تسقط الدراسة وتحيا الاجازة "1"

عند عمل المدونه بدأت بمذكرات خفيفه عن مرحلة المدرسه واسمحوا لي اعادة تنزيلها واستكمالها وذلك كنوع من التغيير عشان حاسس اني جبتلكم اكتئاب من البوستات السابقه واتمني تعجبكم

ربما تسائلون ما سبب هذا العنوان ؟؟

هذا كان شعار الطلبة في مدرستنا في المرحلة الابتدائية , طبعا لان المدرسة وقتها كانت عملنا قلاقيع وعقد نفسية كتيره , وتحس كده يا اخي ان الكبار كانوا بيحسوا بالغيظ وهم شيفنا مبتسمين للحياة وكمان متفائلين " اه صحيح ايه السبب اللي بيخلي الاطفال مبتسمين للحياه كده , هما مش عارفين اللي ايحصلهم لما يكبروا مممممممم"

وعشان تعرف ايه اسباب العقد النفسية اللي كانت سببها المدرسة لننظر للطفل قبل مرحلة المدرسة ..

فهو يستيقظ من النوم كيفما يشاء " حلوة كيفما يشاء دي اهي دروس اللغة العربية بتنفع برده "يقضي اغلب اليوم في اللعب كما يريد " لا العربي بتاعي جامد بجد ..الله يرحمك يا سيبويه "دون الاضطرار لسماع تلك العبارة البغيضة التي يتلذذ الكبار وهم يقولونها بعد ذلك " انت قاعد تلعب انت معندكش مذاكرة ولا ايه" ناهيك عن قواميس اسماء الدلع التي يتفنن الكبار في اطلاقها علي احبائهم الصغار قبل المدرسه

بينما هو يجد نفسه الان فجأة ملزم بالاستيقاظ في السادسة صباحا وترك الفراش بينما اسنانه تصطك من شدة البرد ليشرب اللبن تحت تهديد السلاح , طبعا انا لو حتي اعلنوا الاحكام العرفيه لا ممكن اشرب اللبن , لكني كنوع من الحل الوسط وبعد مفاوضات كنت اوافق علي الشاي بلبن بشرط ان يكون دور اللبن فقط تغيير لون الشاي قليلا

ثم الاضطرار للجلوس في الفصل محكومين بقوانين وقواعد لا مجال فيها للدلع المعتاد في البيت , واحب ان اشير ان اغلب جيلنا خاصة من مرتادي المدارس الحكومية لم يعرف دلع الكجيهات " قصدي الحضانة يعني " اللي ممكن اعتباره تمهيد جيد للاطفال قبل المدرسة " الجيل ده محظوظ في حاجات كتير اتعرفوها لما اكمل , جتنا نيلة في حظنا الهباب"

لكن والحق يقال انها كانت اجمل مراحل العمر واني عندما كبرت اكتشفت بالفعل "اني كنت بتبطل علي النعمة" ..


كان حينها الديسك ياخد ثلاثة من الطلبة , ولا اعلم لماذا كان حظي في اول سنة ان اجلس بجوار فتاتين " هو التعليم باظ من شوية"

طبعا الطفل وقتها بيكون فاغر بقه علامة الاذبهلال والدهشه والتساؤل المحير هو ايه اللي جبني هنا ؟!

طابور الصباح

طبعا طابور الصباح ده اول شئ يجب ان يدركه الطفل لتعلم النظام والانتماء , فتتردد الموسيقي المدرسيه ويبدأ الطلبه في ترديد اناشيد بغبغائيه تذكر بداية المدرسة وتنتهي باغاني وطنيه دون ان نفهم او نعي شئ مما يقال!!

" كان في اغنيه وطنيه بنقولها وقتها عرفت بعد كده انها لمحمد ثروت بتقول -- يا عروسة النيل يا سمرا يا اصيله يا اميره , هما مهما يقولوا عنك وردة الامه العربيه معلش لو في اي غلط في الكلمات الحكاية دي بقالها اكتر من عشرين سنه المشكله بقي اني قعدت فتره كبيره نفسي اعرف مين دي اللي الناس بتلسن عليها كدها واللي خلت المؤلف ما يخلصوش وكتبلها الكلمات دي عشان يطيب خاطرها ؟؟؟

الواجب من امامكم والمدرسة من ورائكم وطريقك مسدود مسدود

كانت اكبر عقدة نفسية سببها الرئيسي الواجب , وكان الواجب اشبه بالمقدر والمكتوب لا مجال للهروب منه فهو عامل كده زي الدين هم بالليل ومذلة بالنهار, طبعا لانك مضطر انك تترزع " الرزعقة كما قال احد الابهات تعبير اصطلاحي لم يفطن له سبويه في معجمه وهو اسلوب ديمقراطي يعني متحطش منطق ولا كلمة ولا نفس " طوال اليوم بعد رجوعك من المدرسة امام كراسة الواجب لتمارس اشغال شاقة هدفها الرئيسي ايه فكروا كده ؟؟؟؟؟؟؟؟؟؟؟


طبعا عشان العيال يقعدوا مكتومين طول النهار وما يقرفوش اهليهم , ويبدوا ان الحكومة عندنا بتتتبع الاسلوب ده بس بطريقة مختلفة شوية


طبعا احيانا كنا احيانا نلجأ لاساليب الفهلوة المعروفة لدي كل المصريين , اقللكم ازاي بس مش عاوزين الكلام ده يتسرب بره , مثلا مفروض الدرس مثلا يتكتب تلات مرت , اثناء الكتابة يتم اختصار كام سطر, يعني لو فوتنا كل شوية سطر محدش اياخد باله , واحنا طبعا عارفين الكتب المدرسية مليانة دش فالكلام اللي ملوش لزمة نفوته والجيش بيقلك اتصرف , ويبدو ان مدرسة العربي مكنتش بتاخد بالها او بتنطش بمزاجها


واحيانا ربنا يرزقنا بواحد من جيرانا يكون مؤمن بقضية الطفل ويشفق علينا ويساعدنا في كتابة الواجب ولو إن الطريقة لها اثار جانبية وخيمة , لاني ولا فخر كان خطي مميز عند مدرسة الفصل " طبعا لان خطي كان زبالة وكثيرا ما كنت اسمع عبارة انه عامل زي نقش الفراخ ,محدش يا جماعة يقولي نقش الفراخ ده ايه "

وللحديث بقية