الأحد، 22 يونيو 2008

تسقط الدراسة وتحيا الاجازة "1"

عند عمل المدونه بدأت بمذكرات خفيفه عن مرحلة المدرسه واسمحوا لي اعادة تنزيلها واستكمالها وذلك كنوع من التغيير عشان حاسس اني جبتلكم اكتئاب من البوستات السابقه واتمني تعجبكم



ربما تسائلون ما سبب هذا العنوان ؟؟

هذا كان شعار الطلبة في مدرستنا في المرحلة الابتدائية , طبعا لان المدرسة وقتها كانت عملنا قلاقيع وعقد نفسية كتيره , وتحس كده يا اخي ان الكبار كانوا بيحسوا بالغيظ وهم شيفنا مبتسمين للحياة وكمان متفائلين " اه صحيح ايه السبب اللي بيخلي الاطفال مبتسمين للحياه كده , هما مش عارفين اللي ايحصلهم لما يكبروا مممممممم"


وعشان تعرف ايه اسباب العقد النفسية اللي كانت سببها المدرسة لننظر للطفل قبل مرحلة المدرسة ..

فهو يستيقظ من النوم كيفما يشاء " حلوة كيفما يشاء دي اهي دروس اللغة العربية بتنفع برده "يقضي اغلب اليوم في اللعب كما يريد " لا العربي بتاعي جامد بجد ..الله يرحمك يا سيبويه "دون الاضطرار لسماع تلك العبارة البغيضة التي يتلذذ الكبار وهم يقولونها بعد ذلك " انت قاعد تلعب انت معندكش مذاكرة ولا ايه" ناهيك عن قواميس اسماء الدلع التي يتفنن الكبار في اطلاقها علي احبائهم الصغار قبل المدرسه

بينما هو يجد نفسه الان فجأة ملزم بالاستيقاظ في السادسة صباحا وترك الفراش بينما اسنانه تصطك من شدة البرد ليشرب اللبن تحت تهديد السلاح , طبعا انا لو حتي اعلنوا الاحكام العرفيه لا ممكن اشرب اللبن , لكني كنوع من الحل الوسط وبعد مفاوضات كنت اوافق علي الشاي بلبن بشرط ان يكون دور اللبن فقط تغيير لون الشاي قليلا



ثم الاضطرار للجلوس في الفصل محكومين بقوانين وقواعد لا مجال فيها للدلع المعتاد في البيت , واحب ان اشير ان اغلب جيلنا خاصة من مرتادي المدارس الحكومية لم يعرف دلع الكجيهات " قصدي الحضانة يعني " اللي ممكن اعتباره تمهيد جيد للاطفال قبل المدرسة " الجيل ده محظوظ في حاجات كتير اتعرفوها لما اكمل , جتنا نيلة في حظنا الهباب"

لكن والحق يقال انها كانت اجمل مراحل العمر واني عندما كبرت اكتشفت بالفعل "اني كنت بتبطل علي النعمة" ..


كان حينها الديسك ياخد ثلاثة من الطلبة , ولا اعلم لماذا كان حظي في اول سنة ان اجلس بجوار فتاتين
" هو التعليم باظ من شوية"

طبعا الطفل وقتها بيكون فاغر بقه علامة الاذبهلال والدهشه والتساؤل المحير هو ايه اللي جبني هنا ؟!


طابور الصباح


طبعا طابور الصباح ده اول شئ يجب ان يدركه الطفل لتعلم النظام والانتماء , فتتردد الموسيقي المدرسيه ويبدأ الطلبه في ترديد اناشيد بغبغائيه تذكر بداية المدرسة وتنتهي باغاني وطنيه دون ان نفهم او نعي شئ مما يقال!!

" كان في اغنيه وطنيه بنقولها وقتها عرفت بعد كده انها لمحمد ثروت بتقول -- يا عروسة النيل يا سمرا يا اصيله يا اميره , هما مهما يقولوا عنك وردة الامه العربيه معلش لو في اي غلط في الكلمات الحكاية دي بقالها اكتر من عشرين سنه المشكله بقي اني قعدت فتره كبيره نفسي اعرف مين دي اللي الناس بتلسن عليها كدها واللي خلت المؤلف ما يخلصوش وكتبلها الكلمات دي عشان يطيب خاطرها ؟؟؟


