الاثنين، 31 مارس 2008

الحب وسنينه "1"


منذ فترة قصيرة طرح في مدونات صديقة سؤال عن ما هو الحب , تقريبا كل واحد رد علي السؤال وعرف الحب بطريقة مختلفة عن الاخر , يمكن لان الحب مش شئ ملموس في ايدينا , مش معادلة كيميائية معروفة النتائج , هو شئ بنحسه من غير ما نشوفه , لكن بنشوف اثاره , زي بالظبط نسمة الهوا الرقيقة تلامس وجوهنا ,او لما نشوف حركة اوراق الشجر ونسمع حفيفها مع تلاعب الهوا باغصانها ," ياتري عشان كده ربطنا بين الحب والهوا .".يمكن ..

انا بقصد في الموضوع هنا مشاعر الحب بين رجل وانثي لكن بعيدا عن الشكل الغريزي اللي يشترك فيه الانسان مع الحيوان , بل اقصد هنا المشاعر والاحاسيس التي تتحرك داخل قلوبنا دون تحكم منا فيها , مشاعر الحب اللي بتخلي انسان بيضحي باشياء كتيرة عشان اللي بيحبه , او يقعد سنين علي ذكري حب مضي ...

احيانا بيكون مجرد وهم او رغبة لدينا اننا نعيش حالة حب , وفي ناس زي ما ذكر في احد مواضيع مدونة نورحياتي عندهم شيفونية يعني رغبة في تعذيب الذات والنوع ده ايكون اول موضوع عندنا من خلال حالة الحب من طرف واحد " اصلي كل اللي فات مقدمة " عارف في ناس اتقولي صدعتنا وشايفهم عاوزين يقوموا , مفيش خروج من المدونة الا لما تاخدوا للبوست للاخر عشان البوست يعمل مفعوله ..

الحب من طرف واحد


دايما معني الحب ده كان بياثر فيا جدا من وانا صغير خاصة وانا بشوف تيمة الافلام العربية القديمة الشهير هو بيحبها وهي بتحب حد تاني واللي هي بتحبه بيحب واحده تانية وكأن الناس هنا غاوية تعذب نفسها طيب ما كل واحد يحب اللي بيحبه وخلاص , يقلك قلبي مش بايدي , طبعا جزء من الكلام ده حقيقي لان القلوب بيد اللي خالقها " الله عز وجل " بس برده في ناس غاوية تعذب نفسها لدرجة إن كل ما كان اللي بتحبه مش حاسس بيها " او مش حاسة بيه " خالص بتلاقيها بتتعلق بيه اكثر , وفي حالات لو هو حس بيها اخيرا تلاقيها حبها فتر تجاهه وكانها بتتبع حكمة الممنوع مرغوب وكل ما هو بعيد عن متناولها هي متلهفة ليه اكتر ., فاذا كان الحب فيه بعض العذاب فان الحب من طرف واحد هو قمة العذاب

عشان كده إن دعبست في دولاب الخواطر بتاعي عشان اجيب خاطرة كتبتها زمان عن الحب من طرف واحد , هي ممكن متكنش تجربة شخصية اوي لكن انا حاولت استحضر مشاعر هذا المحب بلا امل وعذاباته التي لا تنتهي واتمني الخاطرة تعجبكم وتكون معبرة بجد

ان تحب مثلي


ان تحترق دون ان ينبعث منك رماد
ان تتحول الدمعات في عينك
الي بلورات من الثلج
ان لا تري احد في الكون سواها
بينما لا تشعر هي بوجودك
ان تسمع في صمت
تنهدات حبها لغيرك
وتبث اليك شكواها
وانت تتصنع الاهتمام ....
ان تبتسم....
وقلبك يزرف العبرات
ان تتعالي ضحكاتك
وجرحك مازال ينزف بالألم
و يتحول مخدعك
الي فراش من جمرات
ويصير ليلك بغير نجوم
وان تغادر مدار الارض
وتظل معلق قي الفضاء
تجرفك اعاصير الشمس
الي ابعد مدار...
وتفقد احساسك بزمانك ومكاانك
ويتحول قلبك الي ثقب اسود
تسافر اليه احزان العاشقين
من كل مجرت الكون....
هل تريد ان تحب مثلي؟

