الجمعة، 4 يوليو 2008

تسقط الدراسة وتحيا الاجازة "2"



بناء علي طلب الجماهير نواصل تكمله المذكرات " مع ان محدش قللي كملها بس بتلكك" طبعا احب اشير ثانيه اني نزلت البوست ده زمان لكني الان اعيد تنزيله مع كثير من التعديلات


وكما يقال يوم الامتحان يكرم المرء او يهان قررت مدرسة اللغة العربية في سنة اولي عمل امتحان املاء وجون وجون وجون , نشنت يا فالح طبعا هنا الفهلوة لن تجدي نفعا خاصة ان صاحبكم يكتب اسمه بالعافيه , وكما متوقع كانت نتيجة الاملاء فضيحة بكل المقاييس " الحمدلله مخدتش صفر بلاش سوء الظن ده فقد حصلت علي 3 من عشرة مع عصيتين وصاية " يعني ختدلي عصيتين مكافاة ليا علي نبوغي , طبعا الضرب للجدعان لكن اللذي لم يكن في الحسبان تماما هو اصرار ابله دولت " اسم مدرسة الفصل " علي توقيع ولي الامر علي الاملاء " متقولش نتيجة اللسيانس " يعني مش كفاية الفضايح في الفصل لا عاوزة الفضيحة تبقي علي الستلايت ووكالات الانباء , انا قلت اتقاء للفضايح نجرب بعض الفهلوة وقد كان ..


, طبعا ابله دولت واضح انها كانت سعيدة جدا وهي تعلم علي الغلطات باللون الاحمر فكانت الكراسة اشبه بصينية من الكعك فكان من الضروري البحث عن مخرج لمأزق توقيع ولي الامر هذا ," ممكن حد من حضراتكم يقولي امضي انت , طبعا ده كان فوق مستوي نبوغي وكمان لو الموضوع انكشف اتبقي قضية تزوير في اوراق مدرسية وكما قال احد المخبرين الجريمة لا تفيد " وتفتق ذهني " تفتق دي ملهاش دعوة بالمفتقة خالص " عن فكرة استخدام الاستيكة " كان الكتالوج بتاع الاستعمال بتاعها بيقول انها بتمسح الجاف " في ازالة اثار العدوان وازالة الغلطات الحمراء وتمت العملية بنجاح منقطع النظير لكن حصل سهو بسيط جدا وهذا طبيعي في اي عملية كبيرة ومعقدة حيث تركت التلاتة من عشرة كما هي " يا سلام " طبعا حصلت علي وصلة "تهزيق "محترمة "واتجرست " يعني اتفضحت وهذه كلمة غير معروفة المصدر وجاري البحث عن مصدرها " علي مستوي الجيران لكن ربنا ستر لم يلاحظ احد ما قمت به وكانت هذه اول عملية اقوم بها من هذا النوع والاخيرة ايضا , وتعلمت اني يجب إن اقلل من الفهلوة واهتم اكثر بالمذاكرة والاملاء



للغش سبع فوائد حتي اسألوا الابله المراقبه



يجئ الطالب من الامتحان اخر انشكاح , فتستبشر والدته خيرا , وبسذاجة من لا يعلم كيف تدار منظومة التعليم في مصر تسأله .. الامتحان كان سهل ؟؟؟؟ ليرد وبراءة الاطفال في عينيه ومازال هو تحت تأثير حالة الانشكاح ..لا غشينا يا ماما



المشهد ده يصور ببساطه حالة الغش الجماعي المتفشي في التعليم عندنا , واتباعا للنظريه الميكافيليه فالغاية تبرر الوسيله , وبما ان الغايه اكيد نبيله " انه ينجح ويتخرج وربنا يكرمه ويلاقي مكان فاضي في القهوه اللي جمب بيتهم " فمش مشكله يغش ......



طبعا في ناس زي حالاتي كده في منتهي الخيابه , طبعا بالنسبه للغش , يعني لو فكروا يغشوا , يبقوا عاملين زي الكتكوت اللي وقع في بلاعه " ايه التشبيه المقرف ده " او تلاقيهم عاملين زي الحرامي اللي نسي بطاقته في مكان الجريمه لتسهيل القبض عليه ..



لذا كان الامتناع عن الغش .. مجبر اخاك لا بطل !!



لكن اللي كان يحصل في لجان الامتحان خاصه في المرحله الابتدائيه بمثابة تحريض صريح علي الغش



في لجنة الامتحان



لان مراقبة اللجنه تؤمن بالمثل اللي بيقولك " اعمل الخير وارميه البحر , تقرر الابله المراقيه مساعده الطلبه الغلابه وتغشيشهم , هي طبعا بتبقي حاسه انها بتقدم خدمه حليله للانسانيه المعذبه , بس طبعا من الاسباب الخفيه لهذا الكرم التغشيشي , ان في طالب او اكتر متوصي عليهم توصيه جامده , فهي ذر للرماد ومنع القيل والقال تقوم بتغشيش باقي الطلبه فوق البيعه

لكن من الاشياء المحيره ان المراقبه الفاضله كانت تتبع نظريه عجيبه في التغشيش , هي ان الطالب الذي يجلس في اول دكه هو بالتاكيد اكثر الطلبه نبوغا ويصير هو المرجع التغشيشي لباقي الطلبه , مع ان الجلوس في اللجنه يتبع ارقام الجلوس وترتيب الحروف الابجديه , بس تقول ايه , كل واحد ليه عقله مريحه ..

