منك
و كمان صعب نبضه يبطل يتهجي اسمك
بس اوعدك اني احاول اغفرلك واسامحك وانساكي




نجي بقي للاسئله


هل يا تري لو كنت مررت بتجربة حب فاشله واعطيت الحق ان تعيد عقارب الساعه للوراء هل ستكرر هذه التجربه مره اخري علي اساس انك رغم الالم التي حملته لك فانها حملت ذكريات جميله كما مثلت تجربه هامه في حياتك تعلمت منها الكثير ؟؟؟؟؟؟؟؟

ياتري ستوافق ان حبيبك يحضر فرحك لو كان من حقك دعوته ام لا خاصه لوكان احد الاقارب او المعارف ؟؟؟؟

وهل لو قدم لك حبيبك دعوه لفرحه ستوافق علي الحضور ام لا ؟؟؟؟؟؟؟؟

هناك 44 تعليقًا:

Unknown يقول...

السلام عليكم ورحمة الله وبركاته
الفارس الملثم
الاجابة هى
لالالالالالالالالالالالالالالالالالالالالالالالالالالالالالالالالالا
فى جميع الاسئلة
لانها مفروض بتبدى او هو بيبتدى حياة جديدة !يبقى ايه لزمته (الماضى )يجيبه امامه .لو هو الطرف الاخر فى علاقة الزواج دى كان رضى خطيبته تحضر صديقها القديم او خطيبها السابق!!!
نحن مسلمون ومن قبلها (وللاسف الشديد) شرقيون يامحمد ولسنا معتادون على هذا.
الماضى خليه ماضى: هى دى النصيحة اللى ممكن تقولها فى هذا الموضع.
وتقبل تحياتى واحتراماتى

Miss. Sosa يقول...

السلام عليكم

اجابات الاسئلة التلاتة بلا

فالاول انا لن اتحمل قصة حب فاشلة تقلى بظلالها علي حياتي المستقبلية وانا ذاكرتي قوية هنيى بصعوبة والذكريات ديه هتفضل تعذبني وتؤرقنة مدى الحياة لتقتص مني او لتعاقبني علي جرم غالبا لا يد لي فيه

التاني والتالت لاا لا هقدر احضر زفافه ولا عايزاه يحضر زفافي لان الصورة اللي هتلتقطها عدسات العين في المشهد ده هتفضل تطاردك طول عمرك فبلاش نلقطها من الاساس

تقبل تحياتي ومروري

بنات صاحبة الجلالة يقول...

الفارس الملثم

احساس الوداع الاخير دا صعب جدا يمكن انا عشت التجربة دي بكل قسوتها بس الظروف هي اللي فرقت بينا مش جوازه والمؤلم اننا اتقابلنا بعد الوداع الاخير دا من غير محد فينا يقدر حتي يسلم علي التاني ويمكن لما قريت البوست دا سواء الحوار او الابيات الجميلة دي حسيت ان شايفة الموقف دا تاني قدام عنيا

بالنسبة لاسئلتك صعب ان حبيب يحضر فرح حبيته ويشوفها بتتزف لحد تاني غيره وصعب كمان ان الحبيبة تتحمل تحضر فرح حبيها وفي راي لو حد من الطرفين دعا التاني لفرحه يبقي عايز يخلص تاره منه بس مش اكتر عايزة يوريه انه ارتبط بشخص افضل ليس الا

انا اتفق مع الدكتورة حبيبة قلبي نورهاتي ان مفروض الماضي صفحة بتنطوي ولازم تتقطع من حياة الانسان خصوصا لما يبدا حياة جديدة

معلش يامحمد اسفة علي الاطالة بس بجد موضوعك حلو اوي تقدر تقول كمان جه علي الجرح

لك خالص تحياتي وتقديري

بيعجبني جدا اسلوبك مشاء الله عليك

ريمو

ليله بكى فيها القمر يقول...