النسيان


تاني حالة من حالات الحب هي النسيان ..فاذا كان الحب قدر فالفراق ايضا قدر , فاحيانا نفرق الظروف بيننا وبين من نحب ويكون علينا ساعتها النسيان حتي لا نتعذب بذكري هذا الحب الضائع , وهنا يطرح السؤال هل كل البشر قادرين علي النسيان بنفس الدرجة , طبعا كلما كان الحب اقوي كلما كان النسيان اصعب , لكن ايضا هناك بعض البشر من الصعب جدا إن ينسوا حبهم الاول مهما مرت السنين ويكون النسيان بالنسبة لهم درب من المحال .. وهذه هي الحالة التانية من عذابات الحب ..


برده انا جبتلكم من دولاب الخواطر بتاعي خاطرة تعبر عن هذا الحب ..

كيف لي ان انساكي


لماذا كلما حاولت ان ابتعد
وأشيد من أحجار الزمن جدارا يحجب عني تفاصيل ملامحك
هناك قطعة مني تسحقني الي عالمك
إذا كان قدر لنا أن تتباعد بنا الدروب
فلماذا يرفض قلبي أن ينصاع
فعندما يتردد اسمك ...
يحترق النبض وتذوب الذاكرة
وتهيج داخلي عاطفة التمني واللهفة والرجاء
ويسكنني حزن كحزن الأطفال
أريد أن أنساكي
ولكن عندما أتوهم نسيانك
تذكرني انتفاضة شوق مع تخيلي ان تلك النسمات تحمل انفاسك
لحظة ان أغمض عيني
يتدفق شلال الذكريات
وتختنق العبرة لاذعة في حلقي
حتي وان فقدت ذاكرتي لكي أنساكي
كيف سأنتزع كل هذا الحزن الذي سكبتيه في روحي
عبثا احاول ... وعبثا اتساءل ...
كيف أنساكي يا من حروف اسمك منقوشة علي قدري

هناك 45 تعليقًا:

مجداوية يقول...

السلام عليكم
جيت الأول أبقى الألفه حاقرأ وأرجع جوله بالطفطف يعنى

مجداوية يقول...

وبعدين بقاااااااااا سامحك الله ولكن
قبل أن اعلق لدى فقط ملحوظة فى ( الحب من طرف واحد ) أن الرماد هو ما يتبقى من النار فالأنسب أن تقول دخان ..نعلق بقى ..
شوف أيها الأديب الملثم أنت أرجعتنى لحالة من الوجد كنت أعتقد أننى لن أعود اليها أبدا, حزينة الآن حزن الأطفال ,,أنا كل اهتماماتى الآن اهتمامات دينية واجتماعية وسياسية وتركت مواضيع الحب والرومانسية لأهلها واستبدلت حبى الشديد القديم للرومانسية بحب أكبر وأشد لله ولرسوله ,,ولكن كلماتك طرقت باب هذا المعبد الملعون ,,ليه كده بس يا هندزة ؟؟؟ دولابك الملىء بأثواب الجمال والابداع والكلمات الشاهقة الاحساس جعلنى أرتديها رغما عنى ولكنها أثواب حريرية فى غاية النعومة و وتنشر الدفء وأيضا نشرت لدى حزنا كحزن الأطفال وهذا هو الابداع ,,سامحك الله

Unknown يقول...