الواجب من امامكم والمدرسة من ورائكم وطريقك مسدود مسدود

كانت اكبر عقدة نفسية سببها الرئيسي الواجب , وكان الواجب اشبه بالمقدر والمكتوب لا مجال للهروب منه فهو عامل كده زي الدين هم بالليل ومذلة بالنهار, طبعا لانك مضطر انك تترزع " الرزعقة كما قال احد الابهات تعبير اصطلاحي لم يفطن له سبويه في معجمه وهو اسلوب ديمقراطي يعني متحطش منطق ولا كلمة ولا نفس " طوال اليوم بعد رجوعك من المدرسة امام كراسة الواجب لتمارس اشغال شاقة هدفها الرئيسي ايه فكروا كده ؟؟؟؟؟؟؟؟؟؟؟


طبعا عشان العيال يقعدوا مكتومين طول النهار وما يقرفوش اهليهم , ويبدوا ان الحكومة عندنا بتتتبع الاسلوب ده بس بطريقة مختلفة شوية


طبعا احيانا كنا احيانا نلجأ لاساليب الفهلوة المعروفة لدي كل المصريين , اقللكم ازاي بس مش عاوزين الكلام ده يتسرب بره , مثلا مفروض الدرس مثلا يتكتب تلات مرت , اثناء الكتابة يتم اختصار كام سطر, يعني لو فوتنا كل شوية سطر محدش اياخد باله , واحنا طبعا عارفين الكتب المدرسية مليانة دش فالكلام اللي ملوش لزمة نفوته والجيش بيقلك اتصرف , ويبدو ان مدرسة العربي مكنتش بتاخد بالها او بتنطش بمزاجها


واحيانا ربنا يرزقنا بواحد من جيرانا يكون مؤمن بقضية الطفل ويشفق علينا ويساعدنا في كتابة الواجب ولو إن الطريقة لها اثار جانبية وخيمة , لاني ولا فخر كان خطي مميز عند مدرسة الفصل " طبعا لان خطي كان زبالة وكثيرا ما كنت اسمع عبارة انه عامل زي نقش الفراخ ,محدش يا جماعة يقولي نقش الفراخ ده ايه "


وللحديث بقية

هناك 61 تعليقًا:

akeed يقول...

فكرتنا بايام زمان ....

البوست رائع
تحياتى

اكيــــــــــتد

و القادم....أجمل يقول...

هههههههههههههه
هههههههههههههههههههه
هههههههههههههه

بجد كانت ايام صعبة اووووووي
و
" جتنا نيلة في حظنا الهباب"

أسلوبك رائع ما شاء الله
ال مين سيبويه دا
:D

لا حقيقي مستنين الباقي
:)

احترامي لك

HeBa يقول...

أسلوبك جميل جدا

فعلا أيام المدرسة كانت أحلى أيام

بانتظار البقية

تحياتي ..

الفارس الملثم يقول...

فكرتنا بايام زمان ....

البوست رائع
تحياتى


ياريت الطفولة تعود

اسعدني مرورك ورايك اكيتد , وانتظر مرورك دوما

الفارس الملثم يقول...

أسلوبك رائع ما شاء الله
ال مين سيبويه دا


ده عمنا اللي عمل النحو هو والخليل بن احمد الله يبشبش الطوبة اللي تحت دماغي

انا سعيد انها اعجبتك وربنا يستر في التكملة

الفارس الملثم يقول...

أسلوبك جميل جدا

فعلا أيام المدرسة كانت أحلى أيام


دلوقتي بنقول الكلام ده , بس وقتها كان هاين علينا نولع في المدرسة

متشكر اوي يا هبة علي رايك والتكملة في الطريق انشاءالله

شهد الكلمات يقول...

تعرف اننا رغم المرمطة اللي كنا بنتمرمطها في المدرسة و الصحيان بدري و الواجب و الثانوية العامة و خلافة

الا ان ايام المدرسة اهون ميت مرة من التخبيط و السواد اللي احنا عايشينه دلوقت من حرقة دم في الشغل و اختلاط بناس ما يعلم بيها الا ربهم و خوف من المستقبل و قلق من اللي جاي

ربنا يستر علينا في الايام المنيلة دي

تحياتي

حمامة يقول...

هههههههههههههههه

فظيعو يا محمد اسلوبك لذيذ موت

بجد ضجكتنى :)

على فكرة المدونة الجديدة اتفتحت

تعالى باركلى بقى

http://dontbeabore2.blogspot.com/

منى يقول...

تصدق انى لحد دلوقتى مش بحب اسمع صوت الراديو لانى كنت بصحى عليه ايام المدرسه
والله انا مش كرهت غير الابتدائى بس
لكن اعدادى وثانوى كنت مش بحب الاجازه
مستيين الجزء التانى بسرعه
تحياتى

فارس بلا جواد يقول...