فاحيانا يكون هذا النابغه المختار" لامؤخذه حمار" ورغم هذا تصر المراقبه المبجله علي اننا يجب ان ننقل اجابات هذا العبقري الي اوراق اجابتنا والا الويل والثبور وعظائم الامور علي من يخالف اوامر سيادتها ..

طبعا العبدلله دماغه ناشفه ولو كنت مقتنع بحاجه يبقي خلاص ولو جبتلي وزير التعليم نفسه , فعشان كده كانت ترمقني بنظرات ناريه " هههههه شفتم ناريه دي لسه غشسها من روايه قرتها "






انتظروا التكملة

هناك 74 تعليقًا:

HeBa يقول...

ياه

ده أنت فرحتني بنفسي أوي

حيث أني كنت على قدر عالي من النبوغ جعل ذهني يتفتق* عن فكرة تزوير الامضاء

وحيث أني وش اجرام ومفيش مني اتنين فقد قمت عمليا بتنفيذ الجريمة الكاملةو زورت امضاء الوالد بطريقة مبتكرة

جيبت ورقة كان مضى عليها قبل سابق وحطيت الورقة عليها وشفيت الامضاء زي خرايط الجغرافيا

وقد نجوت بفعلتي ولم يكتشفني أحد حتى قمت بعدها بفترة بإفشاء سري في ساعة صفا بس كان فات الميعاد ونفدت من العقاب

تحياتي ليك وبانتظار التكملة

.....

* استوليت على تفتق بوضع اليد

تحياتي

امضاء مزور سابق

صحفية روشة يقول...

بكرة اجازة وبعده اجازة
ويوم السبت نجيب بزازه
ابقى زورنى بقة يلا باى
وشيل الورد فيبريكشين دى بتغلس على الزوار

الفارس الملثم يقول...

وقد نجوت بفعلتي ولم يكتشفني أحد حتى قمت بعدها بفترة بإفشاء سري في ساعة صفا بس كان فات الميعاد ونفدت من العقاب

ههههههههههههههه

لا مش ممكن بجد , عملية نضيفة مية مية , وعلي راي يونس شلبي عقلية معملية فذة ..

لا ياستي صعب الواحد يعمل عملية بالتخطيط ده , خلاص بعد كده ابقي استعين بيكي ما بدال انا ابوظلهم الدنيا والعصابة اتتقفش كلها بسببي ..

اسعدني مرورك جدا يا هبة ومتقطعيش الزيارات واحنا المرة الجية انوزغ هدايا علي الزوار

الفارس الملثم يقول...

بكرة اجازة وبعده اجازة
ويوم السبت نجيب بزازه
ابقى زورنى بقة يلا باى
وشيل الورد فيبريكشين دى بتغلس على الزوار


ايه يا بنتي انتي بتكتبي التعليق وخايفة حد يقبض عليكي في المدونة , ايه حكاية الورد اللي بيغلس علي الزوار دي ..

عموما ياستي تم رد الزيارة بفوائدها كمان ويجعل بيت المحسنين عمار

HeBa يقول...

يا مراحب

بلغني أنت بس بميعاد العملية من قبلها وكله هيبقى تمام يا ريس

وفي انتظار الهدايا

بالنسبة للورد فيرفيكشن

لما بتيجي تضيف كومنت بيبقى في كلمة المفروض تكتبها في المربع الفاضي علشان تبعت التعليق

هي دي بقى الورد فيرفيكشن وعلشان تتخلص منها

ادخل للسيتنج والجزء بتاع الكومينس هتلاقي في مكتوب فيها السماح بالورد فيرفيكشن واختار لا هتختفي


بس خلاص

تحياتي

الفارس الملثم يقول...

يا مراحب

بلغني أنت بس بميعاد العملية من قبلها وكله هيبقى تمام يا ريس


متشكر اوي يا فندم ,كده انقذتي البقية الفاضلة من العصابة ,انحدد العملية ونطلب من حضرتك تحطلنا الخطة

وبالنسبة للهدايا حضرتك ممكن في اي وقت تاخدي هديتك وهي طبعا دبدوب اصنا لسه مستوردين شحنة دباديب مخصوص عشان عمك فلانتين

ومتشكر اوي علي يا هبة علي تفهيمي حكاية الورد فيرفيكشن دي

غني يابهيه يقول...

الدراسه مشكله تؤرق جيل بأكمله
والمشكله الكبرى بقى ان انا فى جامعه خاصه والكل بيبص لى على انى بانجح بفلوسى
ومحدش يعلرف اللى فيها
ادعيلى
معلش زيارتى كانت متأخره شويه

الفارس الملثم يقول...