السلام عليكم ورحمة الله وبركاته
الفارس الملثم**
صباح الانوار يا أبو الفوارس
الكلام والشرح وكل الحاجات الحلوة الصبح ان شاء الله
بس فعلا فيه حاجه غرييييييييييييييبة الليلة دى
الكل صاحى قصدى من يعرفون بعضهم البعض من البلوجات
انا قلت لزميل قبل حضرتك
لتفسير هذه الظاهرة ان فيه*اشعه او شعاع فى الجو *خليتنى انا مثلااقوم من الساعة 1 صباحا اكتب فى مثل هذا الكلام
وربنا يستر على *الحبه الفاضلين*
وبعدين اختلف معاك يافارس انت ما صدعتنا من الاول ولا حاجه
احنا اللى مصدعين من الاول....هههههه
يظهر ما فى فايدة حاقعد واقولك راى فى كل واحده بسرعة
**ان تحب مثلي **
ان تحترق دون ان ينبعث منك رماد
ان تتحول الدمعات في عينك
الي بلورات من الثلج
ان لا تري احد في الكون سواها
بينما لا تشعر هي بوجودك**
روععععععععععععععععععععة
بقى دى مش تجربة شششششششششخصيه!! علىّ انا؟
كل كلممة بتقول انها"تجربة حيه"

**النسيان**
أريد أن أنساكي
ولكن عندما أتوهم نسيانك
تذكرني انتفاضة شوق مع تخيلي ان تلك النسمات تحمل انفاسك
عارف الاغنية بتاعه ام كلثوم*هجرتك*
لقيت روحى فى عز جفاك بافكر فيك وانا ناسى..
يعنى كلام واحد لنفس المشاعر تبقى حاجة حقيقيه وليست وهما
واخيرآ
كيف أنساكي يا من حروف اسمك منقوشة علي قدري
لن تنساها الا لا قدر الله جه لك """"""الف بعد الشر عنك لكن مش حتفضل فاكر بنفس الدرجة
يعنى مش حتتلفت لكل اسم زى اسمها مثلا تسمعه فى حوار عابر
لكن برضه لما حتسمع الاسم حتفتكرها هى ايوه هى
مش بقولك شىء عجيب
اظن انا طولت عليك وانت لسه خارج من حالة ابداع (من الصميم والمخزون الاستراتيجى)
اسيبك انا ولنا عودة ان شاء الله لوشاء الله لنا العودة ولو انت ما مامنعتناش نجى للازعاج بتاعنا
وتقبل مرورى وتحياتى(حلو البوست اوى يافارس صحيح لو كان ماوصلتش المعنى انا لحد دلوقت)
norahaty

سنووايت يقول...

الحب..رغم انها كلمة من حرفين فقط الا انها اتعبت العالم كله في محاولة لفهمها وتصنيفها

الحب من طرف واحد هو فعلا الشقاء بعينه ولكن انا لية نظرية خاصة بية , الحب اقصد بين الرجل والمرأة , هو شهور متبادل اذا لم يكن متبادل اذن فهو ليس حب مجرد اعجاب بالطرف الاخر , اوزي ما قلت رغبة للانسان في تعذيب ذاته
خاطرة ان تحب مثلي رائعة لا بل اكثر من رائعة بجد من اجمل ما قرأت

اما النسيان فهو ارتبط بالحب لكثرة قصص الحب الفاشلة فبيضطر الحبيب انه ينسي حبيبه , ولكن لا اتصور ان فيه ممكن ينسي حبيب , ممكن يتعود يعيش من غيره , ممكن حبه يفتر , لكن انه ينساه لا اعتقد
الذكريات تظل تلاحقه اينما ذهب حتي وان كان مش بيفكر في استرجاع الحب دا مرة اخري ولكن مجرد انه ينسي.. محال

"كيف أنساكي يا من حروف اسمك منقوشة علي قدري"
صدقت

في انتظار الحب وسنينه 2
تحياتي

Empress appy يقول...

الحب من طرف واحد

صعب قوى الكلمه دى بجد ممكن نقول انجذاب اصل طالما ما فيش تفاعل من الطرف التانى يبقى مش حب
بس كالعادهه فارس برضه

آخر العنقود يقول...