هههههههههههههههه
تصدق كنت فاكر أن انا بس اللي باكروت الواجب .. وافوت كام سطر من غير ما حد ياخد باله
اصل حاجه تغيظ فعلا تكتب الواجب في 3 ساعات و تيجي الميس تصححه في 3 ثواني قال يعني قريته
بس كانت ساعات تاخد بالها وتقولي هو الواجب ماله خاسس ليه كده
ااااااااه كانت ايام حلوة بجد

سنووايت يقول...

هههههههه

علي فكرة عندك حق في موضوع ان الجيل الجديد اللي لسة بيدخلوا المدرسة دلوقتي محظوظين , انا حاسة انهم هيلغوا التعليم كله علي ايامهم

اول مرة اقرالك بوست ساخر كدة بس بجد جميل جدا

"" بينما اسنانه تصطك من شدة البرد ليشرب اللبن تحت تهديد السلاح , طبعا انا لو حتي اعلنوا الاحكام العرفيه لا ممكن اشرب اللبن""

عذاااااااااااااب
وخصوصا بقي ان الواجب كان بيبقي علي شاكلة 10 مرات ومرة املاء , منتهي الملل ,

رجعتنا لأيام جميلة علي الرغم من كل الماسي اللي كانت بتحصل فيها
في انتظار الجزء التاني

Unknown يقول...

كانت أيام جميلة يا محمد والله الواحد بيفتكرها بالرغم من القرف اللى فيها بس احسن من دلوقتى كتير
مستنيين البقية
تحياتى

غير معرف يقول...

ياربي على دي اياااااااام
والواحد كان مؤدب جداً سبحان الله
بس عارف انا كمان كنت مستحيييييييييل اشرب اللبن بس كنت بشرب شاي بلبن وساعات بئى عشان اغيظ ماما أقوم دلقهلها على الدريل بتاع المدرسة وتتغاااظ (منا لازم اردهالها ولا ايه)
بس فعلا لحد اعدادي كده كنت طفلة مطيعة طاعة عمياء لدرجة ان مرة مدرسة قلتلنا ياحلوين اول ماتستلموا الكتب بتاعة السنة الجاية كل واحد فيكم يكتب كل درس 5 مرات عشان تحفظوه وانا طبعاً مابعرفش افوت مسكتلك الكتاب واديلو وماما تقولي يابنتي كفايه وانا ابداً جيت جيت بئى السنة بدأت واكتشفلك انا المدرسة اتجوزت ومشيت وجت وحدة جديدة يعني باختصار كده أبل الواجب واشرب ميته وكانت صدمتي لاتقدر بمال
هو الواحد دخل تاريخ من شوية يابروتس ياخويا مانت زمالة وعارف

حلو اوي بوست النهارده يامحمد فكرتني بايام جميلة كتير وهستنى الباقي
تحياتي ليك ولتنوع افكارك الرائعة :))

مجداوية يقول...

السلام عليكم
أخى المبدع محمد

تقول ايه بقى على اللى بيعيد الذكريات الخروبى دى من تانى ويرجع يذاكر !!! بس تعرف شتااااااااااااان بين المذاكرة دى ودى الشىء اللى تعمله برغبة وحب لا يمكن يكون واجب ولا يكون عبأ احنا للأسف لم نتعلم أن نحب العلم فأصبح عبأ وهم وفاتنا كتير وتأخرنا
جرب تذاكر حاجة بتحبحا وعايز تتعلمها حتشعر باللى باتكلم عليه وحتنسيك ذكرياتك الأليمة والطريفة فى نفس الوقت
لكن أنا مش عايزة أكون زى الأبلة أو الميس وأصحح لك الواجب لأن عندك غلطات لغوية كتير لكن حأعيدها عشان يا بخت من زار وخفف

بس فيه حاجتين لازم أقولك عليهم
أولا ردا على تعليقك عندى أنا لو شايفة أن الأدب كله حرام مكنتش دخلت مدونتك وتابعتها وعلقت وأشدت بما تكتبه فوضعك للتساؤل ده هناك مش فى محله وبصراحة أثر فيا لأنى ما قصدت اللى انت كتبته يا أخى الكريم فيه مدونات لا تكتب الا على المشاعر الحسية وشعر عن الفراق واللوعة وهو تجاوزا نقول عنه شعر ولكنه لا يمت للغة العربية ولا للشعر بصلة بل هى كلمات مرصوصة تصف حالة حب خاصة لا يجب أن تعرض على الملأ وبأسلوب ركيك وقد زرتها ردا لزيارة أصحابها ولم أستطع أن اترك تعليقا وهؤلاء من قصدتهم ,وأنا نفسى أكتب قصصا أدبية ولمحات من الحياة وما فيها من عبر فالأدب ان كان به منفعة وعبرة فكيف يكون حراما ؟؟؟أما ان كان فقط يخاطب المشاعر والأحاسيس بشكل سافر ولا فائدة فيه ولا يهم أحدا الا صاحبها فهذا ما أرفضه وهذا ما عنيته