ادعيلى
معلش زيارتى كانت متأخره شويه


انشاء الله ربنا يوفقك يا باشا , منور المدونة وياريت متقطعش الزيارات

مع خالص تحياتي

(( قيثارة الأحلام )) يقول...

اولا بشركرك جدا على زيارتك لمدونتى المتواضعه وثانيا عيشت اجمل اللحظات وانا بقرأ اسلوبك المميز فى القصه القصيره بجد بفرح اوى لما بدخل مدونه والاقيها بتحترم عقول البشر ربنا يوفقك واتمنى زيارتك تتكرر ان شاء الله واوعدك انى هكون متابعه كويسه لكل ابداعاتك

الفارس الملثم يقول...

اولا بشركرك جدا على زيارتك لمدونتى المتواضعه وثانيا عيشت اجمل اللحظات وانا بقرأ اسلوبك المميز فى القصه القصيره بجد بفرح اوى لما بدخل مدونه والاقيها بتحترم عقول البشر ربنا يوفقك واتمنى زيارتك تتكرر ان شاء الله واوعدك انى هكون متابعه كويسه لكل ابداعاتك


بداية اشكرك قيثارة علي تشريفك لمدونتي وبالتاكيد ساكون من المتابعين لمدونتك المتميزة , واتمني الا تكون تلك زيارتك الاخيرة وانتظر تواجدك ورايك دائما في اعمالي , وانا سعيد ان مدونتي المتواضعة نالت بعض استحسانك

مع خالص تحياتي

الفارس الملثم يقول...
أزال المؤلف هذا التعليق.
سارة علي يقول...

وكما يقول اصحابى زاكر تنجح غش تجيب تقدير وترتب على الدفعة بس تغش ايةولا اية الامتحان طويل والاجابةااطول فاكرتنى بايام زمان وحاليا برضو اهو بنعمل بمقولة المال الحلال اضمن والغش اكيدمش حلال
اهوخلصنا معمعة ال13مادة وبنجهز كمان ارباجية عشان التدريب الصيفى اهو بدل المصيف
معلش طولت عليك
فى انتظار جديدك المميزدائما
تحياتى

Unknown يقول...

السلام عليكم ورحمة الله وبركاته
محمد الفارس الملثم
ايه المواهب المستخبية دى
انا ضحكت لما قلت يابس
واتاريك ماانتش برىء ولا حاجة
ومستخبى فى الدرة.
تصدق يامحمد انا كنت شاطرة اوى فى المدرسة لكن برضه وزى ما بيقولوا لكل حصان كبوة
والكبوة دى كانت فى 5 ابتدائى
(كحكة فى الحساب!!! )
ياخرابى !!!طيب اعمل ايه
اوريها للحاج الوالد ازاى وما اعرف رد فعله جتبقى ايه لان عمرها ما حصلت لى ,بس بقى ربك رحيم بعباده ,المدرسه كانت حطت الكحكة بالقلم الاحمر الرصاص مش الحبر ولا الجاف وبالتالى اتمسح بالاستيكة العادية لحد الحاج ما وقع التوقيع الكريم ورجعنا حطينا الكحكة تانى!!
والحمد لله ربك حليم ستار على (التلاميذ اللى زى حضرتك وحضرتهم وحضرتى)
بوست سكر يامحمد وخلانى حابص لك بصه تانية من هنا ورايح بصه كده هوه(وجه مطلع حاجب ومنزل حاجب وفاتح عين وقافل التانية...ياوووووه يامحمد خلى خيالك واسع واتصور ما اريد ان اقوله)
نهارك ابيض وفل يامحمد
وتشكراتى


و

شهد الكلمات يقول...

لا انا مع الاسف الشديد كنت متبعة مبدا لا اغش ولا اغشش عشان حرام بس في مرة في الجامعة كان امتحان لاتيني و متحان منيل بستين نيلة و انا و الاتيني مش بنحب بعض اصلا و المراقبين لاقوا تاثير الامتحان علي وجوه الممتحنين فقالوا يعملوا الخير و يرموه البحر و فتحوا الباب للغش و انا بعيد عنك لا عارفة اغش ولا القط كلمة و الكلمة تعدي جنب ودني اعمل نفسي مش واخدة بالي و اقول مش هاسرق تعب غيري

و في الاخر طلعت بالمادة و اللي غش نجح !!!!!

انت يا استاذ فين التاج :(

ماشي ماشي احنا فينا من الكلام ده

حمامة يقول...