طيب اقول ايه انا بعد كل اللى اتقال ده

لا بجد .....ايه يافارس بس الحلاوة دى
يادولايبك يافارس
:)

انا مع اللى قال ان الحب من طرف واحد ده مش بيبقى حب مكن يكون اعجاب اه
انما حب لا

انا مش هقرد افتيك اوى فى الموضوع ده بصراحة
:)
بس اللى اعرف انه اكيد احساسا جميل ان الواحد يتبادل نفس الشعور مع انسان تانى

كلمات جميلة ورائعة كالعادة
وعجبتنى اوى الجملة دى
"كيف انساكى يامن حروف اسمك منقوشة على قدرى"

جميلة بجد
طلع طلع يافارس كل اللى فى الدولاب واحنا فى انتظاره
دمت مبدعا

موناليزا يقول...

مش عارفة أبدا منين لانك وديتنا لاماكن كتير اوى يعنى محتاج قاعدة
بالنسبة للحب فيه مقوله قرأتها مش فاكرة على لسان مين بس هى من وجهة نظرى جابت الموضوع من الاخر
"الحب ان تبكى قبله على حزنه وأن تتمنى سعادته قبل سعادتك"
نيجى بقى على القصيدتين بجد تأملك فى محله وكأنك عشت الحالتين بس قصيدة النسيان لو المقصود نسيان الحب من طرف واحد يبقى عذاب لنفسه لكن لو كان حب متبادل له حق طبعا مينسهوش لان فيه ذكريات حلوة مشتركة بينهم تخليه مش عارف ينسى لكن لو حب من طرف واحد ايه الذكرى الموجودة غير التجاهل واللامبالاة؟
يارب دايما فى تقدم وتمتعنا بما تكتب

حمامة يقول...

انا جيييييت
الحمد لله مش متأخرة اهو :)
بالنسبة للموضوع اللى بتتكلم فيه
فعلاً هو انتشر جداً خاصة مع الفراغ اللى الشباب عايشينه الفترة دى
فكل واحد بيدورله على حاجة تشغله ومش بيلاقى اسهل من الحب
بالنسبة للحب من طرف واحد متزعلش منى انا بعتبره غباء ماشى واحد قلبه مش بأيده بس اكتشف ان الطرف التانى مش بيحبه خلاص هيعمل ايه يعنى


الموضوع التانى بقى
على فكرة مش لازم كل حب حلو يبقى حب اول ممكن يبقى تانى وانا ف نظرى بعتبر ان كل حب صادق هو حب اول وحقيقي
وعمك انيس منصور بيقولك فى حياة كل منا وهم كبير يسمى الحب الأول
لكن فعلاً الحب ده سواء اول او اخير حتى بيكون صعب جداً انه يتنسى
خاصة لو فى تفاهم وبيبقى الألم كبير جداً
وعلشان ننساه بنقعد سنين وسنين
وإن نسيناه كمان
ربنا ما يوريه لحد :)

عجبنى جداً التعبير ده
يا من حروف اسمك منقوشة علي قدري

منتظرين باقى الانواع :)

بطوط حبوب يقول...

انا كنت هقول زى ابى
فعلا مفيش حب من طرف واحد
فى ان واحد بشتغل نفسه والطرف التانى ولا واخد باله
ده ناشئ عن تعريفى للحب بانه اشتغاله لو فاكر التدوينه دى

مجداوية يقول...

معلش أنا كتبت تدوينة جديدة من غلبى ,,يا ريت تلحق دورك ,,المهم بس وأنا بأقرأ التعليقات ,, حمامة ,, كتبت معلومة أحب أصححها لها المقولة اللى نسبتها لأنيس منصور( فى حياة كل منا وهم كبير اسمه الحب الأول )اللى قالها احسان عبد القدوس مش هو ودى كتبها فى مقدمة رواية فيلم الوسادة الخالية
وفى انتظار تشريفك أخى الكريم

الفارس الملثم يقول...

مجداوية ..

ما هو بيحترق في صمت , فالرماد ليها وقع خاص علي المعني , ما علينا ..

الله يخليكي يا فندم , ده بس من ذوق حضرتك ودايما كده مشجعاني.. , كلنا بنحس بحزن الاطفال ده , وجميل اوي ان نعود اطفال لكن بلا حزن , وجميل ان نحب لكن دون ان نعذب انفسنا في حب بلا امل ..