وسوف أضع توضيحا لهذه الفقرة بالذات لأن ما قلته هو ثالث اعتراض عليها فلعلنى أسات اختيار الكلمات فساصلحها لتعبر أكثر عما قصدته


ثانيا

طبعا مدونتك وأنت حر فيها ولكن لفت نظرى ما تضعه لبيان بلدان الزوار على يسار المدونة أن بها عدد الزوار لاسرائيل !!!! فاذا كانوا أوجودها بالاحتلال وبالقوة وبالهمجية واغتصاب الأراضى وقتل المسلمين وبالهيمنة الأمريكية فلا نوجدها نحن فى مدوناتنا ونعتبرها دولة وهى آفة سرطانية احتلت أرضنا واحتلت قدسنا !!!

لا تعتبر لهجتى الغاضبة موجهه اليك أخى الكريم فأنا اعلم تماما مدى حرصك على دينك وعلى اسلامك فالغضب فقط من ذكر هذا المحتل ومن يعينه
ولكن الله معنا وهو المستعان عليهم

أعتذر جدا للاطالة
وسلام الله عليك ورحمته وبركاته

Blue Nile يقول...

اد ايه استمتعت وانا بقرا البوست ده
طريقتك في سرد الاحداث جميلة جدا وممتعة
وتعليقاتك اللي في النص دمها خفيف
مستنين باقي الحكايات

Miss. Sosa يقول...

السلام عليكم

بوست جميل اوى ودمه خفيف .. عجبتني اوى مقولتك الواجب زي الدين هم باليل ومذلة بالنهار هههههههههه بجد التشبيه ده بليغ اوي

فكرتني بالماضى الاليم كنت بقعد انحت فى الواجب لما ايدي تتبري بس الصراحة ده كان واجب نصف السنه اللي كان اكتب الكتاب كله 10 مرات حاجة كدا قزقزة لب .. اما الايام العادية الواجب ماكنش همه تقيل كدا
المهم كنت بكتب مع واحدة صاحبتي والاقيها بتنجز وانا بطيئة بطء السلحفاة بعدين استفزيت قولتلها لا بقى الموضوع مريب جيت اقرأ اللي بتكتبه لاقيتها بتسقط سطور فى الكتابة بس برضو الخايب خايب وماعملتش زيها.

كنت قريب انا واختى عن محل فراخ وخرج شوية بنات من المدرسة ولابسين برمودا وحاجات لحد الركبة ولبس غريب كدا كل الناس تنحت .. قام الواد اللي بينضف الفراخ بيقوله اشمعنا احنا كانوا زلينا ولازم نلبس مريلة المدرسة قام الواد اللي معاه قالوا اصل جيلنا كان بيريل فبيخافوا علينا نبهدل الهدوم فلبسونا مريلة ههههههه

بجد حاجة تنقط .. بس برضو زمان ارحم من دلوقت ومذاكرة زمان ارحم من السواد اللي بنذاكرة دلوقت

Unknown يقول...

السلام عليكم ورحمة الله وبركاته
فكرتنا بأيام التعاسة الشديدة ليه بس يامحمد !!!!!!؟؟
انا كنت شاطرة للغاية ليس حبآ فى الدراسة ولكن خوفآ مما كان يمكن ان يحدث لو لم اكن كذلك (الضرب ,الاستهزاء, التذنيب و(حجرة الفيران) بالاختصار كلها اشياء (مؤلمة)تعفى نفسك منها بوضع (وشك) ليل ونهار فى الكتب.
لو عددت المرات التى (انضربت )فيها فى المدرسة يمكن ما تكمل اصابع اليد الواحدةوالله يامحمد(كانت مدارس خاصة ذات مستوى معين والا ما كان الوالد الله يرحمة يرضى يدخلنى اليها,ومع كل ذلك لو سألتنى ماذا كانت المدرسة بالنسبة اليكِ؟ اقولك :العذاااااااااااااااااااااب
وبوست جمييييييييييييييييييييييييييل
يامحمد بالرغم مما ذكرنى من ايام الشقاء
والعذاب والالم ووووووووووووووووووووو
ولا اقولك كفاية كده
احتراماتى ودعواتى.

moro_wbs يقول...