:)
بجد خلتنى ابتسم جداً وانا متضايقه

فيه شوية اكسبرشنز رهيبة ( حلوة اكسبرشنز دى ثقافة بقى B) )

انا مش فاكرة اوى وانا صغيرة كده
لكن انا طول عمرى مبعرفش ولا بحب اغش
بس بغشش مية مية

ف امتحان الاحياء ف 2 ثانوى مكنتش عارفه حاجة بصراحة يعنى
جابولى ورقة اجابة قدامى

ولا رضيت انقل حاجة
هنقل حاجة مش فهماها ازاى

وكانت النتيجة .. حدث ولا حرج :D
حولت أدبي طبعاً بسببها

بس كان ليا واحده صحبتى بغششها كل الامتحانات

الحمد لله جابت 80% ودخلت اداب

الطريف بقى ان يوم النتيجة انا جبت 92.3 وهى جابت 80

كانت موعدانى انها لو نجحت تجيبلى هدية
طبعا انا مكنتش هاخد حاجة
بس لقيتها بتتصل بيا بتقولى

ازاى انتى تيجبى 92 وانا اجيب 80
انتى كنتى بتغششينى غلط ولا ايه

ههههههههههههههه

طيب اقولها ايه دي

منا مش معقول هاغششها كل الامتحان يعنى

بس والله كنت بغششها صح :D

كمل يابنى كمل

انا اهو بقولك كمل ولا مش كفاية ؟

إنتظارات شاهقة يقول...

هههههههههههه
جميل اوى البوست
ضحكت جدا لما نسيت التلاتة من عشرة
اظن واخد التلاتة على حروف الجر
بس اهوة معانا النهاردة كاتب متميز
وخطة جميل نعرفة من الف خط
ههههههههههه

سردك اكتر من رائع
لم يعوقنى حرف اثناء القراءة

go on

blue-wave يقول...

حلو البوست:))
تحياتى

غير معرف يقول...

ههههههههههههههههه

ده انت زماله حتى فموضوع الغش يامحمد
يخرب بيتي كنت برضو مبحبش احرج نفسي وكنت واثقة فنفسي ثقة رهيبة يعني اللي انا عرفاه هو الصح يعني هو الصح

اما بئى عن الاملاء فهقولك على حاجة لذيذة
انا كنت شاطرة فيها جداً(الله اكبر ايه هتنق ولا ايه) وبعدين ايه كنت كل اسبوع اجي اقول لماما جبت عشرة من عشرة ياماما ففمرة جت بنت خالتي تعمل زيي فبتقول لأمها جبت2 من عشرة ياماما
وعينك ماتشوف الا النور
كليك طخ بووووم دج أأأن ان أأأأأن
حتة علقة معتبرة
من ساعتها البت حرمت تنطق

كمان كنت دائماً أجي من المتحان ماما تستقبلني حليتي ايه يانوووووووور
( طبعاً حرف الواو المتكرر ده عشان هى بتكلمني برقة فالاول كده لسه العلقة قدام) أجي اقولها حليت ده وده وده بس
تقولي اااااه بستنى انا كلمة بس دي والله
منا عمري ماحليت امتحان كامل مكمل حتى لو عرفاه كلو
كنت بزهق بصراحة وايدي بتوجعني
لأو اللي يضحكك كانو سزج اوي نفسهم يدخلوني صيدلة او طب زي بقية العيلة اللعينة وانا احاول اقنعهم افهمهم يمين شمال عشان مايخدوش الصدمة ودوول ابداً (هما اللي يستاهلوا بئى) ياجدعان طالب طب ده باين بس هقول ايه
انت قولتلها كل واحد دماغه مريحاه !!

وبعدين ايه موضوع محدش طلب بقية الحلقات ده منا طلبتها يابني .. يلا هستنة المصيبة التالتة بتاعتك
واسفة للاطاله

بيقولك خريجين تاريخ دوول اعظم ناس !!!

فارس بلا جواد يقول...

يا راجل بقي كنت بتاخد 3 من 10 في الإملاء وطلعت موهوب كده .. امال لو كنت بتاخد 10 كان زمانك بقيت عباس العقاد ( بالمناسبة عباس العقاد مالهوش علاقة بالشارع اللي في مدينة نصر خالص)
ههههههههههههههههههههه
بوست جميل ومميز يا محمد
بالتوفيق دايما

aya يقول...

طب معلش ممكن الواحد يسال يعني ابطل ضحك امتي بالظبط
يالهوي مش عارف تزور امضه بابا ايه الطيبه دي
طب لما تمسح المعركه الي كانت في الورقه تنسي الدرجه ددي المصيبه لوحدها
عجبتني دماغك الناشفه دي
عي فكره حصل معايه نفس الموقف في ماده العلوم في اعدادي تقريبا مدرس رياضه دخل يغششنا واان معجبتنيش الاجابه طلع عليا اغنيه في المدرسه
اما مدرسين اخر زمن
بجد بوست يجنن خااااااالص
بسرعه نزل التكمله بئا

بنات صاحبة الجلالة يقول...

هههههههههههههههههههه

الاول ازيك يامحمد ايها الفارس الملثم لقد عدت مجددا جبتلك معاي السمك والكابوريا وام المنخلول علشان بس متقلش علي الاسكندرانية بخلة ولاحاجة

ثانيا بقي نجي للبوست اللذيذ دا انت محتاج كورس في الغش كيف تغش جيدا بدون ان يفقسك احد هههههههههههه

وبعدين اية الانجاز دا جايب 3 من عشرة انت ممتاز هههههههههه بس بجد تسلم ايديك بوست جميل وضحكني والله جدا

تحيا الاجازة ميت مرة
خالص تحياتي لك

ريمــو

آخر العنقود يقول...