السلام عليكم
مبدئيا لازم نقر و نعترف بجمال مشاعرك و ورقه احاسيسك
والموضوع اللى انتا كاتب عنه دا فعلا مهم اوى
انا عن نفسى لو بحب واحد و سابنى حتى لو غصب عنه اكيد هجرح جرح كبير اوى و الدنيا هتقفل فى وشى و هقعد كتير على ما اقدر اتعايش مع الوضع و افكر انى ابدأ من جديد لكن لو بدأت من جديد ان شاء الله اكيد هقطع صفحات الماضى و احرقها و على اد ما اقدر احاول انى انسى
وبالتالى طبعا اجابه سؤالك هى
لالالالالا
لو حبى الاول هيجوز عمرى ما هحضر فرحه
الانسان مش ناقص مواجع

الآء يقول...
أزال المؤلف هذا التعليق.
الآء يقول...

في الثلاث حالات ستكون الاجابه لاااااااااااااااااااااااااااااا

صاحب المضيفة يقول...

هي القصة صعبة للغاية


وأعرف من زف من كانت تحبه بنفسه


كان يوما عصيبا عليه


لكن يبدو أننا ننظر للموضوع بزاوية غير التي يفترض النظر منها حين وقوع الأحداث


ربما ....


لكن برأيي الأفضل لا يحضر أي منهما فرح الاخر


ذاك أفضل كثيرا


تحياتي

شهد الكلمات يقول...

بالنسبة للسؤال الاول
فلو الزمن رجع بحد انجرح و قاله تحب تاني ولا لا يبقي لالالالالالالالالالالالالالالالالالالالالالالالالالالالالالالالالالالالا اية اللي يجبر حد انه يرجع للوجع برجليه من تاني و الحزن و ألم و مهما كان القصة دي كان فيها فرح فاكيد الالم فيها اكتر


اما باقي الاسئلة التانية انا اتعرضتلها بس مش بالصورة دي يعني واحد قريبي و تقدملي و رفضناه بس طبعا فرحه لازم نحضره لانه قريبي و الحمد لله اني مش كنت بحبه والا كان هايبقي شعور صعب قوي عليا

لكن مانكرش ان وجودي في فرحه كان صعب عليه هو :(

آخر العنقود يقول...

اقول ايه بس
مواقف رائعة واجمل مافيها واقعيتها وملامستها للكثير من قرائك

طبعا الحالة دى احنا شوفناها كتير فى افلامنا ويمكن منها شافها فى حياته
بس الاكيد اننا بقينا بنتأثر قوى باللحظات دى ومن كتر تكرارها فى اذهانا بقينا نخاف نفرح
بجد يامحمد اوقات كتير بحس اننا فعلا بنخاف نفرح عشان مش ننجرح
بنخاف نفرح عشان يمكن مش من حقنا
مش عارفة انا حاسة انى غيرت الموضوع ولا دخلت غلط
:))
بس الاكيد انى اعتقد ان الاجابة هتكون ب.لااااا
الحمد لله لم امر بهذه المواقف ويارب ما امر بيها
بس اكيد متوقعة وحاسة برد الفعل القاسي على الاتنين

عشان كده من الافضل جدا ليهم النسيان وبداية الحياة الجديدة مع من اراد الله
فقدر الله كله خير

وبلاش نقلب المواجع عشان نقدر نفرح بجد
وبلاش نتكلم فى الماضي عشان ما نقدر نصدق الحاضر والمستقبل ونعيشه صح

نفسي اعرف انا بطول فى الرد ليه
:)
ماعليك غير انك تستحمل وتقرا بقى

تحياتى ليك يامحمد
كلمات العامية جميلة واسلوب جديد منك

دمت بخير وود

غراب يقول...

السلام عليكم و رحمة الله و بركاته
...............................
بداية كدة ربنا ما يجيب فراق ابدا
و لا يكتبه علي اي حد بيحب بجد
أما بالنسبة للأسئلة
ف الأول الحب هيفضل حب مهما الدنيا عدت و اللحظات فاتت و مهما كانت ظروف البعد او الفراق .
هنفترض زي ما انت بتقول ان الزمن هيرجع بيا تاني أعتقد اني هكررها لأنها أكيد هتبقي بتمثل لي أحاسيس جميلة و ع الاقل أحاول اني اصلح الخطأ اللي ف المرة الاولي.
أما السؤال التاني و التالت فأنا عن نفسي أفضل ان ميكونش في حضور لا ني و لا منها لأن خلاص ساعتها مش هيكون ليه لازمة خالص غير اني اتالم أكتر و هية برضه نفس الكلام و أعتقد ان منفيش حد بيحب حد بجد هيستحمل الموقف دة لانه أكيد هيكون مشهد صعب جداً

تقبل تحياتي ومروري :)

Unknown يقول...