تحياتي وتقديري دائما

الفارس الملثم يقول...

norahaty .......

بداية طبعا منورة المدونة في اي وقت

روععععععععععععععععععععة
بقى دى مش تجربة شششششششششخصيه!! علىّ انا؟
كل كلممة بتقول انها"تجربة حيه"

هههههههههههههههه
لا بجد مش تجربة شخصية , ممكن واحد يعجب او يحب حد لفترة قصيرة بس مش درجة العذاب ده كله في حب من طرف واحد ,في طرق للشقاء كتير غير الحب ..

تعليقك علي حكاية النسيان دي مفهمتهاش اوي , باين علي انا اللي مهنج ..

لا طبعا حضرتك تشرفي في اي وقت انتي برده محتاجة استئذان..

تحياتي وتقديري

الفارس الملثم يقول...

سنووايت ..

تعليق متميز كالعادة , وكلامك عجبني طبعا , وبالنسبة للنسيان يمكن زي ما اشرت في البوست في ناس تكوينها النفسي بيجعل النسيان بالنسبة ليها درب من المحال علي عكس شخصيات اخري بينسوا اسرع ما بيحبوا ..

انشاء الجزء التاني قريب ويمكن اعمله مسلسل بالمرةهههههههههه

مع خالص تحياتي

الفارس الملثم يقول...

ابي ..

ايه التعليق السريع ده , مش مفروض كده تاخدي كرس وتقعدي تردي علي راحتك , طبعا منورانا ,مع ان الزيارة كانت سريعة , وزي ما قلتي نوع الحب من طرف واحد صعب اوي ..

مع خالص تحياتي

الفارس الملثم يقول...

آخر العنقود..

منوراني دايما ,كويس المرة دي انتي جي بدري , طبعا متشكر اوي علي كلامك الجميل وتشجيعك اللي حقيقي بيسعدني جدا ..

هو فعلا جمال الحب انه يكون متبادل ..

استني عليا كده ادعبسلكم كمان شوية في الدولاب , بس ربنا يستر يطلع منها فيران ولا حاجة ..ههههه

مع خالص تحياتي دائما

الفارس الملثم يقول...

monaliza..

بداية حضرتك شرفتي المدونة , وفعلا العبارة بتاعتك تحمل خلاصة الحب فمن يحب حقا يحزن ويفرح ويتالم ربما بدرجة اكبر مما يحسه من يحب حتي ..

طبعا انا قصد بالنسيان في حب متبادل لكن فرقته الظروف واحوال الدنيا المتقلبة..

تحياتي وتقديري

الفارس الملثم يقول...

حمامة..

لأ المرة دي حضرتك جي بدري ,مفيش احسن من المواعيد المظبوطة , وزي ما قلتي نعتبر الحب من طرف واحد غباء او تعذيب للنفي واكيد هو حالة صعبة جدا من الحب ..

انا متفق جدا مع كلامك ان كل حب صادق وبجد هو حب اول واكيد مش سهل يتنسي غير ما يصاحبه من الم ووجع نتيجة الفراق لو حدث ..

انشاء الله باقي الانواع قريبا ..

مع خالص تحياتي ..

الفارس الملثم يقول...

بطوط حبوب..

طبعا فاكرها وانا قصدتك انت ومدونة مها بالمدونات الصديقة , وانا فاكر طبعا في الردود اللي جاتلك كان في اختلافات كثيرة في تعريف كل واحد للحب ..

منورني دايما يا محمود

الفارس الملثم يقول...

شكرا مجداوية علي التوضيح والاضافة , وبالتاكيد يسعدني التواجد دوما في مدونتك المتميزة..

تحياتي وتقديري

كاميليا بهاء الدين يقول...

الله عليك

الفكرة جميلة

والخواطر كمان

فى انتظار الجزء الثانى

تحياتى وتقديرى

خايف من الحقيقة يقول...