واضح ان انا اللى محتاجة نضارة يافارس
ومعذرة على تأخيري اللى بقى كتير اليومين دول
عديها لنا بقى

بجد بجد اسلوبك لذيذ جدا فى السرد والعرض
موضوع الغش ده مشكلة كبيييييييييييرة
تعرف انا طول عمرى واصحابي كانوا طول السنة بيدعوا ويقولوا يارب ما تيجي فى لجنتنا
:))
بخليهلم مقفلة من كل ناحية
بجد ..... ال كنت بتغاظ قوى لما انا اكون مظبطة فى كله وبمنتهى البساطة تيجى واحدة تاخد ورقتى لواحدةتانية عشان تنقل
ياحلاوة وبمنتهى البساطة
انا بقى قولت لا مش هينفع النظام ده خااااااااااالص
ورغم ان والدى كان ليا اصحاب فى المدرسة بس من كتر احراجي ليهم لما بيطعوللى مش بقوا يعبروني
ههههههههه
ويبقى نهارهم فل اللى بيكون فى لجنتي
:)
ياااااااااااااااااه
ايام جميلة والله
ومبرووووووووووووووووك صحيحي على ال3من 10
ده انجاز
فى انتظار باقى المغامرات
معذرة تانى على تاخيري

نـــــور يقول...

والله انت سكر خالص
ازيك يامحمد الاول قبل المعاكسات
دمك زى العسل وبعدين يابنى حرام الغش ده حتى لو اخرته القهوة..
بجد استمر ياخايب املاء واحنا هنستحملك امرنا لله..
دمت بخير

سارة علي يقول...

بالعكس يا محمد انا سعيدةجدا بكلامك بس تفتكر اية اللى ممكن اغيرة هل اخفف من الافكار يعنى كفايةمثلا فكرةواحدة مفهومة ومعاها اسلوب ولغويات قوية وابعد عن الغموض ؟ تفتكر دة هيكون احسن
منتظرة ردك

الفارس الملثم يقول...

سارة علي>>

علي فكره حتي الغش ده موهبه ههههههه

انتي عارفه كمان في بعض المواد لو حطيتي الكتاب قدامك مش اتعرفي تحلي برده ..

ربنا يعينك , وانا رديت في مدونتك علي سؤالك , وجميله التجديدات اللي عملتيها في مدونتك

تحياتي

الفارس الملثم يقول...

norahaty..

هههههههههههههههههههه

يا سلام يعني زورتي في كعكه رسميه مممممممم

انا بقي اللي خايب لما حبيت ازور عملت زي همام في امستردام طويتي الريش هههههههههههه

طيب انتي عندك حكايات اهو مش بتحكيلنا ليه ممممممم

تحياتي دائما
محمد

الفارس الملثم يقول...

شهد الكلمات

ههههههههههههه

طيب كنتي القطيلك كلمتين استجوبيهم وبعد كده خليهم يعدوا هههههههه

نصيحه هامه للاطفال الصغيرين بلاش تغشوا يا حبايبي وانتم ان شاء الله اتسقطوا

منوره بجد يا شهد , ومتقلقيش علي التاج انا شيله في مكان امين , اوعي تكوني عاوزه تخديه تاني مممممم

تحياتي

الفارس الملثم يقول...

حمامة..

ههههههههههههههه


يعني صاحبتك مجبتش الهديه وكمان مش عاجبها مممممممم

مين اكسبرشنز , ده حد نعرفه , طيب هو جاله من ايه ده
طيب وانتي صح اللي جبلك البتاع ده ,الاكسبرشنز , استني اجيب القاموس واجيلك هههههههههه

منوره بجد يا حمامه ويبعد عنك اللي ميستسماس ده

سلاممممممممممممممم

الفارس الملثم يقول...

احلام اليقظة ..

هههههههههههههههه

لا التلاته من عشره كانوا بدل تعب ,يعني الغلطات دي كلها مش مجهود برده , بس تصدقي ممكن لو كنت اديتها الورقه بيضا كانت ادتني درجه زياده بدل نضافه ممممممممممم

بس المهم ان خطي عجبك ههههههههههه

منوره بجد

الفارس الملثم يقول...

blue-wave..

نورت يا باشا

تحياتي

الفارس الملثم يقول...

نوره الخشن ..

ههههههههههه

مش عارف يا نوره دايما ردوك مشكله لوحدها خفة دمك مشكله يا بنتي

يعني انتي السبب في ضرب البت مممممممم

علي فكره انا بعد كده كنت بجيب برده عشره من عشره , والله ابله دولت كانت طيبه برده , كان اللي يجيب عشره من عشره تكافئه وتجبله بسكوت بالشيكولاته , وصاحبك يعز اي حاجه فيها شيكولاته فكنت بهتم بالاملا عشان كده بس هههههههههههههه

بس تصدقي متخيلك دلوقتي وانتي دكتوره مممممم بس طبعا كده عظماء التاريخ اينقصوا واحد

بس ايه رايك نعمل جمعيه نلم فيها عظماء التاريخ اللي زي حضرتنا قبل ما ينقرضوا ههههههههههه



سلامممممممممم

الفارس الملثم يقول...