السلام عليكم ازيك يا فارس يا ملثم

اولا الخاطره بتعتك حلوه و عجبتنى
بالنسبه لللاسئله...
1-طبعا لا
2-لو بحب مش هجوز غيرهااصلا
3-مش هقبل الدعوه بس هروح و ابص عليها من بعيد

تحياتى

سنووايت يقول...

الخيانة بالطبع ليست مقتصرة علي جنس معين , فالرجل والمرأة سواء, الاقدار احيانا بيكون لها دور كبير ولكن اي ظروف من الممكن تخطيها لو كانوا الاتنين متاكدين من بعض وعندهم ثقة في بعض وفي علاقتهم.

الفراق اصعب احساس في الدنيا وللاسف حياتنا كلها سلسلة متلاحقة من انواع الفراق المختلفة سواء السفر , قطع علاقة انتهاءا بالموت. واعتقد في كل الحالات بيكون نوع من الموت ولو حتي موت المشاعر وانكسارها.

لو هايرجع بية الزمن بعد تجربة حب فاشلة هاعيد التجربة تاني مش بس لاني عشت فيها احاسيس جميلة ولكن علشان اكيد اتعلمت منها حاجات كتير , ولاني مؤمنة بان كل شيء بيحصل في حياتنا بيحصل لسبب ولحكمة معينة , كان لازم تقابل الانسان دا وتحبه وتسيبه علشان تعرف حاجة معينة لكن طالما ان الموضوع انتهي بفراق لازم اكون عارفة انه لو كان فيه خير ما كانش انتهي وان الفراق هنا خير لينا احنا الاتنين , احيانا بنفضل نندم طول حياتنا علي فراقنا لاشخاص معينيين واحنا مش عارفين ان كان ممكن لو كملنا نكره بعض , كان ممكن نعيش اسوأ حياة ممكن اتنين يعيشوها , كان ممكن حاجات كتير اوي تحصل ربنا منعها بانه خلانا نسيب بعض في الوقت الصح حتي لو كنا احنا شايفينه غلط.

أكيد لو كملت مع شخص تاني استحالة اعزمه في فرحي , حفاظا علي مشاعره , حفاظا علي مشاعري , وحفاظا علي مشاعر الشخص اللي وافقت اشاركه حياته ووفاء ليه , لاني يوم ما هاخد خطوة اني ارتبط بشخص تاني استحالة هتكون مبنية علي ذكريات وحنين لشخص لازال يسكن قلبي وذاكرتي لان ساعتها هابقي باظلم 3 اشخاص , فكدة كدة في فرحي الشخص دا هيكون انتهي من حياتي الي الابد وان كانت ذكرياته كانسان عرفته بما تعلمته من التجربة لم تنتهي.

ونفس الكلام لو هو قدم لي دعوة فرح لان دي تبقي خيانة للانسانة اللي هي وافقت تشاركه حياته حتي لو الموضوع انتهي وحتي لو هي ما عرفتش.

موضوع مركب اوي رغم انه بيحصل كل يوم الاف قصص بتنتهي والاف جوازات اللي بيسموها "جوازة والسلام" بعد تجارب فاشلة وتسرع وقبول اول من يطرق الباب للاسف , او محاولات فاشلة لتناسي حب بحب اخر في عجلة.


ياااااه كتبت تعليق كبير اوي :)بس كلماتك كعادتها اثارت بداخلي كم هائل من المشاعر
واسمح لي اهديك جزء من قصيدة "مازلت اذكرها" لفاروق جويدة:
******

الآن تجمعنا الليالي بعدما
أخذت من الأزهار كل رحيقها..
الآن تجمعنا الليالي بعدما
سلبت من النظرات كل بريقها..
اليوم تلقاني كما تلقى الغريب
بيني و بينك قلعة قالوا لنا..
شيئا نسميه النصيب

ونظرت حولك في ألم
ورأيت في عينيك شيئا عله
حزن.. حنين.. أو بقايا من ندم
وعلى قميصي نام منديلي على وجه القلم
هذي هداياها تحدق نحونا
منديلها كم بات يسألني
متى الأيام تجمع.. شملنا
ورأيت قلبي تائها بين الزحام
لا شيء يسمع لا حديث.. ولا سلام
أنا لا أرى شيئا أمامي غير ذكرى.. أو لقاء
رجل توقف بالزمان.. وقد بنى
قصرا كبيرا. .في الفضاء
فلتعذريني أنني.. ما زلت أنظر للوراء

و سمعت صوتك في زحام الناس
يسري.. كالضياء..
((زوجي فلان))..
((هذا فلان))..
قد كان يوما.. من أعز الأصدقاء
نظرت إلي وحدقت
هيا.. لنذهب للعشاء.