السلام عليكم ورحمة الله وبركاته ..

الصراحه موضوع جميل ... ومدونه اجمل ...

فكرتني بايام المدرسة .... ياه .. وكنت بكرة انا جدا طابور الصبح دا ... وياما الواحد انجز في الواجب ..

لكني كنت طفل برده ... انما سنة الانجاز اللي بجد كانت اولى ثانوي والثانوية كلها ... ومع كل دا دخلت هندسة ... ودي كانت اكبر غلطه ... يلا ما علينا :)

اتكلمت كتير اوي انا ... بس بجد اسلوبك جميل ... والمدونة دمها زي العسل ..

ربنا يكرمك ... تعيش وتفتكر :)

GiGi world يقول...

ليتالطفوله والذكريات والصفاء النفسي والعقلى يعود يوما
ياه كانت ايام بعيده عن كل مايحيطنا الان من هموم ومشاكل وضوغوط من كل ماحولنا
ربى انت اعلم بنا ربى ارحمنا
تحياتي

كاميليا بهاء الدين يقول...

هههههههههههههه

ههههههههه

ذكريات جميلة

مليئة بكوارث كنا بنعملها

البوست جميل اوى

فى النتظار البقية


تحياتى

Ghada , Rofayda يقول...

كانت ايام وعدت للاسف....
كاااااانت اجمل ايااااام
ذكريااااات جمييييييله....

كنت بحب الطاااابور جدااااا وبزعل من اللي بيقول ان الطابور وحش

ومكنتش بحب الاجازه وكنت بحب الدراسه خصوصا ايام الامتحانات...

كنت عجيييييييبه.........

بوست رااااااااائع

تحيااااااااتي

دمت بخير........

walaa يقول...

تصدقك رغم كل اللى انت قولته ده بس هى احلى ذكريات ادينا كبرنا واخرجنا دلوقتى بنقول ياريت نرجع تانى وتبقى هموم مذاكره وبس
انا قعدت اضحك وانا بقرا البوست وبقول فيييييين ايام الطفوله
ايه بقه
تحياتى ولاء

الفارس الملثم يقول...

شهد الكلمات..


شكلك يا بنتي لسه مكتئبه مممممممممم

بس طبعا كلامك صح , كانت ايام اجمل بكتير من دلوقتي

تحياتي وتقديري
محمد

الفارس الملثم يقول...

حمامة..

الحمدلله انها عجبتك , انا زرت مدونتك الجديده طبعا وجبتلك علبه شيكولاته كمان ههههههههه

منوراني دايما يا حمامه

الفارس الملثم يقول...

منى.....



اشمعنايعني , علي العكس انا كنت بحب ابتدائي اكتر , عشان كنت بقي طفل هههههههههه

منوراني دايما يا مني

الفارس الملثم يقول...

فارس بلا جواد.......

هههههههههه

بجد .... حلوه حكاية الواجب خاسس دي , هي كانت بتوزنه ولا ايه ههههههه

نورتني يا فارس باشا

الفارس الملثم يقول...

سنووايت ..

هههههههههههه

ما انا بقول كده برده , دلوقتي تلاقيهم يجوا من المدرسه يكتبوا الواحب في عشر دقايق وبعد كده يتنحوا ادام قنوات الكارتون " مش بقولك جتنا نيله في حظنا الهباب "

منوره يا سنووايت

الفارس الملثم يقول...

ayman badr..

اكيد يا ايمن كانت ايام اجمل بكتير ...

,منورني يا باشا دايما

الفارس الملثم يقول...

نوره الخشن ..

والله يجد يا نوره في حكاية الواجب دي كانوا بيفتروا بجد , يعني لدرجة لو في اجازه ولا حاجه , ميخلصهمش نقعد مستريحين , لا بيتوصوا بالواجب دوبل واحيانا كنا بنكتب اكتر من نص الكتاب في اجازة نص السنه

تدلقوا اللبن علي هدوم المدرسه وتقولي مطيعه ههههههههه

علي فكره انا متخيلك انك كنتي طفله مشاكسه ممممممم

نورتي بجد يا نوره

الفارس الملثم يقول...

مجداوية..

طبعا مفيش اطاله ولا حاجه ,علي العكس متابعتك لمدونتش شئ يسعدني ويشرفني ..