فارس بلا جواد..

ههههههههههههههههه

ما هي التلاته من عشره دي هي اللي فجرت المواهب المكبوته ههههههههههههه

منورني دايما يا فارس

الفارس الملثم يقول...

tota..

ما هو محدش نبهني يا توتا ازورها ازاي ههههههههههه

مبروك انك خلصتي اخيرا ومستنين النتيجه مممممم

بس انت مقلتيش هما في طب بيغششوا ولا لأ مممممممممممممممم

نورتي بجد يا توتا

الفارس الملثم يقول...

بنات صاحبة الجلالة..

هههههههههههه

هو حد يقدر يقول علي الاسكندرانيه بخله برده

ما هو محدش فهمني ازاي اغش ,ناس معندهاش دم , كنت زماني دلوقتي بقيت عميد الكليه ههههههههه

نورتي بجد يا ريمو وحمدالله علي السلامه , وبلاش غياب تاني

الفارس الملثم يقول...

آخر العنقود..

هههههههههههههههههه

خلاص انا وانتي نشوف محل نضارات كويس عشان النظر خلاص بقي شيش بيش ههههههههههه

علي فكره ده اللي بيحصل , يعني لو مردتيش تغشش يبقي مش تخلصي من النميمه عليكي

صراحه كنت بتحرج لما حد يسألني واضطر اجاوبه بس طبعا دي سرقة مجهود حد بيذاكر.............

بعد كده اعمل عليكي غرامة تاخير وقد اعزر من انذر مممممممممم

نورتي بجد يا اماني

تحياتي ومودتي
محمد

الفارس الملثم يقول...

habiba..

ده بعض ما عندكم يا فندم ,باماره الماسنجر اللي يخليكي تعزلي من البيت ههههههههه

بس شكلك كده مصدقتي تمسكي عليا زله , واتفضحيني وسط الاخوه المدونين , مكنش العشم عععععععععععععععععع

نورتين بجد يا حبيبه بس الكلام اللي اتقال في المدونه ده سر مممممممم

سلاممممممممممم

محمد فاروق الشاذلى يقول...

عزيزى الفارس الملثم
ده أول مرور ليا فى مدونتك وبرضو لقيت شهد الكلمات مسيحالك بسبب التاج زى ما عملت معايا.
على فكرة حكاية درجة الإملاء دى مش مقياس بدليل مستوى المدونة الجامد ده
بس ليا ملاحظة على المدونة إذا سمحت
ياتغير لون الخلفية السودا ((وده الأحسن)) ياتغير ألوان الكتابة بحيث تكون ألوان فاتحة علشان أخوك ((اللى هو أنا إذا سمحت لى بالشرف ده)) لابس نظارة كعب كوباية ومش شايف حاجة مما أضطرنى ((حلوه دى)) إنى أعمل كوبى من البوست واخده على فايل وورد علشان أعرف أقراه.
ورغم هذه الصعوبات عجبنى البوست برضو.
والسلام ختام.

غير معرف يقول...

لأ نتجمع ايه يابني وننقرض ايه منغير مانتجمع مش هننقرض يامحمد .. اساسا بتاع تاريخ ده بيكون باين تحس انه خارج من متحف الشمع

Rania Lelah يقول...

اول ما بدات التدوين بدات مع تاج عن مذاكراتك
:)
البوست دة حلو قوى يا محمد
و يا ريت تكمل
ادينى قلت اهو
:)

تحياتى

شهد الكلمات يقول...

إعلان هام

تم بحمد الله افتتاح فرعنا الجديد في المدونات مدونة حكاوي القهاوي
تعاطفك واحده مش كفاية أتبرع و لو بزيارة
تعالوا زورونا باي باي
http://hakawyelahawy.blogspot.com/

سنووايت يقول...

هههههههه
3 من 10
وكمان في الاملاء
سبحان الله
امال لو كانت 9 ولا عشرة كنت عملت ايه

بجد بجد تسقط الدراسة وتحيا الاجاااااازة

منى يقول...

اه فعلا اكتر حاجه بتغيظنى اللى بيعتبر الغش رحمه والاكتر حق كمان

هما ساعات بيبقوا ناس طيبين بس تفكيرهم غلط
وفعلا مش اى حد يعرف يغش دى موهبين
كان معايا زمايل موهوبين بجد
ههههههههههه
الحمد لله معنديش الموهبه دى

على فكره كل ما اجى اعلق يحصل حاجه واقوم
تحياتى

Blue Nile يقول...

جميل اوي يا محمد
مستنية لباقي
اكيد ليك مغامرات مع الحساب تجنن
اما الاملا عملت فيها كده امال الحساب يبقى ايه

Unknown يقول...

السلام عليكم ورحمة الله وبركاته
احببت ان اسلم عليكم ما قبل النوم
سلام يامحمد

غير معرف يقول...

ايه يا عم المسخره دى
وبتقول ما حدش قال لك تكتب يومياتك
خدها منى نصيحه اوعى تكتبها تانى
بهزر
سلام

فارس بلا جواد يقول...