الفارس الملثم يقول...

norahaty..

في بعض التجارب بيكون حضور الماضي مش اختياري ابدا ,يعني مثلا يكون قريب للعائله او تربطه بهم صله وثيقه ,فبتكون الدعوه هنا ضروره ..

كمان ردود افعال البشر تختلف وتفسير المواقف يختلف ,فقد يكون عدم الحضور هو المثير للتساؤلات ..

منوراني دايما يا دكتوره ..

تحياتي وتقديري
محمد

الفارس الملثم يقول...

Miss. Sosa..

طبعا وجهة نظرك وجيهه جدا , لكن كما قلت مسبقا اختيارات البشر وردود افعالهم تختلف .. اشكرك جدا لتفاعلك ومشاركتك معنا برايك

تحياتي وتقديري
محمد

الفارس الملثم يقول...

بنات صاحبة الجلالة ..

انا بجد اللي اشكرك يا ريمو باثرائك الموضوع بردك المميز جدا ومشاركتنا بتجربتك , طبعا اتفق معاكي ان الموقف ده صعب جدا , فانا هنا تحضرني قصه لفتاة اشترطت لاتمام زواجها الا يتم دعوة ابن عمها التي كانت تحبه , طبعا ربما في موقف مشابه لفتاه اخري تصر علي حضوره لتظهر انها نست الحب الذي كان او لتؤكد له انه هو الخسران ..

فردود البشر تختلف , لكن ايضا ملابسات واسباب الفراق تكون لها تاثير كبير في ردود الافعال ..

تحياتي وتقديري
محمد

الفارس الملثم يقول...

ليله بكى فيها القمر..

بداية اشكرك جدا لمجاملتك الرقيقه , ودايما منوره مدونتي المتواضعه ..

واضح من ردك انك شخصيه رومانسيه جدا وانك لو مررتي بتجربه مماثله ايكون تاثيرها صعب جدا عليكي ..

ربنا يبعد عننا جميعا الم الفراق ولحظاته العصيبه ..

تحياتي وتقديري
محمد

الفارس الملثم يقول...

الآء..

نورتي يا الاء , بس ايه الرد القصير اوي ده هههههههه

تحياتي وتقديري
محمد

الفارس الملثم يقول...

صاحب المضيفة ..

عارف يا بومالك ساعات الانسان بيحب يحط نفسه في اختبار حتي لو قاسي عليه , علي اساس نظرية تطبيب الجرح بكيه بالنار حتي لو كان مؤلم جدا عليه

تحياتي وتقديري
محمد

الفارس الملثم يقول...

شهد الكلمات ..

انا طبعا معاكي ايه اللي يخلي الانسان يعيد الالم تاني حتي لو كان في ذكريات جميله , لكن في نفس الوقت تجربة الحب دي اتديني خبره مهمه جدا قد لانتمكن من الحصول عليها الا باجتياز تجربة الحب تلك

بس الحمدالله انكي لم تجتازي هذا الاحساس الصعب , منوراني دايما يا شهد

تحياتي وتقديري
محمد

الفارس الملثم يقول...

آخر العنقود..

لازم اقولك كل مره ان بنتظر تطويلك ده , لان ردودك بتعجبني بصوره خاصه , علي فكره انا فاهم قصدك , ان احيانا بيكون الخوف من الفراق بيجعلني نخاف نحب او نرتبط بحد اوي عشان منتالمش لو قدر علينا الفراق

انا سعيد جدا برايك وبردك يا اماني ومنوراني كده دايما

تحياتي وتقديري
محمد

الفارس الملثم يقول...

غراب..