طبعا الانسان لما بيحب شئ بيكون تعامله معاه مختلف , واكيد دي احدي مشاكلنا اننا لا نتبع طرق سليمه لتحبيب الطلبه في العلم..

بالنسبه للاخطاء اللغوية خليها عليكي المره دي , هو عموما البوست يجمع بين الفصحي والعامية نظرا لاسلوبه الساخر نسبيا

طبعا رغم تفهمي قصدك الان لكن رغم كل شئ كل انسان حر ان يعبر عما يريد في مدونته باي اسلوب يريد طالما لا يوجد خروج عن الاداب المعروفه بل حتي لو كان هناك خروج فتلك قناعاتهم الشخصيه لا يمكن التدخل فيها, وطبائع البشر تحتلف وتطورهم الوجداني والعقلي يخضع لظروفهم الخاصه ...

بالنسبة لحكاية اسرائيل طالما اننا مازلنا امة متطفله علي ما ينتجه الاخرين فلا مجال للتحدث عن مقاطعتهم , ولو كان هناك برنامج تكنلوجي او اي انتاج برمجي يرفض الاعتراف باسرائيل ارجو ابلاغي به

حقيقي بيسعدني تواجدك وردودك

تحياتي وتقديري
محمد

الفارس الملثم يقول...

Blue Nile..

حضرتك اللي نورتي المدونه وانا سعيد جدا ان البوست عجبك

مع خالص تحياتي

الفارس الملثم يقول...

Miss. Sosa

ههههههههههه

بجد تعليقك ضحكني , ده طلع حكاية كروتت الواجب دي حاجه منتشره اوي بين طلبة المدارس ..

طيب انا نفسي اعرف هما كانوا عاملين اجازة نص السنه ليه هما كانوا بيعاقبونا بيها ولا ايه ممممممم

نورتي يا سوسا

الفارس الملثم يقول...

norahaty......

ياههههه للدرجاتي يا دكتوره كانت صعبه , يبدو ان الوالد كان صعب شويه

بس انتي رايك زمان كان احسن ولا دلوقتي؟؟؟؟؟؟؟

منوراني دايما يا دكتوره

تحياتي وتقديري
محمد

الفارس الملثم يقول...

moro_wbs..

الله يخليك يا باشا , ده بس من ذوقك , وانا سعيد ان مدونتي المتواضعه عجبتك وان البوست عجبك

مع خالص تحياتي

الفارس الملثم يقول...

GiGi ..

فعلا يا جيجي كانت ايام جميله اوي ومحسناس بقيمتها الا لما كبرنا

نورتي بجد يا جيجي

الفارس الملثم يقول...

كاميليا..

ههههههههههههه

تسلمي يا كامليا , انا سعيد ان البوست عجبك

حقيقي نورتي

الفارس الملثم يقول...

Ghada & Rofayda..

ههههههههه

لا فعلا انتي حالة استثنائيه يا غاده , بتحبي المدرسه والطابور كمان

اوعي كمان كنتي بتحبي الواجب ممممممم

حضرتك نورتيني بجد

الفارس الملثم يقول...

walaa..

هو البوست يمكن في طابع ساخر شويه , بس هي فعلا كانت ايام جميله اوي والواحد بيحن ليها اوي

نورتيني يا ولاء

مع خالص تحياتي

blue-wave يقول...

بجد رجعتنا لأيام جميله اوى غصب عنك:)
بوست هايل
تحياتى

غير معرف يقول...

بص بصراحة كده انا هعترفلك انا فعلاً كنت هادية جداً بس عنيييييييييييدة جداً جداًً لدرجة اني كنت بخبط راسي فالحيطة وادبدب فالارض من كتر العند

المشكلة بئى اني لما كبرت لسه عنيدة برضو مفيش فايدة بس الكارثة اللي زادت وغطت الشقاوة بئى لدرجة ان في مدون قريب مشهور جداً بس بلاش نذكر اسماء قالي::

((( انتي مش مؤذية اني وجودك فحد ذاته فالدنيا أذى لوحده)))

Empress appy يقول...

انا خلصت استمحانت من سنين عقبالكم يا رب بجد مرهقه

واحد من البلد دى يقول...

السلام عليكم

تعرف يا محمد

أحلى أيام
أيام الدراسة الإبتدائى بالذات

ربنا يخليك إنك فكرتنا بيها

تحياتى ليك يا جميل

مستنيك

الفارس الملثم يقول...

blue-wave>>

فعلا كانت من اجمل ايام العمر .. نورتني يا باشا وارجو الا تنقطع الزياره

تحياتي وتقديري
محمد

الفارس الملثم يقول...