مبدع
ابداع
بس خلاص





لا لسه
اخي الكريم
شعورك رائع بس الحب الاحلى هو حب الله ولا رايك ايه؟؟

انين الحزن يقول...

يااااااااصباح الرومانسيه والكلام الجامد

حب من طرف واحد كدا مره واحده طب والطرف التاني ايه ملوش مزاج يحس

بص هو مش بيبقي حب في بعض الاوقات لان مش فيه تبادل مشاعر

عارف اللي بيحب من طرف واحد ده لما بيفوق من تجربته دي يعني لما يحب حد بجد كدا بيقول لنفسه انا مكنتش بحب

سلاموووووووز ياجامد وربنا يجعل كلامنا خفيف عن اللي من طرف واحد ده

وزة

صبرني يارب يقول...

واضح ان انا علقت على البوست ده مع البوست الى بعده جمله فى البوست الى فات ماخدتش بالي انهم منفصلين اندمجت تقريبا

اول مره اجي مدونتك كان النهارده يا فارس

حقيقى اسلوبك عجبنى والى عجبنى اكتر الفكره
وابقى اقري تعليقى بقى فى البوست الى فات عشان مش نكرر

walaa يقول...

اكييد الحب من طرف واحد مش بيكمل زى ما قلت
وبياخد مجراه فى النسيان بس هيقدر ينسى تبقى مجرد ذكرى
بس بجد والله كلماتك حلوه قوى
الى المزيد
تحياتى ولاء

HeBa يقول...

فيه ناس كتير قوي بتقول إن مينفعش يكون فيه حب من طرف واحد

جايز يكون زي ما أنت بتقول الناس بتعمل كده من باب تعذيب الذات أو إن الممنوع مرغوب

بس دي مش قاعدة ممكن تكون فيه ناس بتحب من طرف واحد ويكون حبها ده حقيقي

مش عارفة المفترض أنك مش بتكون مستني مقابل لمشاعرك

يعني أكيد طبعا تتمنى أن اللي بتحبه يبادلك المشاعر

بس أنا مش بحب مبدأ الربط

بحس أنك كأنك بتخلي حاجة قصاد حاجة والحب مش كده

مش بيتقاس بالمسطرة وقد ما حد يحبني هحبه

الموضوع مش في ايدينا سبحان مقلب القلوب

يعني أنت مش هتختار اللي إن تحبه يحبك ومش هتقدر تنساه بسهولة لو الظروف فرقتكم

ده لو كان حب حقيقي مش تسالي

تحياتي ودمت مبدعا

Rania Lelah يقول...

ليه ديما بنقول الحب من طرف واحد مش حب
انجذابك العاطفى لاى شخص حاجة واردة جدا
فبتشعر انت بالحب الحقيقى
انما احب الى يحبنى
يبقى بشتغل نفسى و محبتوش غير لانى استخسرته فى حد تانى او لانه هو حبنى

بس
الحب حب طرف واحد طرفين
اسمه حب
غير كدة خواطرك الجميله دى ليه منزلتهاش على بوستات كامله
موضوعك دة يا فارس
كان ينزل على 3 مراحل و الله
ابدعت اخى

سلوى يقول...

بصراحه الأخوة والأخوات قالوا كل حاجه

يتبقى لي أن أقول

أنك

متميز

rona يقول...

بجد كلامك كله صح ولمست اشياء موجوده فى حياتنا وهناك ايضا اشخاص يعلمون ان هذا الحب لا ينفع ويكملوا ليه

Unknown يقول...

زى الاغنية الى انت واضعها
فعلا اصعب حب لما تلاقى الى انت تحبة مبيحبكش

الفارس الملثم يقول...

كاميليا..

حضرتك نورتي المدونة , وانشاء الله التكملة قريبا ..

مع خالص تحياتي

الفارس الملثم يقول...

خايف من الحقيقة...

بداية اهلا بك نورت المدونة , بالتاكيد حب الله هو اعلي مراتب الحب كما قال الصوفية , لكن الحب بين البشر غريزة انسانية اوجدها الله في قلوب البشر , والرسول نفسه كان يشير لحبه للسيدة عائشة علي مسمع من الصحابة..