السلام عليكم ورحمة الله وبركاته
دى اول زياره للمدونه بتاعتك
الحقيقه روعه جدا
والبوست ممتاز جدا
وفعلا انا مش بحب الغش ولا الغشاشين
حتى الناس ال شايفه غير كده فا انا مش معاهم
تحياتى

GiGi world يقول...

ربنا يكرمك الله على زمان
بس انت نابغه وبعدين خاف من الحسد 3 من عشره ربنا يستر بص فى مواقع بتنزل بخور تحفه ابقى انزل ماكانش قولى وانا تحت امرك مش جمايل يعني لكن علشان تكمل البوست ده انت عارف الدنيا نصالح ياابني

مجداوية يقول...

السلام عليكم
أخى المبدع محمد الفارس

زيارة للسلام والاطمئنان عليكم ودائما بخير ان شاء الله
ولى رجاء وان كنت لا يحق لى الرجاء لقلة الزيارة هذه الأيام و كنت أخجل أن اطلبه لأنه ليس من حقى ولكن مجبر أخاك لا بطل و من أجل أختك الكبيرة مجداوية وحياة نور عنيك تغير الخلفية السوداء للكتابة لأن هذه الألوان مع الأسود لا تجعلنى أقرأ سطرين على بعض وأجد دموعى تنهمر ليس من التأثر ولكن من الاجهاد البصرى لى
معلش عضمة كبيرة وكل حاجه غشوها حتى النضارات دى تالت نضارة فى أقل من سنة وبرضه مش مريحة نظرى
طبعا دى مش مشكلتك لكن هو عشم ورجاء

وسلام الله عليك ورحمته وبركاته

الفارس الملثم يقول...

قلب مصرى ..

هههههههههههههه

لحق النظر يروح بدري كده , انا غيرت لون الخلفيه للون افتح شويه , انا بيني وبينك حبيت اعمل نيولوك للمدونه بس النور قطع عن المدونه هههههه

علي فكره انا بقيت بحب الاملا وبقيت باخد عشره من عشره والله , شكلكم خدتم فكره اني كنت بليد مممممممم

نورتني بجد يا باشا

الفارس الملثم يقول...

نوره الخشن ..

هههههههههههه

علي اساس انهم تحف مثلا , يعني حضرتك لما نعوز ندور عليكي نروحلك متحف الشمع ممممممممممممممم

نورتي يا سيدتي اللمضه

تحياتي دائما

الفارس الملثم يقول...

Rania..

يا سلام بجد عجبك , خلاص ابقي مذكرات المدرسه كلها ويمكن المدارس المجاوره هههههه

منوراني بجد يا رانيا

الفارس الملثم يقول...

شهد الكلمات..

ايوه يا ستي رحت ومحدش عزم علينا بكوباية شاي مممممممم

الف مبروك يا شهد وان شاء الله المدونه الجديده تكوني اجمل واجمل

تحياتي دائما

الفارس الملثم يقول...

سنووايت..

ما انا بقيت بعد كده شطور وبجيب 10 من 10 حتي اسالي في المدرسه بتاعتي ههههه

نورتي يا سنووايت

الفارس الملثم يقول...

منى ..

هههههههه

طبعا يا بنتي الغش موهبه , وفي منهم بينميها لغاية لما يأخذ قرض بكام مليار ويفك من البلد هههههه

منوراني كده دايما يا مني

الفارس الملثم يقول...

Blue Nile..

هههههههههههه

ليه سوء النيه ده انا دايما كنت .....
مقبلش الحساب خالص ههههههه

بس بقيت شاطر في الاملا بجد جدين مممممم

منوره يا بلو

الفارس الملثم يقول...

norahaty..

ازيك يا دكتوره , منوراني كده دايما

مع خالص تحياتي

الفارس الملثم يقول...

انا و صاحبى (احمد

هههههههههههههه

نورتني يا باشا , وخلاص بلاش اكملها هههههههههه

الفارس الملثم يقول...

فارس بلا جواد..

حضرتك نورتني يا باشا , وانا سعيد ان المدونه والبوست عجبوك بجد

طبعا انا مع رايك , من غشنا فليس منا

مع خالص تحياتي

الفارس الملثم يقول...

GiGi..

ههههههههههههه

ربنا يخليكي يا جيجي , يعني اعتبر ده مدح واصدق هههههههه

ازيك يا جيجي , اتمني تكوني في خير حال

نورتي بجد

الفارس الملثم يقول...

مجداوية

ههههههههههههه

لا طبعا يعني حضرتك تزورينا ونخليكي تعيطي , انا فتحتلك اللون اهو ,اتمني يكون مريح للعين كده , وحضرتك تامري اكيد ..

اتمني تكون بخير والدنيا بقت بمبي , طبعا مش البمبي بتاع البوست اللي قبل الل فات مممممم

نورتيني بجد يا سيده مجداويه

تحياتي دائما

محمد فاروق الشاذلى يقول...