نوره الخشن ــ آي و كفاية

هههههههههههههههههههههههه

هي وصلت للدرجاتي يا نوره , انتي عملتي فيه ايه عشان يقولك كده ؟؟؟؟

انا يمكن اكون ساعات عندي بس مش اوي كده ..

كون في عون مامتك ممممممممم

بس برده انا محيرني ازاي تبقي عنيده ومطيعه , الصفتين عكس بعض خالص ؟؟؟؟؟؟؟

الفارس الملثم يقول...

appy..

طيب انا جبت سيره الامتحان دلوقتي , اللي واخد تفكيرك يا ستي ..

نورتيني يا ابي

الفارس الملثم يقول...

واحد من البلد دى..

تعرف انا برده اكتر ايام بحبها كانت ايام ابتدائي ولسه فاكر ذكرياتها

منورني دايما يا باشا

momken يقول...

فكرتينى بالذى مضى

ايام حلوة وبريئه بدون مسئوليه
ولا خنقه التدوين ولا التزام تجاه حد

ياه على الروقان

تحياتى

غراب يقول...

فين الجديد

كنت معدية قولت أسلم :)

واقول الصورة اللى فوق دى جميلة اوى

شكلها جديده ياما انا مأخدتش بالى
:)

shaimaa samir يقول...

فى احلى من الطفولة

دمت بقلب الاطفال سعيدا

تحياتى

غير معرف يقول...

احلام الطفوله الضائعه

فى ديوانى
واحدةاسمها
طفولةمفقودة
ربماتمسك.. اامل ذلك

ودعواتك بصدق ان يتم الامر بسلام
وسانتظرحضوركم باذن الله
سوف انزل بوست قبلها

ولن اتقبل حججا اواعذارا

تحياتى

الفارس الملثم يقول...

momken>>

فعلا كانت من اجمل الايام , لا مسؤليات او تفكير في المستقبل

نورتني يا باشا

تحياتي

الفارس الملثم يقول...

غراب..

اه هي جديده , انا سعيد انها عجبتك

البوست الجديد في التجهيز

تحياتي

الفارس الملثم يقول...

shaimaa samir..

دام لكي ايضا قلب الطفل يا شيماء , وان شاء الله وليدك المرتقب يتنفس اولي نسمات الحياه قريبا

بجد اتمنالك التوفيق من كل قلبي

تحياتي وتقديري
محمد

shaimaa samir يقول...

اشكرك ايها الفارس
وكماذكرت
واكرر
لامبررات
ولا حجاجا

ايموشن بيرفع صباعه وبيحذر

غير معرف يقول...

والله ماعملتله حاجة لسه كل اللي بعملو اني برد عليه بغلااااااااااسة المشكلة ان اكتر واحد فالدنيا مشهور بالردود والتريئة واللسان الطويييل فتخيل بئى لما يجيلو حد يعمل فيه كده؟؟؟؟؟؟؟؟؟

و هقولك ازاي عنيدة ومطيعة
يعني مثلاً مبخدش اوامر تطلب مني الطلب بالذوق عيني ليك لكن شخط بئى والحركات الاقرعة دي لألألألألألألألألأ
تاني حاجة ممكن اعملك اللي يرضيك طول منا راضية عنك لكن ساعة مابقلب اوووووف
حاجة كمان مابعملمش غير اللي انا عيزاه وبمزاجيييييييييي يعني مش اي حاجة تتعمل اه وخلاص كده لأ
لكن ممكن اعملك الحاجة ساعات وانا مش مقتنعة بس بكون راضية عن اللي قصادي زيادة عن اللزوم وده نادر

يله بئى نزلنا باقي الحديث

Unknown يقول...

ازيك يا فارس الاسلوب معلش لقله المتابعه اليومين دول ادعيلى الامتحانات بئا
و تسقط الدراسه 100 مره


تحياتى

آخر العنقود يقول...