فعلا يا غراب تجربة الحب دي رغم ما بيها من الم فانها حملت لحظات وذكريات جميله صعب التخلي عنها

بس لازم برده لو كتب علينا الفراق اننا ننسي ونطوي الصفحه دي من حياتنا لان الحياه لا تتوقف ابدا عند شخص او تجربه مهما كان تاثيرها علينا

نورتني بجد يا غراب

تحياتي وتقديري
محمد

الفارس الملثم يقول...

karim..

بداية منورني يا كريم وسعيد جدا بمرورك ورايك ..

, بس ازاي مش اتجوز تاني ,عمر الحياه ما تتوقف عند شخص مهما احببناه او عند اي تجربه مهما كان تاثيرها القوي علينا..

تحياتي وتقديري
محمد

الفارس الملثم يقول...

سنووايت..

طيب اقولك ايه بعد الرد الرائع ده , عارفه ان تعليقك ده ينفع يكون بوست مستقل , لانه بجد اعجبني جدا وحمل استطرادات لم يتضمنها البوست نفسه , واختيارك لهذا الشعر رائع وموفق جدا

اشكرك وبشده سنووايت

تحياتي وتقديري
محمد

مها يقول...

محمد

كالعادة .. أسلوبك المبدع والصادق يأسرنا..أما إجابتى عن أسئلتك فهى سؤال جديد:

"ومافيش حكاية بتستمر زى ما بدأت ليه على طول"؟؟؟؟؟؟؟

Empress appy يقول...

ل يا تري لو كنت مررت بتجربة حب فاشله واعطيت الحق ان تعيد عقارب الساعه للوراء هل ستكرر هذه التجربه مره اخري علي اساس انك رغم الالم التي حملته لك فانها حملت ذكريات جميله كما مثلت تجربه هامه في حياتك تعلمت منها الكثير ؟؟؟؟؟؟؟؟

لو فكرت ارجعها يبقى علشان اصحح حاجات وبكون عرفت سبب الفشل فبصلحها بس عموما لو كنت بحب الشخص ده فعلا

ياتري ستوافق ان حبيبك يحضر فرحك لو كان من حقك دعوته ام لا خاصه لوكان احد الاقارب او المعارف ؟؟؟؟


هيحضر هههههههههههههههه بس هو مبقاش حبيب خلاص

وهل لو قدم لك حبيبك دعوه لفرحه ستوافق علي الحضور ام لا ؟؟؟؟؟؟؟؟

رحت حضرت قبل كده وكنت مبسوطه انه مبسوطه ههههههههههه

GiGi world يقول...

بوست بجد روعه
وتسمحلى اجاوب على الاسئله بالف لا
ببساطه لانه انسان خائن وبقى فى انسان تاني جميل صادق فى كل مشاعره وكل حاجه عملها علشان يتمم فرحتنا اساسا مش هفتكره لان بقى فى انسان بكل العالم اللى حواليك خلاص
موضوع انه يديني دعوه فرحه اكيد لا
لانه انسان انتهى من الوجود وممكن فعلا اهزقه لانه بيحاول يبقى زي الذئاب ولا كانه عمل حاجه
انا على فكره ماحدش يفهمنى غلط انا بصراحه ماحصليش كده بس بحد نفسي فى الموقف ممكن اموته لان انا مش بحب الكدب والخيانه ولا اطيقهم من اى فرد مهما كان

GiGi world يقول...

بالمناسبه مدونتك دي من اجمل المدونات اللى زورتها من صدق معانيها وهدوئها ورومانسيتها الرائعه ربنا يكرمك ويخليهالك

الفارس الملثم يقول...

مها..

انا سعيد جدا برايك ده يا مها , وبلاش كل شويه تقفلي المدونه بتاعتك ,لانها بجد مدونه جميله اوي

تحياتي وتقديري
محمد

الفارس الملثم يقول...

appy...

رحت حضرت قبل كده وكنت مبسوطه انه مبسوطه ههههههههههه

علي فكره الجزء ده بالذات لفت نظري في تعليقك , يعني ايه ؟؟؟؟؟؟؟؟؟

هو مين اللي كان مبسوط بالظبط ههههههه

نورتي يا ابي

تحياتي وتقديري
محمد

الفارس الملثم يقول...

GiGi..

عندك حق في انه لو انسان خائن ميستحقس غير الاحتقار , بس خالك بالك برده يا جيجي ان في فراق مش بيكون سببه خيانة احد الاطراف , يعني بتكون للاقدار الكلمه العليا فيه ومش باختيار حد فيهم

بجد انا سعيد جدا برايك ده في مدونتي المتواضعه , وا ن شاء الله متكنش اخر زياره

تحياتي وتقديري
محمد

GiGi world يقول...