أيوة كده الشكل العام أحلى بكتير، يظهر النور رجع تانى.
أشكرك على إهتمامك برأيى المتواضع فى شكل المدونة، ويارب دائماً إلى الأفضل.

دعوة للأمل يقول...

هههههههههه
انا كمان خيبة جدا فى الغش و مبعرفشى اغش او اغشش و مدونتك دمها خفيف

Heart Rose يقول...

لسه ما قرأت الموضوع..

بس حبيت أطل و أسلم .. ^_^

آخر العنقود يقول...

انا جيت اشوف الجديد فى المواضيع
لقيت جديد فى التصميم
فقلت ابارك
:)
الف مبروك
وعلى فكرة يعنى
الصراحة يعنى
كده احلى
اصل اللون الاسود ده متعب قوى
ههههههههههه

وبلاش لعب تانى بقى
:)))
تحياتى

الفارس الملثم يقول...
أزال المؤلف هذا التعليق.
الفارس الملثم يقول...

قلب مصرى..

يا باشا انت تأمر , بس ربنا يستر شركة الكهربا متحسبس علينا كهربا زايده اصلها بتتلكك ههههههههههه

نورتي بجد يا باشا

الفارس الملثم يقول...

دعوة للأمل..

ربنا يخليكي واتمني بجد المدونه تكون عجبتك

حضرتك نورتيني

الفارس الملثم يقول...

Heart Rose..

حضرتك نورتيني , واتمني البوست يعجبك

تحياتي دائما

الفارس الملثم يقول...

آخر العنقود..

هههههههههههههههههه

مش تقولي يا بنتي ان النور قطع , مش عارف مين ده اللي بيلعب في فيوسات الكهربا ممممممممممممم

احتمال ان شاء الله انزل البوست الجديد بكره الخميس ,ابقي تعالي بدري وانا اعزمك علي نسكافيه مممممممم

نورتي بجد يا اماني

كوارث يقول...

هههههههههههههههه
طلعت مشكلة والله يا فارس
انا توقعت انها طالما هترميه في البحر هتعمل لحد محاضر غش ولا حاجه !
بس واضح ان الامور بتسير في سلام
جامد يا عم

""""" يقول...

حلو اوى البوست على فكره
كويس انك بتتلكك :D

انا على فكره كنت بكره الغش جدا
جدا جدا يعنى

وكان بيبقى نفسى ازعق فيهم كلهم

وكتير كنت فعلا بزعق واقول فى دوشه مش عارفه اركز

الغش دا بيضيع مجهود ناس كتير
وناس بتتظلم عشان ناس معندهاش ضمير

انا عندى مبدا
اللى يغلط يتحمل نتيجة غلطه
واللى مذاكرش ميحلش

اللى عايز ينجح يذاكر واللى مش عايز هو حر
بس محدش يدى مجهوده لغيره

انا احب الالتزام بصراحه
الغش دا همجيه

الفارس الملثم يقول...

كوارث....

هههههههههههههه

لا ربنا ستر المره دي هههههههههه

نورت يا باشا

الفارس الملثم يقول...

amal..

بداية انا سعيد ان البوست عجبك

وفعلا هما مش بس عاوزين ياخدوا مجهود غيرهم ,لكن بيعتبروا الغش وكأنه حق مكتسب ويعملولك قلق وتوتر من الحاحهم اللي بيكون احيانا شديد السماجه

نورتي بجد

Unknown يقول...

اسمي لوسي أندرو أتمنى لتبادل شهادات بلدي مع الجمهور حول ما يسمى doctoridegu هذا الرجل لم يفعل فقط بالنسبة لي، فقد أعادت لي فقدت السابق صبي صديق لي معه موجة كبيرة، ولقد عرفت جون منذ سنوات و كنا معا لفترة طويلة، ونحن نحب بعضنا البعض ولكن فجأة قال لي انه لا يمكن أن يستمر بعد الآن، وكنت قلقا جدا في حالة من الاضطرابات بعد ذلك كنت أبحث عن طرق للحصول عليه مرة أخرى حتى صديق أخبرني عن هذا الرجل وأعطى البريد الإلكتروني اتصالاته لي ولكن كنت ما زلت في شك ولكن لدي فقط لمحاولة منذ كنت بحاجة بلدي السابقين حقا لذلك أنا اتصلت به على مشاكلي، وسوف لا أعتقد أنه كان يستعد هذا نوبة و جلبت بلدي السابقين عاشق الظهر واليوم نحن سعداء جدا معا وشكرا لكم مرة أخرى على ما drideguspellcast@gmail.com قمتم به بالنسبة لي، إذا كنت هناك تمر عبر أي من هذه المشاكل المذكورة أدناه:
1) إذا كنت تريد ظهرك السابقين.
(2) إذا كان لديك دائما أحلام سيئة.
(3) هل تريد أن تكون ترقيته في مكتبك.
(4) إذا كنت تريد طفلا.
(5) إذا كنت بحاجة إلى المساعدة المالية.
(6) إذا كنت تعاني من ح ط الخامس.
الاتصال به الآن لحل فوري من أي نوع من
مشاكل البريد الإلكتروني drideguspellcast@gmail.com

users online