انا جييييييييييييييييييييييت
ايه التأخير بتاعي ده كله
بس الحمد لله انى لحقت البوست قبل الجديد ماينزل
طبعا بعتذر عن تاخيرى البشع ده لانى كنت مسافرة اضطراريا ومش كان في نت
ام هند
ازيك اولا ايه الاخبار .. يارب تكون بخير يارب
ثانيا بقى انا معجبة جدا باسلوبك الجديد فى البوستات ده
بجد لذيذ وروحه حلوة قوى ولا يخلو من روح السرد الجميلة منك

ايام الطفولة دى بالنسبة لى من اروع واشقى واهدى المراحل فى نفس الوقت
بجد لو اتكلمت عنها هتكون فيها كتير من المواقف اللى نفسي اعيشعا تانى مهما كانت لانها بكل بساطة افضل من دلوقتى
انا مش كئيبة والله ... بس انت فكرتني بحاجات فى قمة الروعة واحساس انا شخصيا افتقده حاليا
شريط طويل يمر امامي بكل مافي هذه المرحلة
بس تعرف
انى كنت بحب الطابور قوى مش عارفة ليه
اصلى انا اللى كنت ماسكة الاذاعة والقران وكنت بحبها جدا
وكنت بحب الواجب ..لدرجة انى كنت لما بخلصه بزعل قوى عشان بيكون كل اخواتى لسه بيذاكروا وانا خلصت :)
وكنت بقعد اكتب معاهم اى حاجة
ولما انا كبرت كانوا هما خلصوا وماحدش كان بيقعد معايا :(
وكان حصل لى حالة تشبع
هههههههه


تصدق ان الانسان ده غريب قوى
يعنى زمان مش كان عاجبنا حالنا ولما بنفتكره بنقول ياريته يرجع ودلوقتى احنا مش عاجبنا حالنا بس اكيد كمان سنة هنقول ياريتها ترجع
"لو علمتم الغيب لاخترتم الواقع"

ايه اللى بقول ه ده
انا عكيت ودخلت شمال وقلبتها نكد
انا عارفة ومش تقولى لا
بس بجد ايام تمثل لي اجمل الاشياء التى ربما افتقدها الان
ولكنها الايام ... والاقدار
اعاننا الله عليها

معذرة يامحمد على كلامى بجد
بس بصراحة مش قدرت امسحه
ممكن اكون حبيت انى اكتبه واقوله
رغم انى عارفة انى بعدت شوية عن اساس الموضوع
وزى ماقلتلك بقى .. عليكوا انكم تستحملوا اللى بكتبه
ودى بجد مش كئابة ... بس فضفضة وايام حلوة

وفى انتظار الباقي بشغف .. وتفكرنا باجمل ايام

كل التقدير والاحترام

الفارس الملثم يقول...

shaimaa samir..

ايه حكاية الايموشن معاكي يا شيماء , مفروض جوجل يسمع كلامك ويحطها عشانك مممممممممممم

متخفيش ادعيلك لغاية لما تنزلي الديوان ..

ربنا يوفقك يا شيماء يارب

الفارس الملثم يقول...

نوره الخشن ..

ممممممممممم

والله كلامك مفيهوش غلط .. العين بالعين والسن بالسن وعلي الغلس تدور الدواير هههههههههه

وكلامك التاني برده محدش يغلطك فيه ..الانسان بيبقي ذوق مع الانسان الذوق , اما يتنطط علينا فالعرق الصعيدي يحجر معاه طبعا..

البوست الجديد انزله دلوقتي بس ايكون قصه , اياك تعجبكم ممممممممم

تحياتي

الفارس الملثم يقول...

karim..

ربنا يعينك يا باشا , وعشان خاطرك تسقط الدراسه وكمان الامتحانات

منورني يا باشا

الفارس الملثم يقول...

آخر العنقود ..

ازيك يا اماني , انا قلت رحتي فين ,عمال ابص علي باب المدونه كل شويه ..

كنتي بتصيفي ولا ايه مممممممممم

وانت فاكره لما انزل بوست جديد حضرتك اتزوغي من التعليق , دانا ابعتلك التعليق لغاية باب مدونتك , مفيش تزويغ خالص ..

مش عارف انتي بتفكريني بزميله ليا في ابتدائي كان اسمها برده اماني مممممم

علي فكره انتي مخرجتيش عن الموضوع لان كلامك هو العمق الخفي للموضوع , انا لما كتبت عن الذكريات دي كان السبب الرئيسي هو حنيني الشديد ليها , يمكن مقدرش ادعي ان طفولتي واحة للسعادة , كان في ظروف تحمل الم ما , لكنها رغم كده كانت اجمل بكتير , لان عالمنا وقتها كان ابسط بكتير

الطفل بيتعامل مع الحزن مثلا كأنه شئ عرضي بينساه بسرعه بمجرد ما يبتدي اللعب مع رفاقه , لكن الحزن في الكبير بيبقي نافذ لروحه وحتي لما يجي يضحك بتبقي ضحكة مش من الاعماق غالبا

بجد اشكرك علي تعليقك يا اماني , وان شاء الله ايامك القادمة تكون اجمل

تحياتي ومودتي

users online