على فكره انا كبنت بشوف انه اذا ماوقفش ادام كل الظروف يبقى برده خائن وماقدرش المشاعر دي
عن نفسي مش هسمح ان واحد يهد المشاعر اللى بينا مهما كانت الظروف
ياريت تبقى تقرا ردي على الكومنت بتاعك فى مدونتى

الفارس الملثم يقول...

GiGi..

رغم ان رايك فيه بعض القسوه , بس انا معاكي برده ان في ناس بتتحجج بالظروف عشان تتخلي عن مسؤلياتها وعن وعود الحب اللي قطعتها علي نفسها

تحياتي وتقديري
محمد

غير معرف يقول...

لا تقولي ارادت الاقدار انكِ اخترتي والحياة اختيار

و الله ياسيدي الواحد ساعات بيتقهر على الشئ يعني مجبر اخاك لا بطل

اجي لاسألتك

هل يا تري لو كنت مررت بتجربة حب فاشله واعطيت الحق ان تعيد عقارب الساعه للوراء هل ستكرر هذه التجربه مره اخري علي اساس انك رغم الالم التي حملته لك فانها حملت ذكريات جميله كما مثلت تجربه هامه في حياتك تعلمت منها الكثير ؟؟؟؟؟؟؟؟
اكيد لو الدنيا رجعت بيا لورا هعيد التجربة لانها هتعلمني كتير واكيد فيها ذكريات واكيد لو رجعت برضو قلبي هو قلبي ولازم غصب عن عين اللي جابوني هيحب

ياتري ستوافق ان حبيبك يحضر فرحك لو كان من حقك دعوته ام لا خاصه لوكان احد الاقارب او المعارف ؟؟؟؟
والله لو طالبه معاه انو يحضر يحضر اكيد طالما كل واحد بئى فناحية فالموضوع مافيهوش نقاش وحضوره مش هيغير شئ

وهل لو قدم لك حبيبك دعوه لفرحه ستوافق علي الحضور ام لا ؟؟؟؟؟؟؟؟
لالالا مش عشان بئى مش اضايق نفسي وكده لكن انا مابحبش اخدع حد وابئى اودام مراتو ولا خطيبته رايحة ابارك وانا اكيد تكون نيتي رايحة اشوفه

فكرتني ببوست عشية زفافه عندي

منى يقول...

الموضوع صعب اوى انا مره كتبت فى المدونه موضوع عشان مش نتعرض لحاجه زى دى
لكن برضه محدش بيهرب من قدره
انا مش قادره اتخيل الموقف بس هحا
السؤال الاول طبعا لاء دانا اتمنى افقد الذاكره عشان انسى
السؤال التانى لو حاسه ان فى بينا حاجه لسه مكنتش هتجوز غيره اساسا لكن لو الموضوع انتها فعلا وهو من الناس اللى المفروض تحضر يبقى يحضر
السؤال التالت ايوه هروح عشان يعرف ان مجرد ان فكر فى حد تانى يبقى بالنسبه لى ولا حاجه
بس تصدق مش عارفه لو حصل حقيقى كنت هعمل ايه
ربنا مش يكتب على حد فينا حاجه زى دى
فعلا القلب الخالى ده نعمه

سؤال بقى بره البوست
المنتدى اللى كان فيه الموضوع كانت كاتباه ريما ولا لاء
اصلى قريت حاجه زى كده من حوالى سنه فى المنتدى الوحيد اللى اشتركت فيه وقفل بعد مده فجاءه وكان نفسى اطمن على اى حد من اعضاءه لو تعرفهم وخصوصا ريما دى كنت بحبها اوى

تخيل لسه فاكره الناس دول واساميهم فى المنتدى وحاسه انهم وحشنى جدا رغم انى مش قعدت فيه غير شهرين
يعنى اللى يخون حد عرفه مباشره وحبه وحلموا سوا انهم يكملوا مع بعض يبقى حد مش يستاهل اننا حتى نبكى عليه
رغم ان اكيد هنبكى وهنتعذب اوى
تحياتى وتقديرى

Unknown يقول...