سعدت اخي بمرورك

مع خالص تحياتي

الفارس الملثم يقول...

انين الحزن ..

كلامك صح فعلا يا وزة , ومفيش اصعب من الحب ده , وفي اغلب حالاته بيبقي وهم كبير او رغبة في تعذيب النفس ..

نورتي يا وزة

واكبر سلاموززززززززززززززززززز عشانك

الفارس الملثم يقول...

صبرني يارب ..

حضرتك طبعا نورتي المدونة , وانا سعيد انها نالت اعجابك , واتمني الا تكون الزيارة الاخيرة ..

مع خالص تحياتي

الفارس الملثم يقول...

walaa..

تسلمي يا ولاء , وطبعا كلامك صحيح , فهو حب بلا امل , نورتي المدونة ..

مع خالص تحياتي

الفارس الملثم يقول...

هبة..

ازيك يا هبة , بس ايه التاخير ده كله مممممممممم..

طبعا مفيش قاعدة للموضوع ده , وفي ناس فعلا بتحب بصدق وبتبقيش مستنية مقابل للحب ده , بس الشخصيات دي بتعيش حياتها في عذاب فالاولي انها تحاول تبحث عن من يقدر حبها بدل ان تضيع عمرها هباء في الانتظار ان يحس بها , وربما تكتشف في النهاية انه مجرد وهم ..

دائما يسعدني مرورك ورايك

تحياتي وتقديري

الفارس الملثم يقول...

Rania ..

انا اقصد بحب اللي بيحبك بمعني ان لازم تحس ان اللي بتمنحه كل حبك ده حاسس بيه ومقدره , مش تضبع عمرك في حب انسان يمكن مش حاسس حتي بوجودك ..

طبعا انا سعيد ان الخواطر عجبتك , يلا انا قلت عن ما حد حوش هههههههههه

حقيقي يسعدني مرورك ورايك دايما

مع خالص تحياتي

الفارس الملثم يقول...

Salwa..

نورتي يا سلوي المدونة , وشكرا جدا علي اطرائك ..

مع خالص تحياتي

الفارس الملثم يقول...

rona..

اسعدني زيارتك الاولي لمدونتي المتواضعة ...

مع خالص تحياتي

الفارس الملثم يقول...

ايوية ..

فعلا ده اصعب حب انك تلاقي اللي انت بتحبه بيحسكس , حضرتك دوما منورةالمدونة..

مع خالص تحياتي

Desert cat يقول...

طبعا البوست كله كالعادة اكتر من هايل بس عجبتنى اوى كلمات ان تحب مثلى

Bongo يقول...

كل مرة ادخل متأخر , معلش بقي
مش بلحق ردود بدري
المهم
البوست جميييل كالعاده
و مميز جدااا
و منتظرين " الحب و سنينه 2 "

mnoon يقول...

لا أحب الحب
ولا أريد أنا أكون من العاشقين
ولا أريد أن أسهر ليلى

يقولون
أن الحب حياه
وأنا أقول أن الحب هو الموت نفسه

فأعذرنى ياقلبى
فلن أجعل لك حبيب

دا كلامى لقلبى
اللى مش بيسمع كلامى أبداً

الفارس الملثم يقول...

Desert cat..

انا سعيد ان البوست عجبك , ومنوراني كده دايما ..

مع خالص تحياتي

الفارس الملثم يقول...

Bongo..

منورة المدونة يا بانجو , بس مفروض تدفعي غرامة تاخير هههههه

طبعا انا سعيد ان البوست عجبك , والحب وسنينه قريبا جدا

مع خالص تحياتي

الفارس الملثم يقول...

mnoon..

مش عارف اقولك ايه . لان الحب بالفعل قد يكون هو الحياة والسعادة للبعض , بينما يكون كل الالم والموت للبعض الاخر , فقط الاقدار هي ما تحدد مصائر البشر ..

حضرتك نورتي المدونة ..

مع خالص تحياتي

users online