لو قدم لى حبيبى دعوة لفرحة لن احضرها حتى لو اقرب المقربين لى لانى لا اقبل الخيانة باى نوع

الفارس الملثم يقول...

نوره الخشن..

طبعا زي ما قلتي في اجابه , مهما حملت نجربة الحب معاناه فاننا تعلمنا بالتاكيد منها الكثير , وكما يقال من لا يتالم لا يتعلم وان كانت فرصه لتصحيح بعض الاخطاء

نورتي يا نوره , وربنا يوفقك في الامتحانات ..

تحياتي وتقديري
محمد

الفارس الملثم يقول...

منى..

اجابتك للسؤال الاول فكرتني بحد معين , بصي هو احنا لو لسه الحب ده تعبنا ممكن فعلا نتمني زي اجابتك ,اننا نفقد الذاكره ..

اجابتك السؤال التالت تتوافق مع وجهة نظري لاننا لو مقدرناش نروح فرحه رغم دعوتنا يبقي يدل ده علي اننا لسه بنحبه ... بس لو كان في خيانه فيبقي هو حتي ميستهلش اننا نتواجد في مكان موجود هو فيه ...

انا قريت الموضوع بتاع ودعاها في ليلة زفافه من كام شهر في منتدي بس كان باسم واحده تانيه وهي باين كانت نقلاه من مكان تاني فمتهيالي مش هو المنتدي اللي تقصديه , هو كان اسمه ايه المنتدي ؟؟؟؟؟

احيانا فعلا الانسان بيفتقد شخصيات واقلام مميزه ويبقي نفسه يعرف اخبارهم ..

تحياتي وتقديري
محمد

الفارس الملثم يقول...

ايوية ..

جزيل الاحترام لرايك , وحضرتك منوراني دايما

تحياتي وتقديري
محمد

واحد من البلد دى يقول...

بص يا حماده ياحبيى
أنا من أنصار عدم الإلتفات للخلف..
يعنى ماضى (No)يا عم إحنا فاضيييين للحاضر لما أنت عايز تجيبلنا الماضى..
الله يسامحك..
(فكرتنى بالذى مضى)
مع الإعنذار للمبدعة..مارى منيب

الفارس الملثم يقول...

واحد من البلد دى..

هههههههههههه

معلش يا باشا , بس انت عارف في ناس كده غاويه تنكد علي نفسها وكمان علي الناس جابوه لنفسهم وقرروا يقرلولها هههههههه

منورني دايما باشا

تحياتي وتقديري
محمد

حمامة يقول...

هو الموضوع الرئيسى افتكر انه كان حلو فعلاً قريته قبل كده
وردك حلو جدا
بس بين ضعفه اوى قدامها
هى متستاهلش غير انه يبصلها شذراً اصلاً

اما بالنسبة للأسئلة
والله هى ممكن احب انها تتكرر بس مش حباً ف الذكريات لأ
علشان اتعلم اللى انا اتعلمته منها
وممكن اقول لأ
لانى كنت ساذجة وانضجك عليا او لانى ضيعت مشاعرى ع الفاضى

بالنسبة لدعوة الفرح
بالطبع لأ
ليه نزود الألم

الفارس الملثم يقول...

حمامة..

هو اكيد صعب اي رجل يبين ضعفه بالدرجه دي لكن يمكن حبيت الرد باسلوب الموضوع الاصلي

احنا ممكن نعيد التجربه تاني لو رجع الزمن عشان الخبره اللي تعلمناها منها , وكمان لاننا ممكن نصحح اخطأنا ونكون اكثر قدره في التحكم في مشاعرنا ..

نورتي بجد يا حمامه

تحياتي وتقديري
محمد

GiGi world يقول...

لا حضرتك رايح فين طيب مين هيتنقدنى دايما
ربنا يكرمك ويارب يكون الغياب ده لسبب خير يارب
اتعودنا على مشاغباتك وعلى بوستاتك الرائعه
ربنا يكرمك ويعزك يارب

الفارس الملثم يقول...

GiGi ...

متشكر اوي يا جيجي علي سؤالك , واسف علي الغياب ..

والله مانا مشاغب ولا حاجه بس هي باين بتيجي معاكي كده

ان شاء الله ازور مدونتك بس استحملي بقي هههههههه

تحياتي وتقديري
محمد

users online